Isahluko 5—Imbali kaJohn Wycliffe

Ngaphambi kokusungulwa komsebenzi weMvuselelo kwakulamaBhayibhili amalutshwana ezandleni zabantu ezikhathini ezitshiyeneyo, kodwa uNkulunkulu wayengavumanga ukuthi iLizwi lakhe litshabalaliswe kokuphela. Iqiniso loMbhalo wakhe lalingeke lifihlwe kokuphela. Wayelawo amandla okukhipha amaketane ayebophe ilizwi lokuphila, ngendlela efanana laleyo avula ngayo imnyango yensimbi ejele nxa wayekhulula inceku zakhe. Emazweni atshiyeneyo kuzwekazi laseEurope, uMoya kaNkulunkulu wafuqa abantu ukuthi bahlolisise ilizwi lakhe njengenotho efihliweyo. UMoya wabathungamela eMbhalweni oNgcwele, bafunda amazwi lawa ngokulangazelela okukhulu. Babezimisele ukwamukela ukukhanya kungakhathalekile ukuthi intengo yokwenza lokhu yayizaba yini kibo. Loba bengenelisanga ukuqedisisa zonke izinto kodwa banikwa amandla okuzwisisa amaqiniso amanengi ayegqitsheliwe okwesikhathi eside. Njengezithunywa zasezulwini baqhubeka, beqamula amaketane obunyama lawamasiko, betshumayeza labo ababegqilazwe okwesikhathi eside, ukuthi bavuke njalo bathole inkululeko. {GC 79.1}IEP 79.1

Ngaphandle kwaphakathi kwebandla lamaWaldensi, ilizwi likaNkulunkulu lalibotshelwe endimini ezazisaziwa ngabafundileyo kuphela, kodwa isikhathi sasesifikile esokuthi ilizwi likaNkulunkulu libhalwe ngendimi ezazizwisiswa ngabantu bonke endaweni ezitshiyeneyo. Umhlaba wasewudlulile ebunyameni bobusuku. Amahola obunyama ayesedlula, endaweni ezinengi kwasekubonakala insaba zokusa. {GC 79.2}IEP 79.2

Phakathi komnyaka ka 1300 lomnyaka ka1400, kwaphuma eNgilandi “indonsakusa yeMvuselelo.” UJohn Wycliffe wayengumsunguli weMvuselelo, hatshi elizweni laseNgilandi kuphela, kodwa kuyo yonke inkolo yesiKrestu. Amazwi okuphikisa ibandla leRoma elamvumela ukuthi awakhulume ngalo ekuqaliseni ayengasayikuthuliswa. Ukuphakama kwakhe kwasungula impi eyayizaphetha ngokukhululwa kwabantu, lamabandla kanye lezizwe. {GC 80.1}IEP 80.1

UWycliffe wazuza imfundo esikolo eyayidalelwe ukuvula umuntu ingqondo kuphela hatshi ukumnika ulwazi lokwenza umsebenzi othile, njalo kuye ukumesaba uNkulunkulu kwakuyikuqala kokuhlakanipha. Waphakanyiswa esikolo ngenxa yokulunga kwakhe kanye leziphiwo zakhe ezazigoqela ukukhalipha ezingwalweni. Ngenxa yokomela kwakhe iqiniso, wenza imizamo yonke yokuthi aqedisise zonke ingatsha zemfundo. Wayefundile ngengatsha ezazibalisa ukuphila lokuhlalisana kwabantu, iziqondiso zebandla, njalo lezemithetho, ikakhulu imithetho yelizwe lakibo. Emsebenzini wakhe awenzayo ngemva kokwamukela iqiniso, isisindo semfundiso ayithola ebutsheni bakhe sasibonakala. Ukujula kolwazi lwakhe kwezokuphila kwabantu, kwamnika amandla okuthi aveze wonke amaphutha ayekhona, lokufunda kwakhe ngemithetho yezizwe kwamenza ukuthi ayenelise ukulwela inkululeko yelizwe njalo leyokholo. Loba nje wayesenelisa ukusebenzisa izikhali zelizwi likaNkulunkulu, kodwa wayesewafundile amaqhinga abezemfundo njalo lendlela ababesebenza ngayo. Ukukhalipha kwakhe lolwazi ayeselalo kwenza ukuthi ahlonitshwe ngabangane kanye layizitha zakhe. Bonke ababevumelana laye bananzelela ukuthi ukuhlakanipha kwakhe kwakusedlula wonke umuntu elizweni, njalo izitha zakhe zehluleka ukuphikisa umsebenzi wemvuselelo ngoba kwakungekho amaphutha ababengaphuma lawo phakathi kwalokho ayekufundisa. {GC 80.2}IEP 80.2

Nxa wayelokhe esesikolo, waqala ukufunda iBhayibhili. Ngalezonsuku iBhayibhili lalilotshwe kuphela ngolimi lwasendulo, abafundileyo kuphela yibo ababesenelisa ukufinyelela umthombo weqiniso, owawuvalelwe bonke abangafundanga. Ngokwenza njalo indlela yayilungisiwe ngaphambilini eyokuthi uWycliffe ayenze umsebenzi wakhe njengoMvuseleli. Amadoda aqeqetshileyo ayelifundile ilizwi likaNkulunkulu njalo athola iqiniso elikhulu mayelana lomusa wakhe ongathengiswayo. Ekufundiseni kwabo babeyenze ukuthi abanengi bathole ulwazi mayelana leqiniso leli njalo babethungamele abanye ukuthi baphenduke njalo balandele amazwi okuphila. {GC 80.3}IEP 80.3

Nxa uWycliffe wayesezwile ngelizwi likaNkulunkulu, walifunda walicubungula ngobunono obufana lalobu ayebusebenzisile nxa wayefunda izinto zasemhlabeni. Ngaphambi kwalokhu wayezwe emoyeni wakhe kulendingeko enkulu ayesehluleke ukuyisuthisa ngemfundo yakhe yasemhlabeni kanye langemfundiso yebandla. Elizwini likaNkulunkulu wathola lokhu ayehluleke ukukuthola esebenzisa imizamo yakhe. Wathola icebo losindiso liveziwe njalo wabona ukuthi uJesu nguye kuphela umeli wabantu. Wazinikela emsebenzini kaNkulunkulu njalo wazimisela ukuthi atshumayeze abanye ngamaqiniso lawa ayesewatholile. {GC 81.1}IEP 81.1

NjengabaVuseleli abeza ngemva kwakhe, uWycliffe kazange abone ekuqaleni ukuthi umsebenzi wakhe wawuzamthungamelela ngaphi. Kwakungasiyo injongo yakhe ukuthi azibeke njengomuntu owayehlamukela amandla eRoma. Kodwa ukuthanda kwakhe iqiniso kwabangela ukuthi azithole esilwa lemfundiso yamanga. Nxa wayeqhubeka enanzelela imfundiso yamanga eyayifundiswa ngupapa, wazithola esefundisa ngamandla iqiniso elitholakala eBhayibhilini. Wananzelela ukuthi ibandla leRoma lalilahle ilizwi likaNkulunkulu laphakamisa endaweni yalo amasiko abantu, wabeka icala phezu kwabapristi engelakho ukwesaba ngenxa yezenzo zabo zokulahla iBhayibhili, wabatshela ukuthi kwakumele iBhayibhili libiselwe ezandleni zabantu lokuthi amandla walo kwakumele abiselwe ebandleni. Wayelesipho sokutshumayela lokufundisa njalo impilo ayeyiphila yayihambelana lamaqiniso ayewatshumayela. Ulwazi lwakhe loMbhalo, lamandla okuchasisa kwakhe, lokuhlambuluka kwempilo yakhe, lesibindi sakhe, kwabangela ukuthi abantu bamthembe njalo bamncome. Abantu abanengi babengasuthiseki ngokholo lwabo ngoba babebona ububi obabugcwele ebandleni laseRoma, njalo bajabula kakhulu nxa babesizwa imfundiso kaWycliffe, kodwa abaphathi bebandla bagcwala ulaka, nxa babenanzelela ukuthi uMvuseleli lowu wayeselendonsela edlula eyabo. {GC 81.2}IEP 81.2

UWycliffe wayelesipho sokunanzelela imfundiso zamanga, njalo walwisa ngesibindi esikhulu konke ukuncindezela okwakuvunyelwa libandla leRoma. Ngesikhathi lapho esebenza njengomfundisi esigodlweni senkosi, wathatha inyathela lokuphikisa imali eyayibhadalwa yisizwe sakibo eyayisiya kupapa, wabonisa ukuthi amandla upapa ayezinika wona ayephikisana lomcabango njalo lesambulelo. Izinto ezazifunwa ngupapa zazicunula abantu abanengi, okwabangela ukuthi imfundiso kaWycliffe yamukelwe ngababusi abanengi. Amakhosi lababusi babambana balwisana lemfundiso yokuthi upapa wayelamandla phezu kwesizwe sabo njalo bayala ukumthumela imali ayeyifuna. Ngale indlela amandla kapapa elizweni laseNgilandi axegiswa kakhulu. {GC 82.1}IEP 82.1

Eyinye yemfundiso ezimbi alwisana layo, ngeyabantu ababengaphansi kwebandla leRoma ababekhetha ukutshiya imisebenzi yabo bephile ngeminikelo yabantu balapho ababehlala khona. Abantu laba babegcwele elizweni laseNgilandi njalo babengumthwalo onzima emnothweni welizwe. Indonsela yabo yayizwakala endaweni zonke zelizwe. Impilo yabo yokungasebenzi yayingasongxaki kuphela emnothweni welizwe kodwa yayisenza abantu bebone sengathi ukusebenza kwakungaqakathekanga. Abantu abatsha labo babengasafuni ukusebenza. Inengi labo ngenxa yomzekeliso wabantu laba ababesithi basebenzela ibandla, lalikhetha impilo leyi bengatshelanga abazali babo njalo bengalayo lemvumo. Omunye wabathungameli bebandla leRoma nxa wayefundisa abantu abatsha ukuthi bakhethe umsebenzi lowu wokusebenzela ibandla wathi: “Loba uyihlo engalala emnyango ekhala ekuncenga, kumbe unyoko ekubonisa ukuthi wakuthwala esiswini sakhe aphinde akubonise lamabele akumunyisa ngawo, bona ukuthi uyabanyathela uhambe phezu kwabo, uqhubekele phambili usiyasebenzela uKrestu.” Ngamazwi amabi kangaka, ngendlela uLuther akuchaza ngayo, “ayesenza umuntu abeyinyamazana kulokuba yindoda esebenzela uKrestu”, inhliziyo zabantwana zaphendulwa ngale indlela bahlamukela abazali babo. — (Barnas Sears, The Life of Luther, pages 69, 70). Ngale indlela abathungameli bakapapa benza njengabafarisi basendulo, ngokwenza ukuthi umthetho kaNkulunkulu ungabi lamandla ngenxa yamasiko abo. Ngokwenza njalo imizi yadilika, abazali bathathelwa ubudlelwane phakathi kwabo lamadodana kanye lamadodakazi abo. {GC 82.2}IEP 82.2

Labantu abatsha ezikolweni badukiswa ngabathungameli bebandla ababebonisa abantu isimilo samanga, abafundi balingeka ukuthi bahlanganele enhlanganisweni zabo. Inengi labo lalinanzelela ngemva kwesikhathi ukuthi babeyenze iphutha ngoba basebehlukaniswe lemuli zabo, kodwa kwakusiba nzima ukuphuma nxa basebezihlanganise lenhlanganiso leyi. Abazali abanengi ngokwesaba indonsela yabaphathi laba, bakhetha ukungathumeli abantwana babo ezikolo eziphezulu. Inani labantwana elalisiya ezikolweni eziphezulu lalisehla izikhathi zonke. Izikolo zazingasela bafundi njalo lolwazi elizweni lwehla kakhulu. {GC 83.1}IEP 83.1

Upapa wayenike abaphathi laba amandla okuthi abantu bevume izono zabo phambi kwabo njalo lawokuzithethelela. Lokhu kwaba yimbangela yobubi obalandelayo. Ngenxa yokuthanda imali, abaphathi laba babesebenzisana lezigebenga ezinkulu ezazihamba ziyekwenza ububi zithembe ukuthi zizathethelelwa kungabikhona ukujeziswa okwabangela ukuthi ububi bande elizweni. Abagulayo labaswelayo batshiywa ekuhluphekeni kwabo, ngoba izipho okwakumele zinikwe bona zaziphiwa abaphathi laba ababesethusela abantu bebatshela ukuthi babezakwehlelwa yibubi nxa bengalethanga iminikelo yabo kibo. Loba babeziveza njengabantu abaswelayo ngoba besithi batshiya konke ngesizatho sokuthi babefuna ukusebenzela uKrestu, kwasekusobala ukuthi abaphathi laba, babezithandela inotho ebuya ebantwini, isizwe sonke saqala ukuswela ngenxa yeminikelo eyayikhitshwa. Nxa babeqhubeka bephila impilo yenjabulo ngenxa yenotho abasebelayo, babethumela abantu abangelalwazi ukuthi bayefundisa abantu besenzela ukuthi bebadukise becabange ukuthi babengabantu abaswelayo abasebenzela uNkulunkulu. Loba kwakunjalo abaphathi laba baqhubeka bedukisa abantu bebafundisa ukuthi abantu bonke kwakumele bakhonze upapa, njalo banikele izipho zabo kubaphathi bebandla, njalo lokuthi ngokwenza konke lokhu babezangena ezulwini. {GC 83.2}IEP 83.2

Amadoda amanengi aqeqetshileyo ayezamile njalo ehluleka ukuveza imfundiso zamanga ezazifundiswa abantu, kodwa uWycliffe ngokunanzelela okukhulu, wabeka ihloka empandeni yobubi bonke, waveza ukuthi umbuso njalo lamandla ibandla elalizinika wona ayengaveli eBhayibhilini njalo kwakumele aqedwe. Abantu baqala ukukhulumisana ngodaba lolu esizweni sonke. Nxa abaphathi bebandla babeqhubeka befundisa abantu ukuthi kwakumele bathenge intethelelo, abantu abanengi basebeqala ukuzibuza ukuthi ngabe kwakumele bacele ukuthethelelwa kuNkulunkulu manqamu kumbe kupapa weRoma. Abantu abanengi baqala ukunanzelela ukuthi abaphathi laba babethanda imali njalo babengasuthiseki. Bathi bona: “ Abaphathi labapristi, bayasidla njengemvukuzane, uNkulunkulu kumele asikhulule, nxa kungenjalo abantu bazabhubha.”- (D’ Aubigne, b.17, ch.7). Nxa babezama ukuvala ububi babo, abaphathi laba babefundisa abantu ukuthi babelandela isibonelo sikaKrestu labafundi bakhe ngoba labo babephila ngeminikelo yabalandeli babo. Isizatho lesi senza ukuthi umsebenzi wabo ulimale, ngoba abantu abanengi baqala ukuzibalela ukuthi iBhayibhili lalifundisani, isiphetho esasingafunwa libandla leRoma. Ingqondo zabantu zathunganyelwa emthonjeni weqiniso ababeyenze imizamo yonke ukuthi ufihlwe. {GC 84.1}IEP 84.1

UWycliffe waqala ukubhala incwadi ezaziveza imfundiso zamanga ezazifundiswa ngabaphathi bebandla, hatshi ngoba wayefuna ukulwisana labo kodwa wayefuna ukudonsela inhliziyo zabantu eqinisweni elitholakala eBhayibhilini likaNkulunkulu onguye umlobi walo. Wafundisa ukuthi amandla kapapa wokuthethelela lokukhipha abantu ebandleni ayelingana lawomuntu wonke ngoba kwakungekho umuntu olamandla okukwenza konke lokhu ngaphandle kukaNkulunkulu. Yayingekho indlela edlula leyi eyokukhulula abantu emandleni ayefakwe ngupapa phezu kwabantu, ayebangela ukuthi izigidi zabantu zibeyizigqili ngaphansi kwebandla leRoma. {GC 84.2}IEP 84.2

UWycliffe wakhethwa ukuthi amele ilizwe lakhe ekulweni lamandla eRoma ayephezu kwesizwe sakibo, waqeda iminyaka emibili elizweni laseNetherlands elwisana labameli bakapapa emihlanganweni. Lapha waqala ukukhulumisana lababusi basemazweni aseFrance, laseSpain njalo labaseItaly, njalo wenelisa ukubona izinto ezazisenzeka ensitha ayengeke azibone nxa wayeseNgilandi. Wafunda izinto ezinengi ezazizaxhasa umsebenzi wakhe. Ebamelini bakapapa wafunda injongo yababusi baseRoma ngokuphelela kwayo. Wabuyela elizweni lakibo waqhubeka ngemfundiso yakhe ngomfutho omkhulu, eveza ukuthi ukunxwanela, lokuziphakamisa, lokudukisa kwakungabonkulunkulu baseRoma. {GC 84.3}IEP 84.3

Kweyinye yezincwadi zakhe, nxa wayebhala ngopapa labaphathi bakhe wathi: “Bayakhipha elizweni lethu umnotho wabantu abaswelayo, bathathe njalo inkulungwane zemali ezandleni zamakhosi, besithi yiminikelo yokuhambisa ivangeli, khona okuyimfundiso yamanga, njalo benza wonke amaKrestu amukele njalo akhulise limfundiso yamanga. Njalo loba ilizwe lethu belilentaba zegolide, kungekho omunye umuntu olembayo ngaphandle kwezithunywa zikapapa, ngokuhamba kwesikhathi igolide kuzamele liphele, ngoba uhlala ethatha imali elizweni lethu, njalo uthumela kuphela iziqalekiso zikaNkulunkulu ngenxa yezenzo zakhe.” —John Lewis, History of the Life and Sufferings of J. Wycliffe, page. 37. {GC 85.1}IEP 85.1

Ngemva kokubuyela kwakhe eNgilandi, inkosi yamnika esinye isikhundla sokuba ngumkhulu wedolobho laseLutterworth. Lokhu kwakuyibufakazi bokuthi inkosi yayithakazelela amaqiniso ayewakhuluma. Indonsela kaWycliffe yayisiqala ukubumba indlela okwakubuswa ngayo kanye lenkolo yesizwe sonke. {GC 85.2}IEP 85.2

Izikhali zikapapa zaqala ukujikelwa kuye. Kwathunyelwa izincwadi eNgilandi, lasezikolweni eziphezulu, lasenkosini, lakubaphathi bebandla, zonke zisitsho ukuthi kwakumele bathathe amanyathelo aqinileyo okuthulisa umtshumayeli lowu owayesenza okuphambene lentando kapapa. (Augustus Neander, General History of the Christian Religion and Church, period 6, sec.2, pt.1, par.8). Incwadi lezi zingakafiki amabhishopi ngenxa yamadlabuzane abo babizela uWycliffe phambi kwenkantolo yabo. Kodwa ababusi abakhulu ababili bahamba laye enkantolo, njalo labantu ababekhonapho lababengaphandle benza ukuthi abehluleli besabe, okwabangela ukuthi bamkhulule okwesikhatshana wahamba ngokuthula. Ngemva kwesikhatshana inkosi uEdward III (Wesithathu) onguye abaphathi bebandla ababezame ukuthi bamenze aphendukele uWyclffe esikhathini esasedlule wafa, kwabusa omunye walabo owayevikele uWycliffe endaweni yakhe. {GC 85.3}IEP 85.3

Kodwa ngemva kokufika kwezincwadi ezazivela kupapa eNgilandi, kwenziwa isinqumo sokuthi kwakumele kubotshwe wonke umuntu owayefundisa lokhu okwakuphambene lemfundiso yebandla leRoma. Isigwebo sakhona kwakuyikutshiswa kwabantu ababesenza lokhu. Kwabonakala sobala ukuthi ngesikhatshana uWycliffe wayezahlangana lochuku lweRoma. Kodwa lowo ofanayo endulo owathi, “Ungesabi...ngiyisihlangu sakho” (Genesis 15:1), waphinda njalo welula isandla sakhe wavikela inceku yakhe. Ukufa kwafika hatshi kuMvuseleli kodwa kupapa lowu owayefake umthetho lowu. UGregory XI (Wetshumi lanye) wafa, njalo bonke abaphathi ababebuthene bemele ukugwetshwa kukaWycliffe behlukana. {GC 86.1}IEP 86.1

Umusa kaNkulunkulu wabamba imimoya wavumela ithuba lokuthi umsebenzi weMvuselelo uqhubekele phambili. Ukufa kukaGregory kwalandelwa yikukhethwa kwabopapa ababili ababephikisana. Kwasekulababusi ababili ababephikisana futhi bonke babefuna ukukhonzwa. Omunye lomunye wayecela ukuthi amalunga ebandla amxhase emizameni yakhe yokulwisa omunye, esebenzisa uchuku kulabo ababemelana laye, njalo ngakolunye uhlangothi ethembisa umbuso wezulu kulabo ababezamsekela. Ukulwisana lokhu kwehlisa amandla ombuso waseRoma. Ukuqhubeka kokulwisana lokhu kwenza ukuthi uWycliffe athole ukuphumula okwesikhatshana. Ububi banda ebandleni nxa abopapa laba babeqhubeka besilwa. UWycliffe yena waqhubeka ngomsebenzi wakhe wokudonsela abantu kuJesu, yena oyiNkosi yokuthula, wabenza ukuthi basuse amehlo abo kubopapa. {GC 86.2}IEP 86.2

Ingxabano leyi eyayikhona lobubi obalandelayo yalungisa indlela yokuthi umsebenzi weMvuselelo uqhubekele phambili ngoba abantu basebethole ithuba lokubona umoya njalo lesimo sikapapa. Encwadini ayibhalayo ayibiza ngokuthi, Ingxabano yaboPapa, uWycliffe wakhuthaza abantu ukuthi bazibuze ukuthi abaphathi laba babengakhulumi iqiniso na nxa babenikana icala lokuthi omunye wayengumphikiKrestu. “ UNkulunkulu kavumanga ukuthi umkhohlisi abonakale kupapa oyedwa, kodwa...waletha ukwehlukana phakathi kwabo bobabili, esenzela ukuthi abantu benyama ngegama likaJesu bebanqobe bobabili.” — (R. Vaughan, Life and Opinions of John de Wycliffe, vol. 2, p.6). {GC 86.3}IEP 86.3

UWycliffe njengeNkosi yakhe uJesu Kristu watshumayela ivangeli ebantwini abaswelayo. Kazange asuthiseke ngokuthi ivangeli lifinyelele abantu ababehlala esigabeni sakhe kuphela kodwa wazimisela ukuthi lifenyelele umuntu wonke waseNgilandi. Ukufeza injongo yakhe, wakhetha iqula labatshumayeli, elalibunjwe ngabantu ababelokuzehlisa, lokuzidela, lababethanda iqiniso njalo ababengafuni lutho kuphela ukuhambisa ivangeli endaweni zonke. Amadoda lawa ayehamba efundisa endaweni zokuthengisa, emigwaqweni yamadolobho amakhulu, lasemaphandleni. Babedinga bonke abagulayo, abagugileyo, labaswelayo, bebavulela indaba ezimnandi mayelana lomusa kaNkulunkulu. {GC 87.1}IEP 87.1

Njengombalisi omkhulu kwezokholo esikolweni saseOxford, uWycliffe watshumayela ilizwi likaNkulunkulu ezikolweni eziphezulu. Wayechaza ngokwethembeka amaqiniso phambi kwabafundi bakhe okwaze kwabangela ukuthi bamnike ibizo elithi “udokotela wevangeli.” Kodwa umsebenzi wakhe owedlula yonke ayenzayo waba ngowokuloba iBhayibhili ngolimi lwesikhiwa. Encwadini yakhe ayibiza ngokuthi, Iqiniso leNgcazelo yeBhayibhili, wabhala ngesifiso sakhe sokuloba iBhayibhili ngolimi lwakibo, ukwenzela ukuthi umuntu wonke eNgilandi enelise ukuzibalela ngolimi lokuzalwa kwakhe, imisebenzi emihle kaNkulunkulu. {GC 87.2}IEP 87.2

Kodwa ngokuphazima kwelihlo umsebenzi wakhe wamiswa. Loba nje wayengakafiki iminyaka engamatshumi ayisithupha yokuzalwa, ukusebenza kwakhe nzima, lokulwa kanye lokuhlukunyezwa yisitha kwabangela ukuthi aguge masinyane. Wahlaselwa ngumkhuhlane oyingozi kakhulu. Umbiko wokugula kwakhe waletha intokozo enkulu enhliziyweni zabaphathi bebandla. Bacabanga ukuthi isikhathi sasesifikile esokuthi avume izono zakhe ayezenze phezu kwebandla, ngokunjalo bagijimela eceleni kombheda wakhe becabanga ukuthi babezamuzwa evuma izono lezi. Abaphathi bebandla, lababusi bomhlaba babuthana eceleni kwendoda leyi ababecabanga ukuthi igulela ukufa. “Ulokufa endebeni zakho” batsho kuye, “vumela ukuthi amaphutha akho athinte inhliziyo yakho, njalo uphike amazwi akho owawatshoyo ngathi asizwisa ubuhlungu.” UMvuseleli wabalalela ngokuthula, wasecela umongikazi owayemsiza ukuthi amvuse embhedeni, wabakhangela emehlweni, bona babemelele ukuzwa amazwi akhe wokuphika konke ayekufundisile, kodwa ngelizwi elilamandla, elalihlala libenza ukuthi baqhaqhazele wathi: “Ngeke ngife, kodwa ngizaphila, ngiphinde ngiveze ububi obenziwa ngabathungameli bebandla.” - (D’Aubigne, b. 17, ch. 7). Ngokumangala okukhulu bonke abathungameli bebandla baphuma belandelana endlini. {GC 87.3}IEP 87.3

Amazwi kaWycliffe agcwaliseka. Waphila waze wafaka ezandleni zabantu bakibo isikhali esilamandla okwedlula zonke ezazizalwisa amandla eRoma, lokhu wakwenza ngokubanika iBhayibhili, isithunywa esikhethwe lizulu ukukhulula abantu, lokukhanyisela njalo lokuvangela abantu bonke. Kwakukhona imigoqo eminengi eyayizabakhona engakenelisi ukuwuqeda umsebenzi lowu. UWycliffe wehlelwa yimikhuhlane eminengi kwabasobala kuye ukuthi wayelensuku ezinganganani ezokusebenza ezasezisele empilweni yakhe, wakhangela izitha okwakumele amelane lazo, kodwa ngokuqiniswa yizithembiso eziselizwini likaNkulunkulu waqhubekela phambili ngesibindi. Ngamandla ayenikwe ingqondo yakhe, lokujula kolwazi lwakhe ngenxa yohambo ayeseluhambile, wayegcinwe yisandla sikaNkulunkulu elungiselelwa umsebenzi lowu omkhulu owedlula yonke ayeyenzile. Nxa inkolo yonke yamaKrestu yayizungezwe yikulwisana, uMvuseleli endaweni yakhe yaseLutterworth, engelandaba lesiphepho esasivunguza ngaphandle, wazinikela emsebenzini ayewukhethelwe. {GC 88.1}IEP 88.1

Ekucineni umsebenzi lowu waphela, iBhayibhili lakuqala ngolimi lwesikhiwa laseliphelile. Ilizwi likaNkulunkulu laqala ukuvulwa elizweni laseNgilandi. UMvuseleli wayengasayesabi intolongo lokutshiswa ngomlilo. Wayesefake ezandleni zabantu bakibo isibane esasingasoke siphinde sicitshe. Ngokunika isizwe sakibo iBhayibhili, waseyenze umsebenzi omkhulu wokuqamula amaketane wokungazi lobubi, okwakuzaletha uzibuse ebantwini bakibo okwakusedlula zonke izimpi zenkululeko ababeke bazinqoba. {GC 88.2}IEP 88.2

Imitshina yokwenza amabhuku yayingakabi khona, lokhu kwenza ukuthi umsebenzi wokwenza amaBhayibhili uthathe isikhathi eside njalo ubenzima. Isifiso sokuthola iBhayibhili sasisikhulu kakhulu okwabangela ukuthi, abantu abanengi bahlanganele emsebenzini wokulenza, kodwa kwakunzima ukusuthisa inani labantu ababelifuna. Abanye balabo ababenothile babefuna ukuthenga iBhayibhili lonke elipheleleyo. Abanye babethenga ingxenye yalo. Endaweni ezinengi imuli zazihlanganyela ukuthenga iBhayibhili elilodwa. Ngale indlela iBhayibhili likaWycliffe laqala ukungena emizini yabantu. {GC 88.3}IEP 88.3

Ingqondo zabo zavuleka kwasuswa ukwethembela kupapa okwakubekwe kibo ngenxa yemfundiso yebandla. UWycliffe waqala ukufundisa imfundiso zesiKrestu, wafundisa ngosindiso oluvela kuKrestu kuphela ngokukholwa, njalo lokuthi ilizwi likaNkulunkulu yilolodwa elingaguqukiyo. Abatshumayeli ayebathumele endaweni zonke, benza umsebenzi wokuthengisa iBhayibhili, kanye lemibhalo yoMvuseleli ngokuphumelela okukhulu okwabangela ukuthi phose ingxenye yelizwe laseNgilandi yamukele iqiniso. {GC 89.1}IEP 89.1

Ukwanda kwamaBhayibhili kwahlupha abaphathi bebandla leRoma kakhulu. Manje basebemelane lebutho eledlula uWycliffe, ibutho ababengeke balehlule ngezikhali zabo zonke. Kwakungekho umthetho eNgilandi owawusenqabela ukuthengiswa kweBhayibhili ngoba lalingakaze libekhona ngolimi lwesikhiwa. Imithetho leyi yafakwa ngemva kwalesi isikhathi. Loba kwakunjalo, iBhayibhili laqhubeka lingena emizini yabantu loba nje abapristi babesenza yonke imizamo yokulenqabela. {GC 89.2}IEP 89.2

Abathungameli bakapapa, bazama futhi ukuthulisa ilizwi loMvuseleli. Wabizwa phambi kwenkantolo ezintathu ukuthi azokwahlulelwa, kodwa kwehlula ukuthi bamgwebe. Amabhishopi abeka umthetho wokuthi imibhalo yakhe yayiphambene lemfundiso zebandla leRoma, ngakho ngemva kokuhugela uRichard II (Wesibili) owayeyinkosi entsha ehlangothini lwabo, babeka umthetho wokuthi wonke umuntu owayekholelwa emfundisweni kaWycliffe kwakumele afakwe ejele. {GC 89.3}IEP 89.3

UWycliffe wadlulisela indaba leyi phambi kwephalamende, waveza ukuthi kwakumele kube lenguquko kususwe uchuku ibandla elalilwenza phezu kwesizwe sakibo. Ngamandla amakhulu waveza bonke ububi obabusenziwa ngupapa labaphathi bakhe. Lokhu kwabangela ukuthi izitha zakhe zidideke. Abangane bakaWycliffe babebanjwe ngamandla ukuthi bavume lokhu okwakukhulunywe ngabaphathi bebandla, njalo kwakulomcabango wokuthi uMvuseleli laye, njengoba wayesegugile, futhi engasela bangane wayezalahla imbeleko akhothamele amandla kapapa. Kodwa kulokuthi bathole lokhu abaphathi bebandla bazithola sebenqotshiwe. Iphalamende ngemva kokulalela amazwi kaWycliffe, yavotela ukuthi umthetho lowu owawufakwe ngamabhishopi ukhitshwe, uMvuseleli wathola inkululeko futhi. {GC 89.4}IEP 89.4

Ngokwesithathu walethwa futhi emthethwandaba, khathesi wayeselethwe enkantolo ephezu kwazozonke elizweni. Lapha kwakungekho usizi olwaluzaboniswa kulabo ababefundisa lokhu okwakuphambene lemfundiso zebandla. Lapha ngokokucina ibandla leRoma lalizanqoba, njalo umsebenzi woMvuseleli umiswe. Yikho abathungameli bebandla ababekucabanga. Nxa kwakungenzeka behluleke ukufeza injongo yabo, uWycliffe wayezabanjwa ngamandla ukuthi aphike imfundiso yakhe, bamthathe bayemtshisa emlilweni. {GC 90.1}IEP 90.1

Kodwa uWycliffe kazange akhiphe kumbe aphike lokhu ayekukholwa. Wabambelela ngamandla emfundisweni yakhe, wabeka icala kulabo ababemthonisisa. Wazikhohlwa yena, lalapho ayekhona, wabeka izitha zakhe phambi kwenkantolo engcwele, waveza zonke imfundiso zabo ezimbi eziqathanisa leqiniso lasezulwini. Amandla oMoya oyiNgcwele abonakala emhlanganweni lowu. Amandla kaNkulunkulu ehliselwa kubo bonke ababelalele. Kwakungathi babengaselawo amandla wokusuka kule indawo. Nxa imitshoko yamazwi eqiniso yayiphuma emlonyeni woMvuseleli ingena enhliziyweni zabo. Icala lokufundisa amanga ababelifake phezu kwakhe waliphendula ngamandla walibeka emakhanda abo. Wababuza ukuthi kwakungani beqhubeka befundisa amanga abo? Ngokufuna imali babezaqhubeka bethengisa umusa kaNkulunkulu na? {GC 90.2}IEP 90.2

“Licabanga ukuthi lilwisana lobani,” wababuza, “lilwisana lexhegu leli eselizazifela? Hatshi! Lilwisana leqiniso, iqiniso elilamandla okwedlula lina, njalo elizalehlula.”- (Wylie, b.2, ch.13). Ngemva kokutsho amazwi lawa waphuma enkantolo njalo kakho owabalesibindi sokumvimbela. {GC 90.3}IEP 90.3

Umsebenzi kaWycliffe wawusuzaphela, isibane seqiniso ayesithwale okwesikhathi eside esingaka, sasesiza phuma ezandleni zakhe, kodwa kwakusafanele ukuthi aqhubeke efakazela ivangeli. Iqiniso kwakufanele ukuthi litshunyayelwe esigodlweni semfundiso yamanga. UWycliffe wabizwa ukuthi azokuma enkantolweni kapapa ngokwakhe edolobheni laseRoma elalisaziwa ngegazi labangcwele elalichithwe kulo. Wayinanzelela ingozi eyayiphambi kwakhe, njalo wayezahamba kodwa wahlaselwa ngumkhuhlane engakahambi. Loba ilizwi lakhe lalingeke lifike eRoma, wakhetha ukubhala incwadi. Esendaweni yakibo uMvuseleli wabhalelela upapa incwadi, loba nje yayibhalwe ngomoya ohloniphayo wesiKrestu, yayigcwele amazwi alukhuni ayechaza ukuziphakamisa kukapapa. {GC 90.4}IEP 90.4

“Ngiyathokoza kakhulu,” wabhala, “ukuvulela njalo lokufundisa wonke umuntu ngenkolo engibambelele kuyo, ikakhulu upapa weRoma, engicabanga ukuthi ulolwazi njalo leqiniso, ngilethemba uzavumelana lalokho engikutshoyo kumbe nxa kungamanga uzakutsho njalo futhi. {GC 91.1}IEP 91.1

“Ngokokuqala, ngiyakholwa ukuthi ivangeli likaKrestu lingumzimba opheleleyo womlayo kaNkulunkulu...Ngibeka upapa weRoma, njengoba engumeli kaKrestu lapha emhlabeni, ukuthi kumele kube nguye okwedlula wonke umuntu olandela ivangeli likaKrestu. Ngokuba ukubamkhulu phakathi kwabalandeli bakaKrestu kwakungatsho inotho lezikhundla zomhlaba, kodwa ukulandela ngeqiniso impilo lesimo sikaKrestu...uKrestu ngesikhathi elapha emhlabeni, wayengumuntu ompofu okwedlula bonke, waphika njalo walahla konke ukubusa komhlaba kanye lenotho yawo... {GC 91.2}IEP 91.2

“Akekho umuntu okholwayo okufanele alandele amanyathelo kapapa kumbe loba yiwaphi amadoda angcwele, kodwa kumele alandele iNkosi uJesu Krestu, ngokuba uPetro lamadodana kaZebedee, ngokufisa ukuphakanyiswa kwasemhlabeni, okwakuphambene lokulandela amanyathelo kaKrestu, balahleka, ngakhoke emanyathelweni lawa wokwenza iphutha akumelanga balandelwe... {GC 91.3}IEP 91.3

“Upapa kumele atshiye amandla okubusa ezandleni zababusi basemhlabeni, njalo atshele bonke abaphathi bebandla ukuthi benze ngokufanayo, ngoba yikho uKrestu akwenzayo, ikakhulu esebenzisa abafundi bakhe. Ngakhoke nxa kusenzeka ukuthi ngenze iphutha ngalokhu esengikuvezile, ngizazehlisa ngamukele ukuqondiswa, langokufa nxa isidingo salokho sikhona, njalo nxa bekungenziwa ngokwentando yami bengizazibuyela ngime phambi kapapa weRoma, kodwa iNkosi ingethekelele ngenye indlela, njalo ingifundisile ukuthi kumele ngihloniphe uNkulunkulu okwedlula abantu.” {GC 91.4}IEP 91.4

Emaphethelweni wathi: “Asithandazeni kuNkulunkulu wethu, ukuthi ahole uPapa wethu uUrban VI (Wesithupha), njengoba eqala umsebenzi, ukuthi yena labaphathi bakhe bebandla balandele iNkosi uJesu Krestu ngokwempilo langokwezenzo, njalo lokuthi bengafundisa abantu ngokuthembeka, lokuthi labantu bengabalandela ngendlela efanayo.” — (John Foxe, Acts and Monuments, vol.3, pp 49,50). {GC 92.1}IEP 92.1

Ngale indlela uWycliffe wabeka phambi kapapa labaphathi bebandla, ukuzehlisa lokuzithoba kukaKrestu, wabeka sobala hatshi phambi kwabo kuphela kodwa laphambi kwamaKrestu wonke umehluko phakathi kaKrestu lalaba ababesithi bangabameli bakhe emhlabeni. {GC 92.2}IEP 92.2

UWycliffe wayelethemba eligcweleyo lokuthi umphefumulo wakhe wawuzaba yintengo yokuthembeka kwakhe. Inkosi lopapa kanye lababhishopi babemoya munye ngokufuna ukuthatha umphefumulo wakhe, njalo kwakusobala ukuthi kwakungeke kudlule inyanga ezimbalwa engatshiswanga. Kodwa isibindi sakhe sasinganyikinyezwanga. “Kungani likhuluma ngokuthola umqhele wokufela iqiniso okhatshana? “Tshumayelani ivangeli likaKrestu phambi kwabapristi, njalo ukufela iqiniso ngeke kulikhuthe. Lithini! Kumele ngiphile njalo ngithule? ... Ngeke! Okuzayo akuze, ngikulindele ukuza kwakho.”- (D’ Aubigne, b. 17, ch.8). {GC 92.3}IEP 92.3

Kodwa isandla sikaNkulunkulu saqhubeka sivikela inceku yakhe. Indoda leyi okwempilo yayo yonke eyayimele iqiniso ngesibindi, loba wayefake impilo yakhe engozini nsuku zonke, wayengeke awele phakathi kwenzondo yezitha zakhe. UWycliffe wayengakaze enze imizamo yokuzivikela yena, kodwa uNkulunkulu wayemvikelile, njalo kathesi, nxa izitha zakhe zasezicabanga ukuthi sezimtholile, isandla sikaNkulunkulu samsusa samfaka lapho ababengeke bamfinyelele khona. Ebandleni lakhe endaweni yaseLutterworth, nxa wayeselungiselela ukunika isidlo, wahlaselwa ngumkhuhlane, ngemva kwesikhathi esifitshane wafa. {GC 92.4}IEP 92.4

UNkulunkulu wayemkhethile uWycliffe ukuthi ayenze umsebenzi wakhe. Wayefakile ilizwi lakhe emlonyeni wakhe, njalo wafaka uthango eduze kwakhe ukwenzela ukuthi ilizwi leli lifinyelele abantu. Impilo yakhe yayivikelekile, lomsebenzi wakhe welulwa, kwaze kwafika isikhathi lapho isisekelo somsebenzi omkhulu weMvuselelo esasesibekwe khona. {GC 92.5}IEP 92.5

UWycliffe wayephume phakathi kwesikhathi sobunyama obukhulu. Kwakungekho ababehambe phambi kwakhe ayenga funda kibo indlela okwakumele aqhube ngayo umsebenzi wakhe wemvuselelo. Wayevuswe njengoJohane umbhabhathizi ukuthi afeze umsebenzi oqakathekileyo, wayengumsunguli wesikhathi esitsha. Loba kwakunjalo emaqinisweni wonke awafundisayo kwakulokuvumelana lokuphelela okwabangela ukuthi abaVuseleli abalandelayo bengenelisi ukufika ezingeni leli ayefike kulo. Isisekelo sasibekwe satshona futhi sababanzi, njalo insika yakhona yayakhiwe yaqina kangaka, okwabangela ukuthi kungabilendingeko yokuthi yakhiwe futhi yilabo abeza ngamuva kwakhe. {GC 93.1}IEP 93.1

Inkolo enkulu eyaqalwa nguWycliffe, eyayizakhulula umzwangedwa wabantu njalo lemicabango yabo, njalo eyayizakhulula izizwe ezazingaphansi kombuso weRoma, yayiphume eBhayibhilini. Lapha yikho okwakulomthombo wesifula sezibusiso, njengamanzi eqiniso esigelezayo kuze kube lalamuhla kusukela endulo. UWycliffe wamukela iMbhalo eNgcwele ngokukholwa okukhulu njengelizwi eliphefumulelweyo eliveza intando kaNkulunkulu, njalo walenza umgomo opheleleyo wokukholwa njalo lokuphila. Ekukhuleni kwakhe wayefundisiwe ukuthi kwakumele alandele ibandla leRoma njegebandla elingcwele njalo elalingeke lenze amaphutha, njalo lokuthi kwakufanele amukele kungekho imbuzo imfundiso lamasiko ayebekhona okwenkulungwane zeminyaka, kodwa wakufulathela konke lokhu walalela ilizwi elingcwele likaNkulunkulu. Lawa kwakuyiwo amandla afundisa abantu ukuthi bewalalele. Kulokuthi balalele ibandla elalikhuluma ngomlomo kapapa, wafundisa ukuthi ilizwi okwakumele lilalelwe njalo eliveza intando kaNkulunkulu yilelo elaliphuma eBhayibhilini. Njalo kafundisanga kuphela ukuthi iBhayibhili yilo kuphela eliveza intando kaNkulunkulu, wafundisa futhi ukuthi uMoya oNgcwele yiwo kuphela ochasisela abantu ilizwi likaNkulunkulu, njalo wonke umuntu kwakufanele azifundele yedwa alizwisise ngokuthunganyelwa nguMoya. Ngale indlela wenelisa ukususa ingqondo zabantu kupapa lasebandleni leRoma wabakhomba elizwini likaNkulunkulu. {GC 93.2}IEP 93.2

UWycliffe wayengomunye wabaVuseleli abakhulu. Ngokujula kolwazi, langokucaca kwemicabango yakhe, langesibindi sokumela iqiniso, lesokulivikela, balutshwana abafika ezingeni lakhe kulabo abamlandelayo. Ukubamsulwa kwempilo, lokujula kokubala lokusebenza kwakhe, lobuqotho obungayekethisiyo, lothando olufana lolukaKrestu, lokuthembeka ekwenzeni umsebenzi wakhe, konke lokhu kwakubumba isimo soMvuseleli wakuqala. Konke lokhu wakwenza ngesikhathi sobunyama kwezenkolo lakwezemfundo ayekhule phakathi kwakho. {GC 94.1}IEP 94.1

Isimilo sikaWycliffe siyibufakazi bendlela uMbhalo oNgcwele ofundisa ngayo njalo oguqula ngayo isimilo somuntu. IBhayibhili yilo elamenza ukuthi abeyilokhu abayikho khona. Imizamo yokuzwisisa amaqiniso esiwambulelweyo, iletha ubutsha lamandla kuzo zonke izigaba zempilo. IBhayibhili lenza ukuthi ingqondo ibebanzi, lokuqedisisa kuyalolongwa njalo lijulisa lamandla wokwenza izinqumo. Ukufundwa kweBhayibhili kulolonga yonke imicabango, lemizwa kanye lenjongo okwedlula konke okufundwayo. Linika ukuhlaliseka kwenjongo, lokubekezela, lesibindi, lokubambelela, liyalolonga isimilo njalo lingcwelise umphefumulo. Ukubalwa kweBhayibhili ngokuzimisela lokuzithoba, okusondeza ingqondo yalowo obalayo duze lengqondo engelamkhawulo, bekuzanika umhlaba amadoda alokuqedisisa, lokuzithoba, okwedlula konke okukekwalethwa yimfundo yasemhlabeni. “Ukwambulwa kwamazwi akho kuyakhanyisa, kuyahlakaniphisa abayizithutha.” (Amahubo 119: 130). {GC 94.2}IEP 94.2

Imfundiso ezazilethwe nguWycliffe zaqhubeka zisabalala okwesikhathi eside, abalandeli bakhe, ababesaziwa njengamaWycliffites lamaLollards, batshumayela phakathi kwelizwe lakibo njalo baphumela ngaphandle kweNgilandi behambisa ivangeli leqiniso kwezinye indawo. Nxa abatshumayeli babenanzelela ukuthi umthungameli wabo wayesebatshiyile, batshumayela ngamandla ayedlula wonke ababeke bawasebenzisa, njalo abantu abanengi babesiza bezolalela lokhu ababekufundisa. Abantu abanye abasendlini yesikhosini okwakugoqela indlovukazi labo baphenduka babangamakholwa. Endaweni ezinengi kwabalemvuselelo enkulu ekuziphatheni kwabantu, izithixo zaseRoma zasuswa emabandleni. Kodwa masinyane isiphepho sokuhlukumeza sehlela labo ababekhethe ukwamukela iBhayibhili njengomholi wabo. Ababusi belizwe laseNgilandi, ngokufuna kwabo ukuqinisa ubudlelwano babo lombuso waseRoma, abazange bathandabuze ukunikela abaVuseleli. Ngokokuqala embalini yelizwe laseNgilandi isigwebo sokutshiswa ngomlilo sabekwa phezu kwalabo ababengabafundi bevangeli. Ukubulawa kwabantu bebulawelwa iqiniso kwabayinjwayelo. Bonke ababemela iqiniso bahlukunyezwa bazwiswa ubuhlungu, into eyodwa ababengayenza yikukhala endlebeni zikaNkulunkulu. Loba nje babezingelwa njengabahlamuki ebandleni njalo labathengisi besizwe, baqhubeka betshumayela endaweni ezifihlakeleyo, bathola ukuphepha emizini yabantu abaswelayo, njalo kwezinye izikhathi babecatsha embalwini lasezixukwini. {GC 94.3}IEP 94.3

Loba nje ukuhlukunyezwa lokubulawa kwabantu kwakukhona, ukuphikiswa kwemfundiso yeRoma kwaqhubeka ngokubekezela langokuzehlisa okweminyaka eminengi. AmaKrestu ayephila ngalesi isikhathi ayelokuzwisisa okuncane mayelana leqiniso, kodwa babefundile ukuthanda njalo lokulandela ilizwi likaNkulunkulu, njalo ngokubekezela bazimisela ukulihluphekela. Njengabalandeli bakaJesu ngezikhathi zabafundi, inengi labo ladela inotho yomhlaba ngenxa yokuthanda kwabo uJesu. Labo ababevunyelwe ukuhlala emizini yabo bathokozelela ukuvula iminyango yabo banika abazalwane babo indawo yokuhlala ababethathelwe imizi yabo, kwathi nxa kwakufika isikhathi sokuthi labo bathathelwe eyabo imizi, bajabulela ukuthi basebezaphila impilo yomhambuma ngenxa yegama likaJesu. Kuliqiniso ukuthi inkulungwane zabantu ngenxa yokwesaba ukuhlukunyezwa lokufuna ukuthola inotho, badela ukholo lwabo bakhululwa entolongweni, benziwa ukuthi bahambe ezindaweni ezitshiyeneyo begqoke izembatho zasentolongweni betshela abantu ukuthi babexolisa ngalokhu ababekufundisile okwakuphambene lemfundiso yebandla. Nomakunjalo, lalingekho lincane iqula lalabo abama ngesibindi balwela iqiniso, kwakugoqela ababusi labesikhosini, abazimisela ukuthi loba babephoselwe emigodini abanye betshiswa ngomlilo, bakuthatha njengokuphakanyiswa ukuthi bahluphekele ivangeli likaKrestu. {GC 95.1}IEP 95.1

Abathungameli bebandla babehlulekile ukwenza intando yabo phezukaWycliffe nxa wayesaphila, njalo inzondo yabo ayizange isuthiseke nxa wayeselele ethuneni. Kwabekwa umthetho emhlanganweni owenziwa endaweni yaseConstance, ngemva kweminyaka engamatshumi amane efile, kwathiwa amathambo akhe kwakumele atshiswe phambi komuntu wonke, ngemva kwalokho baphosela umlotha wawo esifuleni esasiseduze. Nxa omunye umlobi omdala ebhala uthi, “isifula lesi, sasigelezela emfuleni uAvon, uAvon wayehlangana lomfula uSevern, yena echithela olwandle oluncane, olwaluchithela olwandle olukhulu. Ngale indlela umlotha wamathambo kaWycliffe angumfanekiso wemfundiso yakhe, esigcwele umhlaba wonke. — (T. Fuller, Church History of Britain, b. 4, sec. 2, par.54). Izitha zakhe azizange zinanzelele ukuthi izenzo zabo ezimbi zazilomutsho omkhulu. {GC 95.2}IEP 95.2

Kwakungenxa yemimbhalo kaWycliffe okwabangela ukuthi abantu abafana labo John Huss waseBohemia bakhethe ukumelana lemfundiso zamanga ezazivela ebandleni leRoma bangena labo emsebenzini wokuvuselela. Ngokunjalo emazweni lawa omabili ayekude nakude inhlanyelo yeqiniso yamila. Kusukela elizweni laseBohemia umsebenzi wokuvuselela wangena kwezinye indawo. Inqondo zabantu zathunganyelwa elizwini likaNkulunkulu okwasekukade lakhohlakala. Isandla esingcwele sasilungisa indlela yeMvuselelo eNkulu eyayizalandela. {GC 96.1}IEP 96.1