Kada stap di fe i obediensia ta trese un kreyente den un kontakto mas íntimo ku e Lus di Mundu. E rayonan resplandesiente di Solo di Hustisia ta bria riba e sirbidónan di Dios i nan mester reflehá Su rayonan. E streanan ta bisa nos ku tin un lus den shelu ku su gloria ta laga nan bria. Di mes manera kristiannan mester manifestá ku tin un Dios riba e trono kende Su naturalesa ta digno di ta alabá i imitá. E santidat di Su naturalesa lo ta visibel den Su testigunan.GS 57.1

Dor di e méritonan di Kristu nos tin akseso na e trono di Poder Infinito. “Ni su mes Yu e no a spar, pero a entreg’É na morto pa nos tur. Si El a duna nos su mes Yu, lo e no a duna nos tur otro kos tambe?” (Romanonan 8:32;). Hesus a bisa: “Si boso mes ku ta mal hende sa di duna boso yunan kos bon, kuantu mas anto boso Tata den shelu lo no duna esnan ku pidiÉ Spiritu Santu?” (Lukas 11:13). “Kiko ku boso pidi Mi den mi nòmber, Mi ta hasi” (Huan 14:14). “Pidi i boso lo haña, ya asina boso legria lo ta kompleto” (Huan 16:24).GS 57.2

Ta privilegio di tur hende pa biba di un manera ku Dios ta aprobá i bendishoná. No ta boluntat di nos Tata selestial pa nos ta biba semper den kondenashon i skuridat. Kana rònt, kabes abou ku nos kurason yen di pensamentunan di ami, no ta evidensia di berdadero humildat. Nos por bai serka Hesus i keda purifiká i para dilanti di Lei sin bèrgwensa i remordimentu.GS 57.3

Atrabes di Hesus e yunan di Adam ku a kai a bira “yunan di Dios.” “E no ta sinti bèrgwensa pa yama nan su ruman” (Hebreonan 2:11). Bida Kristian mester ta unu di fe, viktoria, i goso den Dios, “buska forsa den alegria di Señor” (Nehemias 8:10). “Sea semper kontentu; resa kontinuamente; yama Dios danki bou di tur sirkunstansia, pasobra esei ta loke Dios ta deseá di boso komo hende ku takereden Kristu” (1 Tesalonisensenan 5:16-18).GS 57.4

Esakinan ta e frutanan di kombershon i santifikashon bíbliko. Ta solamente pasobra hende ta trata e gran prinsipionan di hustisia poné den lei ku asina tantu indiferensia, e frutanan ta asina poko. Ta esaki ta e motibu dikon nos ta mira asina tiki di e trabou profundo i permanente di Spiritu ku sa bai samsam ku rebibamentunan proménan ayá.GS 58.1

Ta dor di kontemplá, nos ta transformá. Komo hende a neglishá e mandamentunan sagrado den kua Dios a revelá perfekshon i santidat di Su naturalesa, i nan mente a ser atraé pa siñansa- i teorianan humano, a sigui un deterioro di bida santifiká den iglesia. Únikamente ora Lei di Dios keda restourá na su puesto hustu lo por tin un rebibamentu di fe i deboshon outéntiko meimei di Su pueblo ku ta siguiÉ.GS 58.2

Santifikashon Bibliko

Kapítulo 7—Nos Úniko Protekshon