Kapítulo 1—Dikon tin sufrimentu?

Hopi ta mira e obranan di maldat, ku su doló- i pèrdidanan, i ta puntra kon esaki por ta eksistí bou di gobernashon di Esun ku ta infinito den sabiduria, poder i amor. Esnan ku ta inkliná na duda ta tuma esaki komo un preteksto pa rechasá e palabranan di Beibel. Tradishon i mal interpretashon a nubla e siñansanan di Beibel enkuanto naturalesa di Dios, naturalesa di Su gobièrnu, i e prinsipionan di e manera ku E ta dil ku piká.GS 9.1

Ta imposibel splika orígen di piká den un forma ku ta duna un motibu pa su eksistensia. Sinembargo nos por komprondé sufisiente tokante piká su orígen i fin, pa mustra klaramente Dios su hustisia i bondat. Di ningun manera Dios no tabata responsabel pa piká. E no a kita Su grasia divino; tampoko no tabata falta nada den e gobièrnu divino ku por tabata motibu di e rebelion. Piká ta un intruso ku ningun hende no por duna un splikashon pa su presensia. Bini ku un èksküs ta nifiká defend'é. Si nos por haña un èksküs p'e, ya lo e no ta piká mas. Piká ta ekspreshon di un prinsipio ku ta den konflikto ku lei di amor, ku ta fundeshi di e gobièrnu di Dios.GS 9.2

Promè ku piká a kuminsá tabatin pas i goso den henter universo. Amor pa Dios tabata riba tur kos, amor di un pa otro tabata desinteresá. Kristu, e Yu Unigénito di Dios, tabata ún ku Su Tata eterno den naturalesa, personalidat i proposito — e úniko ser ku por a haña akseso na tur e órganonan di konseho i plannan di Dios. “Pasobra ta pa medio di djE, Dios a krea tur kos den shelu ... inlduso podernan spiritual, potensianan, outoridatnan i gobernantenan - Dios a krea tur kos pa medio di djE i tur kos ta dirigí riba djE” (Kolosensenan 1:16).GS 9.3

Komo ku lei di amor ta fundeshi di e gobièrnu di Dios, felisidat di tur e sernan kreá tabata depende di nan harmonia boluntario ku su prinsipionan di husrisia. Dios no tin plaser den lealtat fòrsá, i E ta duna tur hende boluntat liber, pa asina nan por skohe pa obedes’É boluntariamente.GS 10.1

Pero un di e sernan kreá pa Dios a skohe pa malusá su libertat. Piká a originá ku un angel, ku banda di Kristu, tabata e ser ku mas Dios tabata honra. Promè ku su kaida, Lusifer tabata kabesante di e kerubinnan wardadó, santu i puru. “‘Esaki ta loke SEÑOR, mi Dios ta bisa: “Bo tabata modelo di perfekshon, yen di sabiduria i di bunitesa perfekto. Bo tabata den Eden, e hardin di Dios; Bo pañanan tabata kubrí ku piedranan presioso... Bo tabata un kerubin ku alanan habrí ku mester a tene warda; Mi a duna bo un lugá. Bo tabata riba e seru sagrado di e diosnan, aya bo tabata kana rònt meimei di e piedranan lombrante. Bo komportashon tabata ireprochabel for di dia ku a krea bo, te ora bo a kuminsá hasi maldat. ... Esta orguyoso bo tabata di bo bunitesa; Pero bo no a pèrdè solamente bo bunitesa, bo sabiduria tambe a disparsè” (Ezekiel 28:12-17). “Pasobra bo a hinka den bo kabes ku bo ta un Dios” (versikulo 6). “Bo a yega di pensa den bo mes: ‘Mi ta subi bai shelu i lanta mi trono haltu riba e streanan di mas leu. Te den nort aya lo mi kai sinta, riba e seru kaminda diosnan sa reuní. Lo mi subi mas haltu ku kabes di nubianan, e ora ei porfin lo mi ta Dios Altísimo su pareu” (Isaías 14:13,14).GS 10.2

Kudisiando e honor ku e Tata a duna Su Yu, e prínsipe akí di angelnan tabata ke e poder ku tabata pertenesé na Kristu so por a usa. Un diferensia di opinion awor a daña e harmonia di shelu. Mirando ku un otro a eksaltá su mes, e otro angelnan ku tabatin e gloria di Dios komo esun supremo, a sinti un temor straño di algu malu. E konseheronan selestial a hasi un supliká na Lúsifèr. E Yu di Dios a mustr'é e bondat i hustisia di Dios Kreador i e naturalesa sagrado di Su lei. Dor di rechas’é, Lúsifèr lo deshonrá su Kreador i hiba su mes na pèrdishon. Pero e atvertensia solamente a lanta su resistensia. Lúsifèr a permití su envidia riba Kristu domin'é.GS 10.3

Orguyo a alimentá su deseo di supremasia. E honornan grandi ku Dios a duna Lúsifèr, no a hasié gradesido na su Kreador. E ke tabata igual na Dios. Tòg tur hende a rekonosé ku e Yu di Dios ta e Gobernadó di shelu, ún ku Su Tata den poder i outoridat. Kristu tabata partìsípá na tur e konsilionan di Dios, pero Lúsifèr sí no a hana akseso na e plannan divino. E angel poderoso akí a kuestioná, “Dikon Kristu mester tin supremasia? Dikon e ta asina honrá riba Lúsifèr?”GS 11.1