Resurekshon di e Pueblo di Dios

Bos di e Yu di Dios ta yama e santunan drumí for di nan graf. Tur kaminda na tera mortonan lo tende e stèm ei, i esnan ku tend'é lo biba, un gran armada di tur nashon, tribu, lenga i pueblo. For di e kas prizòn di morto nan ta bin, bistí ku gloria inmortal, gritando: “Lamuèrtè, unda bo viktoria a keda? Unda bo bion ta?” (1 Korintionan 15:55).GS 84.3

Tur ta sali for di nan graf ku e mes estatura ku kua nan a drenta nan kèlder. Pero tur ta lanta ku e freskura i vigor di eterno hubentut. Kristu a bini pa restourá loke tabata pèrdí. Lo E kambia nos kurpa inferior i adapt'é na Su kurpa glorioso. E forma mortal, koruptibel, un tempu manchá ku pika, ta bira perfekto, bunita i inmortal. Defekto i deformidat ta keda den graf. E redimínan lo “krese” (Malakias 4:2 KJV) na e estatura kompleto di e rasa den su gloria original. E último rasgonan di maldishon di piká lo ta eliminá. E fielnan di Kristu lo reflehá e imágen perfekto di nan Señor den mente i alma i kurpa.GS 85.1

E hustunan na bida lo keda transformá “diripiente, den un fregá di wowo” (1 Korintio 15:52). E bos di Dios ta hasi nan inmortal i nan ta uni ku e redimínan resusitá pa huntu nan bai topa ku nan Señor den laria. Angelnan ta “reuní su eskohidonan for di e kuater skinanan di mundu, for di un ekstremo di mundu te e otro ekstremo.” (Mateo 24:31). Nan ta karga mucha chikí hiba den brasa di nan mama. Amigunan, separá asina tantu tempu pa morto, ta bolbe uni, pa no separá nunka mas, i ku kantikanan di goso nan ta subi huntu bai e Stat di Dios.GS 85.2