Isahluko 30—Ubutha Phakathi Komuntu LoSathane.

“Ngizafaka ubutha phakathi kwakho lowesifazana, laphakathi kwenzalo yakho lenzalo yakhe, izakucobodisa ikhanda lakho, njalo wena uzakuhluzula isithende sakhe.” Genesisi 3:15. Isigwebo esabekwa nguNkulunkulu phezu kaSathane ngemva kokuwa komuntu sasiyisiprofethi njalo esasigoqela izizukulwane zonke kuzekuyefika ekupheleni kwesikhathi njalo kwakuveza impi enkulu eyayizakwehlela yonke imihlobo yabantu ababezaphila emhlabeni. {GC 505.1}IEP 505.1

UNkulunkulu uthi: “Ngizafaka inzondo.” Inzondo leyi ayizibuyeli yodwa ngemva kokuzalwa komuntu. Nxa umuntu wayeseyephule umlayo kaNkalunkulu, isimo sakhe saguquka saba ngesokona, njalo waqala ukuba moya munye loSathane. Ngokwenyama lokuzalwa akulanzondo ekhona phakathi kwezoni lomqali wesono. Bonke bobabili baqala ukuba yizoni ngenxa yokuhlamukela intando kaNkulunkulu. Lowo ohlamukayo katholi ukuphumula, ngaphandle kokuthi athole uzwelo njalo lokusekelwa ngokuhugela abanye ukuthi balandele umzekeliso wakhe. Ngenxa yalesi isizatho ingilosi ezawayo ndawonye labantu ababi bayabambana ebunganini obuyize. Ngabe uNkulunkulu wayengangenelanga ngendlela angenela ngayo, uSathane labantu babezabambana bahlamukele izulu, njalo kulokuthi abantu bathakazelele inzondo phakathi kwabo loSathane, imuli yonke yoluntu yayizabambana ukuba iphikisane loNkulunkulu. {GC 505.2} IEP 505.2

USathane walinga umuntu ukuthi awone, ngendlela efana laleyo ayebangele ukuthi ingilosi zihlamuke ngayo, ngale indlela ukuze athole ukuxhaswa ekulweni kwakhe leZulu. Kwakungekho ukungazwisisani phakathi kwakhe lengilosi ezawayo mayelana lendlela ababezonda ngayo uKrestu, loba nje ezintweni ezehlukeneyo kwakukhona ukungavumelani, kodwa babelokubambana emsebenzini wabo wokuphikisa amandla oMbusi womhlaba wonke. Kodwa nxa uSathane wayesizwa ukuba kwakuzaba khona ubutha phakathi kwakhe lowesifazana, laphakathi kwenzalo yakhe lenzalo yowesifazana, kwabasobala kuye ukuthi imizamo yakhe eyokungcolisa isimo somuntu yayizamiswa ngelinye ilanga ngoba wananzelela ukuthi kwakuzaba lendlela yokuthi umuntu ayenelise ukumelana lamandla wakhe. {GC 505.3}IEP 505.3

Inzondo uSathane alayo phezu koluntu seyabaselwa ngenxa yokuthi ngoKrestu sebeyizidalwa okuboniswa kuzo uthando lokuNkulunkulu njalo lesihawu sakhe. Kuyisifiso sakhe ukuba aphambanise icebo lezulu elokuhlengwa kwabantu, lokungcolisa ibizo likaNkulunkulu, ngokuguqula njalo lokuphambanisa imisebenzi yezandla zakhe, ngoba efuna ukuletha usizi ezulwini njalo lokuba agcwalise umhlaba usizi njalo lokufa. Njalo ubeka phezu kukaNkulunkulu icala lobubi bonke abulethileyo emhlabeni ngenxa yokuthi nguye owadala umuntu. {GC 506.1}IEP 506.1

Kungenxa yomusa uKrestu awuhlanyela enhliziyweni zabantu obangela ukuthi kubelenzondo phakathi kwabo loSathane. Nxa umusa lamandla lawa avuselelayo kungekho, umuntu ubezaqhubeka eyisigqili sikaSathane, isigqili ebesizahlala silungele ukwenza intando yakhe. Kodwa amandla lawa amatsha enhliziyweni adala impikiswano lapho obekulokuthula khona ngaphambilini. Amandla lawa avela kuKrestu yiwo ayenza ukuthi umuntu anqobe izilingo zomubi. Lowo lalowo obonakala ezonda isono endaweni yokuthi asithande, lalowo olwisana njalo lonqoba imizwa yokona ebikade ibusa empilweni yakhe, uyabonisa ukusebenza kwamandla avela phezulu kuphela. {GC 506.2}IEP 506.2

Ubutha obukhona phakathi komoya kaKrestu lomoya kaSathane wavezwa sobala endleleni umhlaba owamukela ngayo uKrestu lapha emhlabeni. Kwakungasiso isizatho sokuthi kabuyanga ngokuziphakamisa njalo lokubonisa inotho okwabangela ukuthi amaJuda amphike. Bakunanzelela ukuba wayelamandla ayesenelisa ukuthatha indawo yalokho angazange akubonise ngokwempilo yakhe yangaphandle. Kodwa ukulunga lokubamsulwa kukaKrestu yikho okwaletha phezu kwakhe inzondo yomhlaba. Impilo yakhe yokuzidela leyokungoni yayingamukeleki ebantwini abazigqajayo njalo labalandela inkanuko yemizimba yabo ngoba yayibabonisa ububi babo. Yikho lokhu okwabangela inzondo ababelayo ngeNdodana kaNkulunkulu. USathane ndawonye lengilosi ezimbi babambana labantu ababi. Onke amandla okuhlamukela iqiniso abamoya munye emsebenzini wokulwisa iNkosana yamaqiniso. {GC 506.3}IEP 506.3

Inzondo efanayo iboniswa phezu kwabalandeli bakaKresu ngendlela eyaboniswa phezu kweNkosi yabo. Lowo onanzelela ububi besono, njalo ngamandla avela phezulu onqoba izilingo, kasoke aphuthe ukuvusa inzondo kaSathane njalo leyezisebenzi zakhe. Inzondo yemfundiso yeqiniso lokuphikiswa lokuhlukunyezwa kwalabo abamela iqiniso, kuzaqhubeka kukhona ngazo zonke izikhathi isoni kanye lezoni nxa zisasekhona emhlabeni. Abalandeli bakaKrestu njalo lenceku zikaSathane akwenzakali ukuthi babemoya munye. Inzondo ebangelwa yikuthwala isiphambano ayikami lalamuhla. “Bonke abazaphila impilo yobungcwele kuKrestu bazadlula phakathi kokuhlukunyezwa.’ 2 Timothi 3:12. {GC 507.1}IEP 507.1

Inceku zikaSathane zihleli zisebenza ngaphansi kobukhokheli bakhe ngoba zifuna ukukhulusa amandla akhe njalo lokwakha umbuso wakhe oyiwo olwisana lombuso kaNkulunkulu. Kungenxa yalokho okubangela ukuthi basebenzele ukudukisa abalandeli bakaKrestu njalo lokuthi babahuge ukuze bamhlamukele. Njengomholi wabo bayahlanekela njalo baguqule amazwi eBhayibhili ukwenzela ukuthi bafeze inhloso yabo. Ngendlela uSathane azama ngayo ukungcolisa ibizo likaNkulunkulu, ngokunjalo abalandeli bakhe bahlala bedinga amacebo okungcolisa ibizo labantwana bakaNkulunkulu. Umoya ofananayo owabangela ukubulawa kukaKrestu uholela ababi ukuba babulale abalandeli bakhe. Konke lokhu kuveziwe emazwini esiprofethi awokuqala: “Ngizafaka ubutha phakathi kwakho njalo lowesifazana, njalo laphakathi kwenzalo yakho lenzalo yakhe.” Njalo lokhu kuzaqhubeka kuze kube sekupheleni. {GC 507.2}IEP 507.2

USathane uqhubeka eqoqa ibutho lakhe njalo usebenzisa wonke amandla akhe ekuhlaseleni akwenzayo. Kungani engahlangani labantu abazama ukumlwisa kakhulu na? Kungani amabutho kaKrestu elele njalo enganaki isimo abakiso na? Kungenxa yokuba balobudlelwano obuqotho loKrestu obuncinyane, njalo abalawo uMoya wakhe. Isono emehlweni wabo asenyanyeki njalo asisilo ihlazo phambi kwabo ngendlela esasibonakala ngayo phambi kweNkosi yabo. Abahlangani laso ngokuzimisela okwenziwa nguKrestu, langokulwisa okulenhloso yokungafuni ukuwa. Abananzeleli ububi besono njalo lobubanzi bokungcola kwaso, njalo amehlo wabo afiphele ukuba babone isimo saso njalo lamandla enkosi yobumnyama. Kulobutha obungatsho lutho phakathi kwabo loSathane lemisebenzi yakhe, ngoba kulokungaqedisisi amandla lobubi njalo lobukhulu bokulwisa uKrestu lebandla lakhe akwenzayo. Inengi labantu likhohlisiwe ngaleso sizatho. Abakwazi ukuthi isitha sabo singumkhulu webutho omkhulu owenelisa ukulawula ingqondo zezingilosi ezawayo, lokuthi usebenzisa amaqhinga lamacebo alobungcitshi obukhulu ekulweni loKrestu ngenxa yenhloso yokwenqabela ukuba abantu basindiswe. Phakathi kwabantu abazibiza ngokuthi bangamaKrestu ngitsho laphakathi kwabafundisi, kukalutshwana ukuzwa kukhulunywa ngoSathane, kuphela nxa ibizo lakhe lingene phakathi kwentshumayelo nje. Ubufakazi bokubakhona njalo lokuphumelela kwakhe abunakwa, izixwayiso zobuqili bakhe aziqakathekiswa, njalo indlela abenza ngayo ibonisa ukuthi sebakhohlwa ukuthi ukhona emhlabeni. {GC 507.3}IEP 507.3

Nxa abantu belokhe beqhubeka bengananzeleli amaqhinga wakhe, isitha lesi esingalaliyo sihlala sisendleleni yabo ngezikhathi zonke. Ubakhona kuzo zonke izigaba zemuli, kuyo yonke imigwaqo emadolobheni, emabandleni wonke, emihlanganweni yelizwe, emthethwandaba, elinga njalo ehuga, kuzo zonke indawo uhlala engcolisa impilo njalo lemzimba yamadoda, labesifazane, labantwana, uyabhidliza izimuli, uhlanyela inzondo, ukulungisela, izimpi, ubugovu, njalo lokubulalana. Ngesikhathi esifanayo amaKrestu amukela lezi izinto sengathi uNkulunkulu nguye ohlelileyo ukuba zenzakale. {GC 508.1}IEP 508.1

USathane ngazo zonke izikhathi uhlala esenza amaqhinga okunqoba abantwana bakaNkulunkulu ngokwephula imiduli lothango olubahlukanisa lomhlaba. Abantwana bakoIsrayeli endulo baholelwa esonweni ngemva kokubambana labezizwe okuyinto ababetshelwe ukuba bangayenzi. UIsrayeli walamuhla laye uholelwa ekulahlweni ngendlela efanayo. “Unkulunkulu walesisikhathi uphumputhekisile ingqondo zabangakholwayo, ukuze kungakhanyi kibo ukukhanya kwevangeli lenkazimulo kaKristu, ongumfanekiso kaNkulunkulu.” 2 Khorinte 4:4. Bonke abangasibo abalandeli bakaKrestu beqiniso bayizisebenzi zikaSathane. Enhliziyweni engaphendukanga kulothando lwesono njalo lendonsela yokusikholisa njalo lokusikhulumela lokusivikela. Enhliziyweni esiphendukile kulenzondo yesono lokuzimisela okukhulu ekwenzeni imizamo yokusinqoba. Nxa amaKrestu ekhetha ukwakha ubudlelwano labantu abangakhonziy labangakholwayo, bazifaka engozini yokulingwa. USathane uyazifihla ukuba angabonakali njalo kancane kancane uyafiphalisa amehlo abo ukuze bengananzeleli imijibila yakhe. Ubenza bangananzeleli ukuba ubudlelwano obunjalo budalelwe ukubalimaza njalo ngesikhathi esifanayo bayabe beguqulwa ukuba bafane lomhlaba ngokwesimo sabo, langamazwi abawakhulumayo, njalo langezenzo, okubangela ukuba baqhubeka besiba yiziphofu kokwakomoya. {GC 508.2}IEP 508.2

Ukulandela inkanuko zomhlaba kubangela ukuba ibandla liphendukele emhlabeni, akwenzeki ukuthi kuphendulele umhlaba kuKrestu. Ukujwayela isono ekucineni kubangela ukuthi isono sicine singasabonakali sisenyanyeka. Lowo okhetha ukwakha ubudlelwano lezisebenzi zikaSathane ekucineni ulahlekelwa yikwesaba inkosi yabo. Nxa ngesikhathi sisemsebenzini sifakwa ngaphansi kokuvivinywa, ngendlela uDanyeli afakwa ngayo esigodlweni senkosi, singaba lesiqiniseko sokuthi uNkulunkulu uzasivikela, kodwa nxa sizifaka ngaphansi kwezilingo sizakuwa kuphela ekucineni. {GC 509.1}IEP 509.1

Umlingi wandise ukuphumelela kakhulu nxa esebenzisa abantu abangacatshangelwayo ukuthi bangaphansi kwamandla wakhe. Abantu abafundileyo kakhulu njalo labalezipho ezingajwayelekanga bandise ukuhlonitshwa lokuthandwa ngabantu, sengathi izipho lezi zingavala isikhexe sokungamesabi uNkulunkulu kumbe lokuthi zingabangela ukuthi bamukeleke phambi kwakhe. Izipho lendlela abantu abaziphatha ngayo nxa kukhangelwa kumi kodwa, kuyimizekeliso yezipho ezivela kuNkulunkulu, kodwa nxa lokhu kusenziwa ukuthi kuthathe indawo yokulunga, nxa kulokuthi kusetshenziswe ukuletha inhliziyo eduze loNkulunkulu, kubangela ukuthi abantu baholelwe khatshana laye, ekucineni abantu bakhona baphenduka babe yisinengiso njalo lemijibila yomubi. Kulomcabango osengqondweni zabanengi owokuthi konke okuhambelana lokulunga njalo lokuphatha kahle abantu kufanele kube kuvela kuKrestu. Akukaze kube lephutha elikhulu okwedlula leli. Kuliqiniso ukuthi zonke lezi izinto kumele zitholakale kuwo wonke amaKrestu, ngoba zingaletha indonsela elamandla amakhulu enkolweni yeqiniso, kodwa kufanele zinikelwe kuNkulunkulu, ngoba zilamandla okusetshenziswa kokubi. Amadoda amanengi akhaliphileyo njalo alezimilo ezilolongiweyo, abangenzi izenzo ezazakalayo ukuthi azilunganga, atholakala eyizisebenzi zakaSathane ezilolongiweyo. Isimilo sakhe esifihlakeleyo njalo lendonsela alayo yenza ukuthi abeyisitha sombuso kaKrestu esiyingozi kakhulu kulalabo abangelakho okubukekayo ngabo. {GC 509.2}IEP 509.2

Ngomkhuleko oqotho njalo lokwethemba uNkulunkulu kuphela, uSolomoni wamukela inhlakanipho eyamangalisa njalo leyayifiswa ngumhlaba wonke. Kodwa wathi esefulathele umthombo wamandla wakhe, njalo waqhubeka ngempilo yokuzithemba yena, kwaba lula ukuthi awele esonweni. Ngemva kwalokho ukuhlanakipha konke lamandla ayenikwe inkosi eyayilokuhlakanipha okwedlula zonke, kwabangela ukuthi abe yisikhali esesabekayo esandleni sikaSathane. {GC 509.3}IEP 509.3

Loba nje uSathane ehlala esebenzela ukufiphalisa ingqondo zamaKrestu ukuthi zingakunanzeleli lokhu, amaKrestu awangakhohlwa ukuthi “kasibindani legazi lenyama, kodwa lemibuso lamandla, lababusi balumhlaba wobumnyama balesisikhathi, labomoya ababi endaweni eziphezulu.” Efesu 6:12. Amazwi okulimukisa ezwakala kusukela endulo esiza esikhathini sethu athi: “Qondani lilinde ngoba isitha senu uSathane, siyazula njengesilwane esibhongayo sidinga esingamginya.” 1 Phetro 5:8. “Hlomani izikhali zonke zikaNkulunkulu ukuze libe lamandla okumelana lobuqili bukaSathane.” Efesu 6:11. {GC 510.1}IEP 510.1

Kusukela ensukwini zika Adamu kusiyafika esikhathini sethu, isitha sethu esikhulu silokhe sisebenzisa amandla waso ukugqilaza njalo lokubulala abantu. Khathesi ulungiselela umkhankaso wakhe wokucina azawuqondisa ebandleni. Bonke abazama ukulandela uJesu bazangena phakathi kwempi enkulu lesitha lesi esingadeliyo. UmKrestu nxa eqhubeka esakha isimo esiseduzane laleso esikhangelelwe lizulu, yikho lapho azifaka khona egcekeni ukuba ahlaselwe nguSathane. Bonke abaphatheke emsebenzini kaNkulunkulu, njalo abasebenzela ukuveza amaqhinga kaSathane njalo lokuveza uKrestu phambi kwabantu, bazakwenelisa ukuba lengxenye ebufakazini bukaPhawuli, lapho akhuluma khona ngokusebenzela iNkosi ngokuzehlisa konke okwengqondo, langenyembezi ezinengi njalo lezilingo. {GC 510.2}IEP 510.2

USathane wahlasela uKrestu ngezilingo ezesabeka okwedlula zonke njalo lezibonisa ubugcitshi bakhe bonke, kodwa ngazo zonke izikhathi uKrestu wamninela khatshana. Izimpi lezi zaliwa endaweni yethu, ukunqoba kwakhe konke kwenza ukuba lathi senelise ukunqoba. UKrestu uzanika amandla bonke abawadingayo. Akulamuntu ngaphandle kokuthi azivumele yena onganqotshwa nguSathane. Umlingi kalawo amandla okulawula amandla okukhetha kwethu kumbe okusibamba ngamandla ukuthi sone. Usengazwisa ubuhlungu benhliziyo, kodwa ngeke adonge ukubamsulwa kwethu. Usengadabula inhliziyo kodwa ngeke angcolise. Isizatho sokuthi uKrestu sewanqoba kumele sinike abalandeli bakhe amadlabuzane wokulwa ngesibindi impi ekhona phakathi kwabo lesono kanye loSathane. {GC 510.3}IEP 510.3