Isahluko 19—Ukukhanya Phakathi Kobunyama

Umsebenzi kaNkulunkulu emhlabeni kusukela endulo uveza izehlakalo ezihambelanayo kuyo yonke imvuselelo enkulu esike yenzakala kumbe ekuvusweni kwequla lamakholwa elithile. Indlela uNkulunkulu asebenza ngayo labantu iyafanana. Izehlakalo eziqakathekileyo ezenzakala khathesi zihambelana lalezo ezayenzakala endulo, njalo uhambo lwebandla lasendulo luletha izifundo ezimqoka ebandleni lalamuhla. {GC 343.1}IEP 343.1

Akula elinye iqiniso elivezwe sobala eBhayibhilini eledlula leli elokuthi uNkulunkulu ngokusebenzisa uMoya wakhe oyiNgcwele nguye othungamela inceku zakhe ekuhambiseni umsebenzi wakhe wosindiso. Abantu balibumba esandleni sikaNkulunkulu, basetshenziswa nguye ukufeza injongo yakhe yomusa njalo lesihawu. Wonke umuntu ulengxenye yakhe okumele ayenze, ebantwini bonke kuvezwe ukukhanya okuthile, okufanele izikhathi zonalezo, njalo okwaneleyo ukuba ayenze umsebenzi uNkulunkulu amnike wona. Kodwa akulamuntu loba ephakanyiswe kangakanani lizulu, oseke wafinyelela ezingeni lokuqedisisa ngokuphelela udaba losindiso, kumbe ukuqedisisa ngokuphelela injongo kaNkulunkulu ngomsebenzi okumele awenze ngaleso sikhathi. Abantu abenelisi ukuqedisisa lokho uNkulunkulu afuna ukukufeza ngomsebenzi abanika ukuthi bawenze; abazwisisi, ngokuphelela udaba abaluhambisayo ngegama lakhe. {GC 343.2}IEP 343.2

“Kambe ungayihlola yini imfihlakalo kaNkulunkulu? Ungakuhlola ukuphelela kukaSomandla na?” “Ngoba imicabango yami kayifani leyenu, lezindlela zami kazifani lezenu, kutsho iNkosi. Ngoba njengephezulu liphakeme kulomhlaba, ngokunjalo indlela zami ziphakeme kulezenu, lemicabango yami kulemicabango yenu.” “NginguNkulunkulu, kakho ofana lami, ngiveza ngaphambili okuzakwenzeka, lasendulo izinto ezingakenziwa.” (Jobe 11:7; Isaya 55:8,9; Isaya 46:9,10). {GC 343.3}IEP 343.3

Ngitsho labaprofethi ababebusiswe yikukhanyiselwa nguMoya oyiNgcwele labo abazange bazwisise ngokugcweleyo injongo yalokho ababekuvezelwe. Ingcazelo yakhona yayizaqhubeka isiba sobala ebantwini bonke ababezalandela, ngesikhathi lapho ababezadinga iziqondiso lezi ezimumethwe emazwini lawo. {GC 344.1}IEP 344.1

UPetro nxa wayebhala ngosindiso oluvezwa livangeli, wathi: “Abaprofethi abatshumayela ngomusa obuzakuza kini bafunisisa babuzisisa ngalokhukusiliswa. Babuza ukuthi yisiphi lokuba sinjani isikhathi esikhonjwa nguMoya kaKrestu awayekibo, etshengisa ngaphambili izinhlupheko eziqondene loKrestu lobukhosi obuzakuzilandela. Bambulelwa ukuthi kabazisebenzeli bona kodwa basebenzela thina...” (1 Petro 1:10-12). {GC 344.2}IEP 344.2

Loba kwakunganikwanga abaprofethi ukuthi bazwisise ngokuphelela izinto ababezivezelwe, benza yonke imizamo yokuthi bazwisise ukukhanya konke uNkulunkulu ayejabulele ukuthi abanike khona. Babuza njalo badingisisa ngokuzimisela, bedingisisa ukuthi uMoya KaKrestu owawukibo wawusitshoni. Khepha isifundo esingakanani kumaKrestu walamhlanje, labo okwakunikwe isiprofethi lesi ukuthi sisize bona! “Bambulelwa ukuthi kabazisebenzeli bona kodwa basebenzela thina.” Amadoda lawa angcwele afakaza ngalokho okwakumele kwaziwe yinzalo eyayizaba khona eyayingakazalwa ngaleso sikhathi. Qathanisa ukuzimisela kwabo lokunganaki kwalabo abakhethiweyo ababezazalwa ngendlela abaphatha ngayo isipho lesi sasezulwini. Khepha icala lalabo abathanda impilo yokuzithokozisa, abathanda izinto zomhlaba abasuthiseka ngokufundisa ukuthi amazwi wesiprofethi ngeke azwisiseke! {GC 344.3}IEP 344.3

Loba nje ingqondo zomuntu ezilomkhawulo zingelawo amandla wokungena emhlanganweni kaNkulunkulu, kumbe awokuzwisisa ngokupheleleyo ukufezeka kwenjongo zakhe, kodwa ezikhathini ezinengi kungenxa yephutha elithile kumbe ukuyekethisa kwabo okubangela ukuthi behluleke ukuqedisisa indaba zasezulwini. Esikhathini esinengi ingqondo zabantu, kwesinye isikhathi lezenceku zikaNkulunkulu, zilokufiphaliswa yimbono yabantu, lamasiko kanye lemfundiso zamanga, okubangela ukuthi baqedisise kancane kuphela izinto ezivezwe elizwini lakhe. Kwakunjalo lasebafundini bakaKrestu, lanxa uMsindisi wayehamba labo. Ingqondo zabo zazigcwele indlela abantu bonke ababecabanga ukuthi uMesiya wayezakuba ngumbusi wasemhlabeni, owayezaphakamisa isizwe sakoIsrayeli abenze babuse umhlaba wonke, njalo behluleka ukuzwisisa amazwi wakhe nxa wayebachazela ngokuhlukunyezwa kanye lokufa kwakhe. {GC 344.4}IEP 344.4

UKrestu ngokwakhe wayebathume ngamazwi athi: “Isikhathi sesigcwalisekile, njalo lombuso kaNkulunkulu ususondele, phendukani, njalo likholwe ivangeli.” (Marko 1:15). Amazwi lawa ayechaza lokhu okuvezwe encwadini kaDanyeli ngu9. Isikhathi samaviki ayi69 sasichazwe yingilosi ukuthi sasizafinyelela kuMesiya, njalo ngethemba eliphakemeyo njalo lentokozo yokumelela abafundi babekhangelele ukusungulwa kombuso kaMesiya eJerusalema owayezabusa umhlaba wonke. {GC 345.1}IEP 345.1

Batshumayela udaba uKrestu ayebanike lona, loba nje bona ngokwabo babelengcazelo engasiyo eyayiqondile. Loba nje amazwi wabo ayegxile kuDanyeli 9:25, abazange babone, evesini elilandelayo, ukuthi uMesiya wayezaqunywa. Kusukela ekuzalweni kwabo inhliziyo zabo zazibekwe ekulindeleni ubukhosi bombuso wasemhlabeni, njalo lokhu kwenza ukuthi ukuzwisisa kwabo kufiphale, bangezwa lokho okwakuvezwe esiprofethini njalo lasemazwini kaKrestu. {GC 345.2}IEP 345.2

Benza umsebenzi wabo wokuchazela isizwe samaJuda ubizo lomusa, njalo ngesikhathi esifananayo, lapho ababemelele ukubona iNkosi yabo ikhwela esihlalweni sikaDavida, bambona ebanjwa njengesephula mthetho, etshaywa, ethethiswa, ebekwa icala, njalo ephakanyiswa esiphambanweni saseKhalivari. Khepha ubuhlungu obungaka obabasenhliziyweni zabafundi laba phakathi kwamalanga lapho iNkosi yabo eyayilele khona ethuneni! {GC 345.3}IEP 345.3

UKrestu wayebuye ngesikhathi njalo langendlela eyayifana xathu laleyo eyayichazwe ngabaprofethi. Amazwi woMbalo ayegcwaliseke ngokuphelela kukho konke ayekwenzile emsebenzini wakhe. Wayetshumayelile udaba losindiso, njalo amazwi wakhe ayegcwele amandla. Inhliziyo zabalaleli bakhe zazifakazile ukuthi ayevela ezulwini. Ilizwi likaMoya kaNkulunkulu lagcizelela umsebenzi ongcwele weNdodana yakhe. {GC 346.1}IEP 346.1

Abafundi baqhubeka bebambelele ngothando olungapheliyo eNkosini yabo. Kodwa loba kunjalo ingqondo zabo zazilokhe zigcwele ukungaqedisisi lokuthandabuza. Ebuhlungwini babo abazange bakhumbule amazwi kaKrestu lapho ayebatshele ngokuhlupheka njalo lokufa kwakhe. Nxa uJesu waseNazaretha wayenguMesiya weqiniso, babezangena ebuhlungwini obungaka yini? Lowu kwakungumbuzo owahlukumeza imphefumulo yabo nxa uMsindisi wayelele ethuneni lakhe phakathi kwamahola amade wosuku lweSabatha olwaluphakathi kokufa lokuvuka kwakhe. {GC 346.2}IEP 346.2

Loba nje ubusuku bosizi babuthana buhanqe abalandeli bakaJesu, kodwa babengalahlwanga. Umprofethi uthi: “Lapho ngihlezi emnyameni, iNkosi izakuba yikukhanya kwami...izakungikhiphela ekukhanyeni, ngibone ukulunga kwayo.” (Mika 7:8,9). “Umnyama kawumnyama kuwe, ubusuku bukhanya njengemini; ngoba umnyama uyafana lokukhanya kuwe.” (Amahubo 139:12). UNkulunkulu ukhulumile: “Kuyabaphumela abaqotho ukukhanya emnyameni, labo abalomusa lesihawu lokulunga.” (Amahubo 112:4). “Ngizakhokhela iziphofu ezindleleni ezingayaziyo, ngiziqondise ezindleleni ezingazaziyo, ngiphendule umnyama phambi kwazo ube yikukhanya, ngiqondise lezindawo ezingamaxhakaxhaka. Yizo lezizinto engizakuzenza, ngingaziyekeli.” (Isaya 42:16). {GC 346.3}IEP 346.3

Udaba olwalutshunyayelwe ngabafundi bakhe ngegama leNkosi lwaluqondile, njalo lezehlakalo ezazikhonjwa ngamazwi lawa zazigcwaliseka phambi kwabo. “Isikhathi sesigcwalisekile, umbuso kaNkulunkulu ususondele,” lolu kwakuludaba lwabo. Ekupheleni kwesikhathi, amaviki angu69 atholakala kuDanyeli 9, ayezaphelela kuMesiya, “Ogcotshiweyo”, uKrestu wayesethole ukugcotshwa kwakoMoya ngemva kombhambhathizo wakhe owenziwa nguJohane emfuleni waseJordane. Njalo umbuso kaNkulunkulu ababechaze ukuthi wawususondele wasungulwa ngokufa kukaKrestu. Umbuso lowu wawungasikho ukucabanga kwabo ukuthi ngumbuso wasemhlabeni. Njalo wawungasiwo umbuso onaphakade ozayo, ozakwakhiwa lapho “amandla lobukhulu bemibuso yonke engaphansi komthunzi welanga kuzanikwa abantu abangcwele boPhezukonke. Ukubusa kwabo kakuyikuphela, layo yonke imibuso izakubakhonza ibalalele.” (Danyeli 7:27). Ngendlela asetshenziswe ngayo eBhayibhilini, amazwi athi “umbuso kaNkulunkulu” asetshenziswa ukuchaza umbuso womusa njalo lombuso wobukhosi. Umbuso womusa uvezwe ngokucaca nguPhawuli encwadini yamaHebheru. Ngemva kokukhomba kuKrestu, osincengela ngothando yena “ozwelana lobuthakathaka bethu,” umpostoli uthi: “Ngakhoke asisondele ngesibindi esihlalweni somusa ukuba samukeliswe isihawu, sizuze umusa wokusisiza ngesikhathi esifaneleyo.” (Amaheberu 4:15,16). Isihlalo somusa simele umbuso womusa, ngoba ukubakhona kwesihlalo kuveza ukubakhona kombuso. Endatshaneni ezinengi ezasetshenziswa nguKrestu, wasebenzisa amazwi athi “umbuso wezulu” esitsho umsebenzi womusa wezulu enhliziyweni zabantu. {GC 346.4}IEP 346.4

Ngakhoke isihlalo sobukhosi simele umbuso wobukhosi, njalo umbuso lowu uvezwe emazwini oMsindisi athi: “Nxa isifikile iNdodana yomuntu ngobukhosi bayo kanye lezithunywa zonke, kung’khona izakuhlala esihlalweni sayo sobukhosi. Kuzabuthelwa phambi kwayo izizwe zonke...” (Mathewu 25:31,32). Umbuso lowu khona uzakwenzakala. Awusoke ubekhona uKrestu aze abuye ngokwesibili. {GC 347.1}IEP 347.1

Umbuso womusa wasungulwa umuntu eqeda ukuwa, lapho icebo lokuhlenga abantu abasebelecala elenziwa khona. Kwenzeka ngenjongo, langesithembiso sikaNkulunkulu njalo ngokukholwa, ukuba uluntu lwaluzaba ngaphansi kwawo lumbuso. Loba kunjalo wawungazange umiswe kwazekwayafika ukufa kukaKrestu. Loba nje wayeseqale umsebenzi wakhe emhlabeni, uMsindisi ngokudinwa yinkani lokungabongi kwabantu, wayengakhetha ukubuyela emuva angabi ngumhlatshelo waseKhalivari. Engadini yaseGetsemani inkezo yobubi yagedlezela esandleni sakhe. Lakhonapha wayelawo amandla wokwesula izithukuthuku zegazi ebusweni bakhe njalo atshiye uluntu lonke ukuthi lufele ezonweni zabo. Ngabe wayekwenzile lokhu, kwakungeke kwabakhona usindiso ebantwini bonke. Kodwa kwathi uMsindisi enikela impilo yakhe, ngomphefumulo wakhe wokucina ekhala esithi: “Kuphelile,” kulapho okwabalesiqiniseko sokuthi icebo losindiso lalizagcwaliseka. Isithembiso esasinikwe engadini yaseEdeni sasesilethiwe. Umbuso womusa owawubekhona isikhathi sonke ngenxa yesithembiso sikaNkulunkulu, wakhiwa ngalesi isikhathi. {GC 347.2}IEP 347.2

Ngakho ukufa kukaKrestu isehlakalo esifananayo abafundi ababesibone njengokutshabalala kwamathemba wabo, saba yiso esayenza ukuthi ithemba labo lime inaphakade. Loba nje isehlakalo lesi sasibangele ukuthi bephulwe umoya, sasiyibufakazi obukhulu bokuthi ithemba labo laliqondile. Isehlakalo esasilethe ukukhala lokudangala kibo, yiso esasivule umnyango wethemba emntwaneni wonke kaAdamu, njalo kwakulapho okwakulensika yempilo ezayo lenjabulo engelakuphela kubo bonke abathembekileyo beNkosi ababezazalwa. {GC 348.1}IEP 348.1

Injongo zomusa ongelamkhawulo zasezigwaliseka, loba nje abafundi babedangele. Nxa inhliziyo zabo zazinqotshwe ngumusa langamandla wemfundiso yakhe, yena “owakhuluma ngendlela engakaze ikhulunywe ngumuntu,” loba kunjalo uthando lwabo olumsulwa ababelalo ngoJesu, lwaluhlangene lokuthanda umhlaba kanye lezifiso zawo eziphakamisa ubumina. Lasendlini ababekuyo ngePhasika, ngehola elimqoka lapho iNkosi yabo yaseyingena ethunzini laseGetsemani, “kwakulokulwisana phakathi kwabo, befuna ukwazi ukuthi ngubani owayezakuba mkhulu phakathi kwabo.” (Luka 22:24). Imibono yabo yayigcwele isihlalo sobukhosi, lomqhele, njalo lobukhosi, ngaleso sikhathi phambi kwabo babemelelwe yibuhlungu bensimu, lendlu yokwahlulela, kanye lesiphambano saseKhalivari. Kwakungenxa yokuziphakamisa kwenhliziyo zabo, lokomela ubukhosi bomhlaba, okwabangela ukuthi labo babambelele kangaka emfundisweni yamanga eyayikhona esikhathini sabo, njalo bangezwa amazwi woMsindisi ayebonisa isimo esiqotho sombuso wakhe, njalo ayekhomba ubuhlungu ayezadlula kibo kanye lokufa. Njalo amaphutha lawa aphetha ebuhlungwini, obuhlabayo kodwa obabufanele, obavunyelwa ukuthi bubehlele ukwenzela ukuthi baqondiswe. Loba nje abafundi babeyenze iphutha lokungazwisisi ingcazelo yodaba ababelutshumayela, njalo babehluleke ukunanzelela amathemba wabo, kodwa loba kunjalo babeqhubekile betshumayela isixwayiso esasinikwe nguNkulunkulu, njalo iNkosi yayizabanika umvuzo ngenxa yokukholwa kwabo njalo aphakamise ukulalela ababekwenzile. Kwabekwa ezandleni zabo umsebenzi wokuhambisa ivangeli emhlabeni wonke ngoMsindisi owayesevukile. Kwakuyisizatho sokubalungiselela umsebenzi lowu okwenza ukuthi isehlakalo lesi esasimunyu sivunyelwe ukuthi senzeke. {GC 348.2}IEP 348.2

Ngemva kokuvuka kwakhe uJesu wabonakala phambi kwabafundi bakhe endleleni yase Emmaus, njalo, “eqala kuMose lakubaprofethi, wabachazela esebenzisa iMbhalo ngakho konke okwakumayelana laye.” (Luka 24:27). Inhliziyo zabafundi bakhe zavuselelwa. Ukukholwa kwabaselwa njalo. Bazalwa njalo ethembeni eliphilayo” laloba uJesu wayengakazivezi kubo. Kwakuyinjongo yakhe ukuthi akhanyisele ingqondo zabo njalo agxilise ukholo lwabo “emazwini wesiprofethi angaphuthiyo.” Wayefisa ukuthi iqiniso ligxilise impande zalo engqondweni zabo, hatshi kuphela ngoba lalisekelwa ngamazwi wakhe esahamba labo, kodwa ngenxa yobufakazi obungathandabuzekiyo obuvezwa yizibonelo lezithunzi zomthetho wokunikela, njalo lamazwi esiprofethi atholakala eThestamentini elidala. Kwakudingeka ukuthi abalandeli bakaKrestu babelokukholwa okulokuqedisisa phakathi, hatshi kuphela ukuthi bazenzele bona, kodwa ukwenzela ukuthi benelise ukuthwalela ulwazi lukaKrestu emhlabeni wonke. Njalo njengenyathelo lokuqala lokubanika ulwazi lolu, uJesu wakhomba abafundi bakhe “kuMose njalo labaprofethi bonke.” Babunjalo ubufakazi obanikwa nguMsindisi ngemva kokuvuka kwakhe ebabonisa ukuqakatheka kweThestamenti elidala. {GC 349.1}IEP 349.1

Khepha umehluko owabakhona enhliziyweni zabafundi, nxa babekhangela njalo ebusweni ababebuthanda beNkosi yabo! (Luka 24:32). Ngokuphelela njalo lokulunga ababengakaze bakufumane, basebethole lowo, “uMose emlayweni, labaprofethi ababelobe ngaye.” Ukungaqedisisi, lobuhlungu, lokudangala kwasuka kwatshiyela indawo ithemba elimsulwa, njalo lokukholwa okungafiphalanga. Khangela isimanga esingaka esokuthi ngemva kokwenyuka kwakhe “baqhubeka besethempelini, bebonga njalo bedumisa uNkulunkulu.” Abantu ngokwazi kwabo kuphela ukuthi uMsindisi wayebulewe, bakhangela ebusweni babo bedinga ubufakazi bosizi, lokudideka, njalo lokwehlulwa, kodwa babona ukuthokoza njalo lokunqoba. Khepha ukulungiselelwa okunganani abafundi laba ababekutholile ukwenzela ukuthi benze umsebenzi owawuphambi kwabo! Basebedlule phakathi kokuhlolwa okukhulu okwakunzima ukuthi badlule kikho, njalo kwakubonakele ukuthi nxa imicabango yabantu yayicabanga ukuthi kwasekuphelile, ilizwi likaNkulunkulu laseligcwalisekile ngokunqoba. Kuyini okwakuzephula ukholo lwabo kusukela manje, kumbe okwakuzasusa uthando lwabo? Phakathi kosizi olukhulu babelenduduzo enkulu, ithemba “elaliyinsika yomphefumulo, elimiyo njalo elingapheliyo.” (Amaheberu 6:18, 19). Basebebone ukuhlakanipha lamandla kaNkulunkulu, njalo basebesazi ukuthi “kasikho kufa, lokusila, lezithunywa, lababusi, lezinto ezikhona, lezinto ezizayo, lamandla, lokudepha, lokutshona, lakho konke okudaliweyo okuzakuba lamandla okusahlukanisa lothando lukaNkulunkulu olukuKrestu Jesu, iNkosi yethu.” (Roma 8:38,39). “Kukho konke” bathi bona, “silokunqoba okukhulu ngaye owasithandayo.” (Roma 8:37). “Ilizwi likaNkulunkulu limi kuzekube nini nanini.” (1 Petro 1:25). Njalo “ngubani obalahlayo? NguKrestu Jesu owafayo, owavuswa kwabafileyo, ongakwesokunene sikaNkulunkulu losincengelayo.” (Roma 8:34). {GC 349.2}IEP 349.2

INkosi ithi: “Abantu bami abayikuyangeka.” (Joweli 2:26). “Ukukhala kungabakhona okobusuku, kodwa ukuthokoza kuyeza ekuseni.” (Amahubo 30:5). Nxa ngosuku lokuvuka kwakhe abafundi laba bahlangana loMsindisi, njalo inhliziyo zabo zazitshiseke ngaphakathi nxa babelalele amazwi wakhe, nxa babekhangela ekhanda lasezandleni njalo lasenyaweni zakhe ezazilinyazelwe bona; nxa ngaphambi kokwenyuka kwakhe, uJesu wabaqhubela ngaphandle bazebayafika endaweni yaseBethany, njalo nxa wayephakamisa izandla zakhe ebabusisa, wathi kibo: “Hambani liye emhlabeni wonke litshumayele ivangeli,” wengeza esithi, “Khangelani ngilani ngazozonke izikhathi.” (Marko 16:15; Mathewu 28:20). Lapho ngosuku lwePentecosti uMduduzi owayethenjisiwe wehla njalo lamandla waphezulu aphiwa abafundi ababejabulela ubukhona beNkosi yabo phakathi kwabo, ngaleso sikhathi lobanje indlela yabo njengeyakhe yayizadlula phakathi kokuzinikela njalo lokufela iqiniso, babengatshintsha yini umsebenzi wevangeli lomusa, lomqhele wobungcwele ozaphiwa abalungileyo ekubuyeni kweNkosi, bathathe ubukhosi bombuso womhlaba, owawube lithemba labo ngaphambilini enkambeni yabo yokuba ngabalandeli bakaKrestu na? Lowo “owenelisa ukwenza lokho okudlula esikucelayo lesikunakanayo,” wayesebanikile, ngobudlelwano bokuhlukumezwa kwakhe, isidlo sentokozo yakhe, intokozo “yokuletha amadodana amanengi ebukhosini,” intokozo engakhulumekiyo, “inkazimulo engelakubalwa,” echazwa nguPhawuli ngokuthi, “ukuhlupheka kwethu okuncane, okwenzeka okwesikhathi esifitshane,” “akufanelanga ukuqathaniswa.” {GC 350.1}IEP 350.1

Lokho abafundi abatshumayela “ivangeli lombuso” abadlula kikho ekubuyeni kukaKrestu kwakuqala, kufanana xathu lalokho abafundi bakhe abatshumayela ngokuza kwakhe kwesibili abadlula kikho. Nxa abafundi babehamba betshumayela, “Isikhathi sesigcwalisekile, umbuso kaNkulunkulu ususondele,” uMiller laye lalabo ayesebenzisana labo batshumayela ukuthi isiprofethi esikhuluma ngeminyaka emide okwedlula yonke eBhayibhilini sasesifika emaphethelweni, lokuthi ukwahlulela kwasekusondele, njalo umbuso ongelamkhawulo wawusuzangeniswa. Ukutshumayela kwabafundi mayelana lesikhathi kwakugxile encwadini kaDanyeli 9. Indaba eyalethwa nguMiller labanye bakhe yayimemezela ngokuthi amalanga ayi2300 atholakala kuDanyeli 8:14 ayesezaphela, okwakugoqela amaviki ayi70. Ukutshumayela kwabafundi lokukaMiller kwakugxile ekugcwalisekeni kwengxenye ezehlukeneyo kodwa ezazitholakala esikhathini sesiprofethi esisodwa. {GC 351.1}IEP 351.1

Njengabafundi bakuqala, uWilliam Miller labanye bakhe, abazange baqedisise ngokupheleleyo udaba ababeluthwele. Amaphutha ayebekhona okwesikhathi eside ebandleni abanqabela ukuthi bazwisise isiqu esithile esasimqoka kungcazelo yesiprofethi lesi esasiqakathekile. Ngakhoke loba babetshumayela ngodaba lolo uNkulunkulu ayebanike lona ukuthi baluhambise emhlabeni wonke, kodwa ngenxa yokungaqedisisi kwabo ingcazelo yakhona badlula phakathi kokudangala. {GC 351.2}IEP 351.2

Ekuchazeni kwabo incwadi kaDanyeli 8:14 ethi, “Kuzakuba zinkulungwane ezimbili lamakhulu amathathu amalanga; ngemva kwalokho ithempeli lizahlanjululwa,” uMiller njengoba sekuveziwe, wamukela ingcazelo eyayikholwa ngumuntu wonke eyokuthi umhlaba wawulithempeli, njalo wakholwa ukuthi ukuhlanjululwa kwethempeli kwakusitsho ukuhlanjululwa komhlaba ngomlilo ekubuyeni kweNkosi. Yikho nxa wayesethole ukuthi ukuphela kwamalanga lawa ayi2300 kwakuveziwe, wafika esiphethweni sokuba isikhathi lesi esasiveziwe sasisitsho ukuza kwesibili. Iphutha lakhe laleyame ekuthini wayeyamukele ingcazelo eyayikholwa ngumuntu wonke ngalokho okwakumelwe lithempeli emazwini wesiprofethi. {GC 352.1}IEP 352.1

Enkonzweni zasendulo ezaziyisithunzi somnikelo njalo lomsebenzi kaKrestu wokuba ngumpristi, ukuhlanzwa kwethempeli kwakuyinkonzo yokucina eyayisenziwa ngumpristi omkhulu phakathi kwenkonzo zonke ezazisenziwa phakathi komnyaka. Kwakungumsebenzi wokungqiba inkonzo yokubuyisana, okwakusitsho ukukhipha kumbe ukususa isono koIsrayeli. Kwakumele umsebenzi wokucina owenziwa nguMpristi wethu Omkhulu ezulwini, ekukhipheni kumbe ekwesuleni kwezono zabantu bakhe, ezilotshwe encwadini zasezulwini. Inkonzo leyi igoqela umsebenzi wokuhlolisisa, umsebenzi wokwahlulela, njalo wenzakala ngaphambi kokuza kukaKrestu emayezini ngamandla njalo lenkazimulo enkulu; ngoba nxa esiza, isiphetho somuntu wonke sizabe sesilungisiwe. UJesu uthi: “Ngilomvuzo wami, ukunika lowo lalowo njengemisebenzi yakhe.” (Isambulo 22:12). Yiwo lowu umsebenzi wokwahlulela, owenzakala ngaphambi kokuza kukaKrestu, omenyezelwa ludaba lwengilosi yakuqala etholakala kuSambulo 14: 7 ethi: “Mesabeni uNkulunkulu, njalo limdumise, ngoba ihola lokwahlulela kwakhe selifikile.” {GC 352.2}IEP 352.2

Labo abatshumayela ngesixwayiso lesi banika udaba oluqondileyo ngesikhathi esasiqondile njalo. Kodwa njengabafundi bakhe bakuqala bathi: “Isikhathi sesifikile, njalo umbuso kaNkulunkulu ususondele,” amazwi wabo egxile kuDanyeli 9, njengoba babehlulekile ukunanzelela ukuthi ukufa kukaMesiya kwakuveziwe encwadini efananayo, uMiller laye labanye bakhe batshumayela udaba olwalugxile kuDanyeli 8:14 njalo lakuSambulo 14:7, labo behluleka ukunanzelela ukuthi kwakulezinye indaba ezazivezwe kuSamblo 14, okwakumele zinikwe umhlaba ngaphambi kokuza kukaKrestu. Ngendlela efananayo eyokuthi abafundi babeyenze iphutha mayelana lombuso owawuzasungulwa ngemva kokuphela kwamaviki ayi70, lalabo ababetshumayela ngokuza kwesibili benza iphutha mayelana lesehlakalo esasizakwenzakala ngemva kokuphela kwamalanga ayi2300. Kuzo lezi izikhathi ezimbili kwakulokwamukela kumbe ukulandela, amaphutha ayesamukelwa ngumuntu wonke ayebangele ukuthi ingqondo zabantu zifiphale zingazwisisi iqiniso. Amaqembu lawa womabili agcwalisa intando kaNkulunkulu ngokuhambisa isixwayiso ayekhethe ukuthi siphiwe abantu, njalo womabili, ngenxa yokungaqedisisi udaba lwabo, badlula ekudangaleni okukhulu. {GC 352.3}IEP 352.3

Loba kwakunjalo uNkulunkulu wenelisa ukufeza injongo yakhe ngokuvumela ukuthi isixwayiso sokuza kokwahlulela sinikwe njengoba sinjalo. Usuku olukhulu lwaselusondele, njalo ngenxa yomusa wakhe abantu badluliswa emhlolisweni owawugxile esikhathini esithile, ukwenzela ukuthi bananzelele lokho okwakusenhliziyweni zabo. Indaba leyi yayenzelwe ukuhlola njalo lokuhlambulula ibandla. Babezathunganyelwa ukuthi babone ukuthi inhliziyo zabo zazibekwe emhlabeni kumbe kuKrestu lasezulwini. Babesithi bathanda uMsindisi; manje kwasekumele babonise uthando lwabo. Babezimisele yini ukutshiya amathemba wabo wasemhlabeni lezifiso zenhliziyo zabo, njalo bamukele ngentokozo ukuza kweNkosi yabo na? Udaba lolu lwaluhlelwe ngendlela yokuthi lubenze bananzelele isimo sabo kokwakomoya, lwalulethwe ngomusa ukubavusa ukuze badinge iNkosi ngokuvuma izono lokuzehlisa. {GC 353.1}IEP 353.1

Ukudangala kwabo lakho, loba nje kwakungumphumela wokungazwisisi kwabo kodaba ababeluhambisa, kwakuzaphendulelwa kulethe ubuhle. Kwakuzahlola inhliziyo zalabo ababethe bamukele isixwayiso lesi. Phambi kokudangala kwabo babezalahla yini ithemba labo njalo balahlele khatshana ithemba ababelalo elizwini likaNkulunkulu na? Kumbe labo ngomkhuleko langokuzehlisa, babezazama ukudingisisa lapho ababehluleke khona ukuzwisisa ingcazelo yesiprofethi? Bangaki ababehambe ngenxa yokwesaba, kumbe ngenxa yokujabula lokusebenzisa imizwa yabo? Bangaki ababengaphendukanga ngokuphelela njalo ababengakholwa? Amaxuku abantu ayesithi babethanda ukuza kweNkosi. Nxa basebebizwa ukuthi badlule phakathi kokuchothozwa ngumhlaba, njalo laphakathi komhloliso wokulinda njalo lokudangala, babezaphika ukholo lwabo na? Ngenxa yokuthi abazange baqedisise indlela uNkulunkulu ayekhulume labo, babezalahlela eceleni amaqiniso ayemiswe ngokucaca yibufakazi belizwi lakhe na? {GC 353.2}IEP 353.2

Umhloliso lowu wawuzaveza amandla walabo ngokukholwa okuqotho ababelalele lokho ababekholwe ukuthi kwakuyimfundiso yelizwi njalo yoMoya kaNkulunkulu. Kwakuzabafundisa, ngendlela isehlakalo esinje kuphela esasingenelisa ukubafundisa, ingozi yokwamukela ingcazelo lemfundiso yabantu, kulokuthi iBhayibhili livunyelwe ukuthi lizichaze. Ebantwaneni bokukholwa ukudideka njalo losizi olwabangelwa liphutha labo kwakuzaletha ukuqondiswa okwakudingakala. Babezathunganyelelwa ukuthi bafundisise ilizwi lesiprofethi. Babezafundiswa ukuhlolisisa insika yenkolo yabo, njalo lokuphika loba yini, loba yayamukelwe kangakanani ngamaKrestu wonke nxa yayingelansika yayo eMbhalweni weqiniso. {GC 354.1}IEP 354.1

Phakathi kwamakholwa lawa, njengabafundi bakuqala, konke phakathi kwehola lokuhlolwa kwabo, okwabonakala sengathi kwakumnyama ukuthi bakuzwisise, ngemva kwesikhatshana kwakuzaba sobala. Nxa babezabona “ukuphelelisa kweNkosi” babezabakwazi ukuthi, loba babedlule ebuhlungwini ngenxa yamaphutha wabo, injongo zakhe zothando lwakhe kibo zazigcwalisekile kahle. Babezafunda ngesifundo esibusisekileyo esokuthi “ulozwelo, njalo ulomusa;” lokuthi indlela zakhe zonke “zingumusa leqiniso kulabo abagcina isivumelwano sakhe njalo lobufakazi bakhe.” {GC 354.2}IEP 354.2