Fin di Sufrimentu

Esnan ku “ta digno” (Lukas 20:35) di e resurekshon di bida ta “bendishoná i santu.” “E di dos morto no tin poder riba nan” (Revelashon 20:6). Pero esnan ku no a risibí pordon pa medio di arepentimentu i fe mester risibí “pago di piká,” kastigu “segun nan obranan,” ku ta kaba den e “segundo morto.”GS 37.3

Komo ku ta imposibel pa Dios salba pekadó den nan piká, E ta priva nan di nan eksistensia ku nan violashon di lei a pone nan pèrdè, i ku nan a proba di no ta meresé. “Un ratu i malbado a kaba, no buska su sitio, e no t'ei mas” (Salmo 37:10). “komo si fuera nunka nan no a eksistí” (Abdías 16). Nan ta sak den olvido eterno. Asina ei Dios lo pone un fin na piká. “Bo a hura paganonan i kaba ku malbadonan, laga nan nòmbernan kai den olvido pa semper. A kaba ku e enemigu, ruiná kompletamente” (Salmo 9:5,6).GS 37.4

Den Revelashon Huan ta tende un kanto universal di alabansa sin ningun nota di diskordia. Ningun alma pèrdí no ta blasfemá Dios miéntras nan ta trose di doló den tormento eterno. Ningun ser miserabel den fièrnu lo no meskla su gritu ku e kantonan di esnan salbá.GS 38.1

Eror di inmortalidat natural ta base di e doktrina di konsiensia den morto. Meskos ku tormento eterno, esaki tambe ta kontra Skritura, kontra rasonamentu i nos sintimentunan di humanidat. Di akuerdo ku kreensia popular, esnan salbá den shelu sa tur loke ta tuma lugá na tera. Pero kon e mortonan por ta felis di sa problema di esnan bibu, di mira nan pasa fèrdrit, soportá desapunto i angustia di bida? I esta repugnante ta e kreensia ku asina ku rosea sali for di kurpa, alma di esun ku no a arepentí ta ser mandá den e vlamnan di fièrnu!GS 38.2

Kiko Skritura ta bisa? Humanidat no ta konsiente durante di morto: “Ora e muri e ta bolbe bira tera; a kaba ku su plannan e dia ei” (Salmo 146:4). “hende bibu sa sikiera ku nan ta muri, pero mortonan no sa nada mas ... Awor si su amor, su odio, i tur su pashonnan a kaba. Nan no ta hunga un ròl mas den loke ta sosodé aki na mundu, nunka mas” (Predikador 9:5,6). “Reino di morto no por alabá Bo. Esnan ku a baha den graf no ta konta mas ku bo fieldat. Ta hende bibu so por alabá Bo, manera ami ta hasi awor akí” (Isasias 38:18,19). “Ningun morto no ta kòrda riba Bo. Ken ta alabá Bo den reino di morto?” (Salmo 6:5).GS 38.3

Riba dia di Pentekostes Pedro a deklará ku David “a muri i nan a der'é; su graf ta serka nos te dia djawe. David mes no a subi bai shelu” (Echonan 2:29,34). E echo ku David ta keda den su graf te dia di resurekshon, ta prueba ku e hustu no ta bai shelu na ora di su morto.GS 38.4