Isahluko 25—Umthetho kaNkulunkulu Awuguquki

“Kwasekuvulwa ithempeli likaNkulunkulu elisezulwini, kwabonakala umtshokotsho wesivumelwano sakhe ethempelini.” (Isambulo 11:19). Umtshokotsho wesivumelwano sikaNkulunkulu usendaweni engcwele ngcwele, endlini yesibili ethempelini. Emsebenzini owawusenziwa ethabanekelini lasemhlabeni, lona elaliyisibonelo njalo lesithunzi salokho okwenzeka ezulwini, indlu leyi eyesibili yayivulwa kuphela ngoSuku lokuBuyisana nxa kwakuhlanjululwa ithempeli. Ngakhoke ukumemezela ukuthi ithempeli likaNkulunkulu lavulwa ezulwini njalo umtshokotsho wesivumelwano wabonakala kukhomba ukuvulwa kwendawo engcwele ngcwele yasethempelini lasezulwini ngomnyaka ka1844 nxa uKrestu wayengena khona ukuba ayenze umsebenzi wakhe wokucina wokubuyisana. Labo ngokukholwa abalandela uMpristi wabo oMkhulu nxa wayengena emsebenzini wakhe endaweni engcwele ngcwele, babona umtshokotsho wesivumelwano sakhe. Njengoba babefundile ngendaba yethempeli basebeyenelise ukuzwisisa ukuthi uMsindisi wayetshintshe umsebenzi wakhe, njalo babona ukuthi khathesi wayesesebenzela phambi komtshokotsho wesivumelwano sikaNkulunkulu, encengela izoni ngegazi lakhe. {GC 433.1}IEP 433.1

Umtshokotsho owawusethabanekelini lasemhlabeni wawulamatshe amabili lapho okwakubhalwe khona umthetho kaNkulunkulu. Umtshokotsho wawulibhokisi lapho amatshe lawa ayehlala khona, njalo ukubakhona kwamatshe lawa kwabangela ukuthi ibhokisi leli lihlonipheke njalo libengcwele. Nxa ithempeli likaNkulunkulu laselivuliwe ezulwini, umtshokotsho wesivumelwano wabonakala. Phakathi kwendawo engcwele ngcwele, ethempelini lasezulwini, imithetho elitshumi iqakathekisiwe, yona eyakhulunywa nguNkulunkulu uqobo lwakhe phakathi kwemidumo entabeni yaseSinai njalo eyalotshwa ngesandla sakhe phezu kwamatshe amabili. {GC 433.2}IEP 433.2

Umthetho kaNkulunkulu osethempelini lasezulwini yiwo owawukhona kusukela ekuqaleni, ngoba leyana eyabhalwa ematsheni yaphinda njalo yabhalwa futhi nguMose encwadini zeBhayibhili yayingumfanekiso yaleyo esezulwini. Labo abafinyelela ekuzwisiseni iqiniso leli bathunganyelwa ukuthi babona ubungcwele njalo lesimo somthetho esingaguqukiyo. Babona okwedlula izikhathi ezazedlule, amandla wamazwi kaKrestu: “Kuze kudlule izulu lomhlaba kakusoze kudlule ibadlana libe linye ingabe lecwatshana libe linye lomlayo, kuze kwenzakale konke.” (Mathewu 5:17). Umthetho kaNkulunkulu ngokuba uyisambulo sentando yakhe, lamazwi aveza isimo sakhe, kumele uhlale kuze kubephakade, “njengofakazi othembekileyo ezulwini.” Akula lowodwa umthetho osewasuswayo, kumbe lebala kumbe icwatshana eselaguqulwayo. Encwadini kamahubo kulamazwi athi: “Nkosi ilizwi lakho limi ezulwini kuze kube nininini.” (Amahubo 119:89). “Lemithetho yayo yonke ithembekile. Imiswe kuze kube ninini.” (Amahubo 111:7,8). {GC 434.1}IEP 434.1

Phakathi laphakathi kwemithetho elitshumi kumi umthetho wesine, ngendlela owakhulunywa ngayo: “Khumbula usuku lweSabatha ulwenze lubengcwele. Uzakusebenza insuku eziyisithupha uwenze wonke umsebenzi wakho, kodwa usuku lwesikhombisa luliSabatha leNkosi uNkulunkulu wakho, ungasebenzi ngalo wena lendodana yakho, lendodakazi yakho lenceku yakho lencekukazi yakho lenkomo zakho lowemzini osemzini wakho. Ngoba ngensuku eziyisithupha, iNkosi yenza izulu lomhlaba lolwandle lakho konke okukukho, yaphumula ngosuku lwesikhombisa, ngalokhu iNkosi yalubusisa usuku lwesikhombisa, yalwenza lwaba ngcwele.” (Eksodusi 20:8-11). {GC 434.2}IEP 434.2

UMoya kaNkulunkulu wathungamela inhliziyo zalabo ababefunda ilizwi lakhe. Bananzelela ukuthi babephila impilo yokwephula umthetho wesine bengazi ngenxa yokungalandeli usuku lokuphumula olwabekwa nguMdali. Baqala ukucubungula izizatho zokugcina usuku lwakuqala lweviki endaweni yosuku uNkulunkulu alubusisayo. Abazange bathole ubufakazi eBhayibhilini bokuthi umthetho wesine wawususiwe, kumbe ukuthi iSabatha laliguquliwe, isibusiso esasibangele ukuthi usuku lwesikhombisa lubengcwele sasingasuswanga. Babefise ukwazi njalo lokwenza intando kaNkulunkulu, khathesi nxa babezibona njengabantu ababesephula umthetho kaNkulunkulu, usizi lwagcwala enhliziyweni zabo, njalo babonisa ukuhlonipha uNkulunkulu ngokugcina usuku lwakhe lweSabatha ngcwele. {GC 434.3}IEP 434.3

Kwabakhona imizamo eminengi eyenziwayo eyokubhidliza ukholo lwabo. Akulamuntu owayesehluleka ukunanzelela ukuthi ithabanekeli lasemhlabeni lalingumfanekiso wethempeli lasezulwini, umthetho owawubekwe emtshokotshweni wesivumelwano emhlabeni wawufana xathu lalowo osezulwini, njalo lokuthi ukwamukela iqiniso elimayelana lethempeli lasezulwini kwakugoqela ukuvuma lokho okutshiwo ngumthetho kaNkulunkulu njalo lomlandu wokugcina usuku lweSabatha njengoba lichazwe emthethweni wesine. Lapha yikho okwakulokulwiswa okukhulu ngenxa yokuchazwa kwemiBhalo eyakwenza kwacaca ukuthi uKrestu wayesenza wuphi umsebenzi ethempelini lasezulwini. Abantu bazama ukuvala umnyango uNkulunkulu ayewuvulile, njalo lokuvula umnyango uNkulunkulu ayewuvalile. Kodwa “yena ovula kungavali muntu, lovala kungavuli muntu,” wayetshilo ukuthi: “Khangela ngimisa phambi kwakho umnyango ovuliweyo, ongelakuvalwa muntu.” (Isambulo 3:7,8). UKrestu wayesevulile umnyango kumbe umsebenzi wakhe, endaweni engcwele ngcwele, ukukhanya kwakukhanyisa kuphuma emyango lowu owasewuvuliwe ethempelini lasezulwini, njalo umthetho wesine waboniswa ukuthi lawo wawuphakathi kwemithetho elitshumi kilo, lokho uNkulunkulu ayekwakhile akula muntu owayengakubhidliza. {GC 435.1}IEP 435.1

Labo ababeyamukele ukukhanya okumayelana lomsebenzi kaKrestu wokusincengela njalo lokuthi umthetho umi kuze kube nininini bananzelela ukuthi lawa kwakungamaqiniso avezwe kuSambulo 14. Indaba ezitholakala esahlukweni lesi zimumethe izixwayiso ezintathu ezibambeneyo ezifanele ukulungiselela izakhamizi zomhlaba ukuza kweNkosi kwesibili. Isimemezelo esithi, “Ihola lokwahlulela kwakhe selifikile,” siveza umsebenzi kaKrestu wokuncengela abantu ngokokucina. Siletha iqiniso okumele lihanjiswe kuzekuyefika isikhathi lapho ukuncengela kukaKrestu okuzaphela khona njalo lapho azabuya khona emhlabeni ezothatha abantu bakhe. Umsebenzi wokwahlulela owaqala ngomnyaka ka1844 kumele uqhubeke kuzekuyefika lapho indaba zomuntu wonke ezizabe sezihlolisiswe zaphela, kwabaphilayo labafileyo, ngakhoke kuzaqhubeka kuze kuyefika ukuvalwa komusa. Ukwenzela ukuthi abantu benelise ukuma ekwahluleleni, udaba lolu lubatshela ukuthi “mesabeni uNkulunkulu, njalo limdumise,” “limkhonze yena owadala izulu, lomhlaba, lolwandle, kanye lemithombo yamanzi.” Umphumela wokwamukela izixwayiso lezi uveziwe eMbhalweni othi: “Nampa labo abagcina imilayo kaNkulunkulu lokukholwa kukaJesu.” Ukwenzela ukuthi silungele ukwahlulela, kubalulekile ukuthi abantu bagcine imilayo kaNkulunkulu. Umthetho lowu uzaba ngumgomo wokulinganisa izimilo ngosuku lokwahlulela. Umpostoli uPhawuli uthi: “Abonileyo belomlayo bazakuthonisiswa ngomlayo, ... ngosuku uNkulunkulu azathonisisa ngalo imfihlakalo zenhliziyo zabantu ngoKrestu Jesu, litsho njalo ivangeli lami.” Uyatsho njalo ukuthi labo abagcina imilayo bazakwamukelwa. (Roma 2:12-16). Ukukholwa kuqakatheke kakhulu ekugcineni imilayo kaNkulunkulu, ngoba “ngaphandle kokukholwa kakwenzeki ukumthokozisa.” Njalo “konke okungasikho kokukholwa kuyisono.” (Amaheberu 11:6; Roma 14:23). {GC 435.2}IEP 435.2

Emazwini wodaba lwengilosi yakuqala abantu bayatshelwa ukuthi “besabe uNkulunkulu njalo bamdumise” njalo bamkhonze njengoMdali wezulu lomhlaba. Ukwenzela ukuthi bakwenze lokhu, kumele balandele umlayo wakhe. Indoda ekhaliphileyo ithi: “Mesabeni uNkulunkulu ligcine imilayo yakhe, ngoba lokhu kungumlandu womuntu wonke.” (Umtshumayeli 12:13). Nxa kungekho ukulandela imilayo yakhe, akukho ukukhonza okungamthokozisa. “Lokhu kuyikuthanda uNkulunkulu, ukuthi sigcine imilayo yakhe.” “Uba umuntu engawulaleli umlayo, lemikhuleko yakhe izakuba yisinengiso.” (1 Johane 5:3; Zaga 28:9). {GC 436.1}IEP 436.1

Umlandu wokukhonza uNkulunkulu weyame eqinisweni lokuthi nguye uMdali njalo lokuthi zonke izinto zikhona emhlabeni ngenxa yakhe. Njalo kuyoyonke indawo eBhayibhilini, lapho esitshelwa ngokuthi kumele simkhonze phezu kwabonkulunkulu babahedeni, kuveziwe, ubufakazi bamandla wakhe wokuba nguMdali. “Ngoba bonke onkulunkulu bezizwe bayizithombe, kodwa iNkosi yenza amazulu.” (Amahubo 96:5). “Pho lizangilinganisa lobani, lizangifananisa lobani na? Kutsho oNgcwele. Phakamiselani amehlo enu phezulu libone, ngubani owenza inkanyezi leziyana na?” “Ngoba iNkosi eyadala iphezulu, yona enguNkulunkulu eyabumba umhlaba yawenza...ithi ngiyiNkosi kakho omunye.” (Isaya 40:25,26; 45:18). “Yazini ukuthi iNkosi inguNkulunkulu. Yiyo eyasenzayo, singabayo, singabantu bayo lezimvu zedlelo layo.” “Wozani simkhonze sikhothame, siguqe phambi kweNkosi, uMenzi wethu.” (Amahubo 100:3; 95:6). Njalo lezidalwa ezingcwele ezikhonza uNkulunkulu ezulwini ziyatsho isizatho sokuthi simkhonze: “Ufanele wena Nkosi yethu loNkulunkulu wethu, ukwamukela ubukhosi lodumo lamandla, ngoba nguwe owadala izinto zonke, langenxa yentando yakho zabakhona zadalwa.” (Isambulo 4:11). {GC 436.2}IEP 436.2

Kusambulo 14, abantu bayatshelwa ukuthi kumele bakhonze uMdali, njalo isiprofethi siyaveza iqula lalabo, ngenxa yendaba yengilosi lezi ezintathu, abagcina imithetho kaNkulunkulu. Omunye wemithetho leyi uveza sobala uNkulunkulu njengoMdali. Umthetho wesine uthi: “Usuku lwesikhombisa luliSabatha lweNkosi uNkulunkulu wenu...ngoba ngensuku eziyisithupha iNkosi yenza izulu lomhlaba lolwandle lakho konke okukukho, yaphumula ngosuku lwesikhombisa, ngalokho iNkosi yalubusisa usuku lwesikhombisa, yalwenza lwabangcwele.” (Eksodusi 20:8-11). Mayelana leSabatha iNkosi iyaqhubeka isithi, “luphawu...ukwenzela ukuthi lazi ukuthi ngiyiNkosi uNkulunkulu wenu.” (Hezekeli 20:20). Njalo isizatho esinikiweyo yikuthi: “Ngoba ngensuku eziyisithupha iNkosi yenza izulu lomhlaba, kodwa ngosuku lwesikhombisa yaphumula, yatshaphuluka.” (Eksodusi 31:17). {GC 437.1}IEP 437.1

“Ukuqakatheka kweSabatha njengesikhumbuzo sokudala yikuthi lihlala lisikhumbuza isizatho sokuba sikhonze uNkulunkulu kuphela” ngoba unguMdali, njalo siyizidalwa zakhe. “Isabatha ngakhoke limi njengensika yokukhonza, ngoba lisifundisa iqiniso leli ngendlela edlula zonke, njalo akula eyinye into eyenza njalo. Isizatho seqiniso sokukhonza, hatshi kuphela ngosuku lwesikhombisa kodwa esokukhonza konke, sitholakala ekwahlukaniseni phakathi koMdali lezidalwa zakhe. Iqiniso leli ngeke lidlule, njalo akumelanga likhohlakale.” (J.N. Andrews, History of the Sabbath, chapter 27.) Kwakungenxa yesizatho sokuthi lokhu kuhlale kusengqondweni zabantu, okwabangela ukuthi uNkulunkulu abanike usuku lweSabatha ensimini yaseEdeni, njalo nxa ulwazi lokuthi nguye uMdali luqhubeka lusiba yisizatho sokuthi simkhonze, usuku lweSabatha luzaqhubeka lusiba luphawu njalo lesikhumbuzo. Ngabe iSabatha laligcinwe ngumuntu wonke emhlabeni, imicabango yabantu lezifiso zabo zazizaholelwa kuMdali njengeNkosi okumele siyikhonze njalo siyidumise, njalo kwakungeke kube labakhonza izithombe, labangakholwayo njalo labahlamuki. Ukugcinwa kweSabatha kuluphawu lokulalendela uNkulunkulu weqiniso, “Yena owadala izulu lomhlaba, lolwandle, njalo lemithombo yamanzi.” Kusobala ukuthi udaba olubizela abantu ukuthi bakhonze uNkulunkulu njalo bagcine imilayo yakhe luzababizela ikakhulu ukuthi balandele umthetho wesine. {GC 437.2}IEP 437.2

Nxa kuqathaniswa labo abagcina imilayo kaNkulunkulu njalo abalokukholwa kukaJesu, udaba lwengilosi yesithathu luveza iqula, njalo kulezixwayiso ezesabekayo ezizakwehlela abantu ngenxa yamaphutha wabo: “Uba kukhona okhonza isilo lomfanekiso waso, obekwe uphawu ebunzini lakhe, kumbe esandleni sakhe, laye uzakunatha iwayini lolaka lukaNkulunkulu.” (Isambulo 14:9,10). Ingcazelo eqondileyo yemfanekiso esetshenzisiweyo ibalulekile ekuluzwisiseni udaba lolu. Kuyini okumelwe yisilo, umfanekiso waso isilo lesi, njalo lophawu lwesilo? {GC 438.1}IEP 438.1

Amazwi esiprofethi esithola khona izibonelo lezi aqala kuSambulo 12, lapho esivezelwe umgobho owazama ukubulala uKrestu nxa wayezalwa. Umgobho uchazwe ngokuthi umele uSathane (Isambulo 12:9); nguye owafuqa uHerodi ukuthi abulale uMsindisi. Kodwa isandla uSathane asisebenzisayo ukulwisana loKrestu njalo labantu bakhe kwakungumbuso weRoma, lapho inkolo yokukhonza izithixo eyayihamba phambili khona. Ngale indlela nxa umgobho umele uSathane, nxa sikhangele isehlakalo lesi umele njalo umbuso waseRoma owawubusa ngalesi isikhathi. {GC 438.2}IEP 438.2

KuSambulo 13:1-10 kuvezwe esinye isilo, “esifana lengwe,” esivezwe ngokuthi umgobho wasinika “amandla wawo, lesihlalo sawo sobukhosi, lokubusa okukhulu.” Umfanekiso lowu njengoba abavuseleli abanengi bebekukholwa, umele umbuso wabopapa, oyiwo owaphakama wathola amandla ayengaphansi kombuso weRoma. Nxa kuchazwa isilo lesi esifana lengwenya kuthiwa: “Isilo sanikwa umlomo wokukhuluma okuzincoma lenhlamba...Savula umlomo waso ukuhlambaza uNkulunkulu, lokuhlambaza ibizo lakhe lendawo ahlala kiyo kanye labahlala laye. Sanikwa futhi ukuba silwe labangcwele, sibahlule, sanikwa lamandla phezu kwemihlobo yonke, labantu, lezindimi, lezizwe.” Isiprofethi lesi esiphosa sifane xathu lendlela okuchazwe ngayo uphondo oluncane kuDanyeli 7, sikhomba embusweni wabopapa kungela kuthandabuza. {GC 439.1}IEP 439.1

“Sanikwa amandla ukuthi siqhubeke sibusa okwenyanga ezingamatshumi amane lambili.” Njalo umprofethi uthi, “Ngabona elinye lamakhanda walo lingathi lilenxeba elibangela ukufa.” Futhi: “Lowo othumbayo laye uzakuthunjwa, lowo obulala ngenkemba laye kumele abulawe ngenkemba.” Inyanga lezi ezingamatshumi amane lambili achaza isikhathi esifanayo leminyaka emithathu elengxenye etholakala kuDanyeli 7 kumbe amalanga angu1260, okuyisikhathi lapho amandla wabopapa ayezahlukumeza abantu bakaNkulunkulu. Isikhathi lesi ngendlela esichazwe ngayo ezahlukweni ezisemuva yaqala ngomnyaka ka A.D 538 yaphela ngomnyaka ka1798. Ngalesi isikhathi upapa wathunjwa ngamabutho welizwe laseFrance, okwabangela ukuthi umbuso wabopapa uthole inxeba lokufa, njalo amazwi athi, “lowo othumbayo laye uzakuthunjwa” agcwaliseka. {GC 439.2}IEP 439.2

Ngemva kwamazwi lawa kuyavezwa futhi omunye umfanekiso. Umprofethi uthi: “Ngasengibona esinye isilo siphuma emhlabeni silempondo ezimbili ezinjengezewundlu.” (Isambulo 13:11). Ukuphakama kwesilo lesi njalo lesimo saso kuyabonisa ukuthi ilizwe leli elichazwa lapha alifani lamanye avezwe phambi kwalo. Izizwe ezinkulu esezike zabusa umhlaba zavezwa kumprofethi uDanyeli njengezilo ezidla ezinye, ezaziphume “nxa imimoya evela inxa zonke, yayiqubula ulwandle olokhulu.” (Danyeli 7:2). KuSambulo 17 ingilosi yachaza ukuthi amanzi amele “abantu, lamaxuku, lezizwe njalo lezindimi.” (Sambulo 17:15). Imimoya imele ukulwisana lezimpi. Imimoya emine yezulu ehlokomisa ulwandle olukhulu imele izehlakalo ezimbi zokulwisana kwezizwe nxa zazithatha umbuso kwezinye. {GC 439.3}IEP 439.3

Kodwa isilo esilempondo ezingathi ngezewundlu sabonakala “siphuma emhlabathini.” Kulokuthi sehlule eminye imbuso ukuba sithole amandla waso, isizwe lesi esichaziweyo kumele siphume endaweni eyayingela bantu abanengi sikhule kancane kancane ngokuthula. Sasingeke siphume phakathi kwamazwe omhlaba wasendulo, lapho okwakulolwandle “lwabantu, lamaxuku, lezizwe njalo lendimi.” Kumele litholakale emazweni asentshonalanga. {GC 440.1}IEP 440.1

Yiliphi ilizwe emhlabeni omutsha elaliphakama ngomnyaka ka1798, elalibonisa ithemba lokuba lamandla njalo lodumo, njalo elalikhangelwe ngumhlaba wonke? Ukusetshenziswa komfanekiso lowu kwenza kubesobala. Kulelizwe elilodwa kuphela, elisuthisa lokhu okuchazwe yisiprofethi lesi, amazwi lawa akhomba ngokungathandabuzi elizweni lase America. Ezikhathini ezinengi amazwi kamambuleli alokusetshenziswa ngabalobi bembali nxa bechaza indlela ilizwe leli elaphakama ngayo. Isilo lesi sabonakala “siphuma emhlabeni;” njalo nxa silandela amazwi walabo abatolikayo, ibala elisetshenziswe lapha elithi “siphuma” limele ukuthi “ukuhluma njengesihlahlakazana.” Njalo njengoba sesibonile, ilizwe leli kumele liphakame endaweni eyayingela bantu ngaphambilini. Omunye wabalobi abadumileyo nxa ebhala ngembali yelizwe laseAmerica uthi: “imfihlo yokuphakama kwalo endaweni engela bantu” njalo uthi “njengentanga ensitha sakhula saba lilizwe elikhulu.” — (G.A. Townsend, The New World Compared with the Old, page 462). Elinye lamaphephandaba laseEurope ngomnyaka ka1850 labhala ngelizwe laseAmerica njengombuso oligugu, owawu “phakama” njalo “ngaphansi kokuthula komhlaba nsuku zonke lisengeza amandla walo.” (The Dublin Nation). UEdward Everett, nxa wayebhala encoma labo abasungula ilizwe leli wathi: “Badinga yini indawo ethuleyo, eyayingahlukuluzi muntu ngokucatsha kwayo, njalo eyayiphephile ekufihlakaleni kwayo, lapho ibandla elincane laseLeyden elalizakholisa ukukhululeka komzwangedwa? Khangela indawo ezinkulu, ngokunqoba okuthuleyo...abathwalele khona iziphambano! - (Speech delivered at Plymouth, Massachusetts, Dec. 22, 1824, page 11). {GC 440.2}IEP 440.2

“Njalo lalilempondo ezimbili ezingathi ngezewundlu.” Impondo lezi ezingathi ngezewundlu zibonisa ubutsha, lokubamsulwa njalo lokulunga, okuchaza ngokufaneleyo isimo selizwe laseAmerica elavezwa ngumprofethi njengokuthi laliphuma ngomnyaka ka1798. Phakathi kweziphepheli zamaKrestu ezabalekela elizweni laseAmerica njalo abadinga ukuthula ngokuphuma ekuhlukunyuzweni phakathi kwezandla zababusi njalo lochuku lwamapristi kwakulabanengi abazimisela ukusungula umbuso owaweyame phezu kwensika yokukhululeka kwezombuso njalo lakwezokholo. Imibono yabo yafakwa phakathi kwencwadi ekhomba ukukhululwa kwabo, echaza sobala ukuthi “bonke abantu badalwe ngokulingana” njalo balelungelo “lokuphila, lokukhululeka, njalo lelungelo lokudinga injabulo yabo.” Njalo isisekelo selizwe siyanika abantu ilungelo lokuzibusa, ngokubeka ukuthi abathungameli ababezakhethwa ngabantu yibo ababezabeka imithetho. Ukukhululeka kwezokukholwa lakho kwamiswa, wonke umuntu wanikwa imvumo yokukhonza uNkulunkulu ngendlela ayeholwa ngayo ngumzwangedwa wakhe. Ukukhululeka kwezombusazwe lakwezokholo kwaba yinsika yelizwe leli. Izinto lezi yizo eziyimfihlo yamandla welizwe leli njalo lokuphumelela kwalo. Bonke abahlukumezekileyo emazweni amanengi amaKrestu benelisa ukuthola indawo yokuphephela lapha. Izigidi zabantu sezidinge ukuphepha lapha, njalo ilizwe laseAmerica selikhule lathola indawo phakathi kwamazwe alamandla emhlabeni wonke. {GC 441.1}IEP 441.1

Kodwa isilo esilempondo ezinjengezewundlu “sakhuluma njengomgobho.” Njalo sasebenzisa wonke amandla wesilo sakuqala, njalo senza umhlaba kanye labo bonke abaphila kuwo ukuthi bakhonze isilo sakuqala, esilenxeba lokufa elapholayo; ...lisithi kibo bonke abaphila emhlabeni, ukuthi kufanele benze umfanekiso wesilo, esasithole inxeba ngenkemba, njalo saphila.” (Sambulo 13:11-14). {GC 441.2}IEP 441.2

Impondo lezi ezifana lezewundlu njalo lelizwi lomgobho kuveza ukwehlukana phakathi kwalokho ilizwe leli elasungulwa ukuthi likuvikele lalokho elizaqala ukukwenza. Lokho okuchazwe “njengokukhuluma” kwelizwe leli kuchaza izenzo zababusi balo ngokubeka kwabo imithetho njalo lemithethwandaba yabo. Ngokwenza izenzo lezi kuzabangela ukuthi imfundiso lezi ezasetshenziswa ukwakha ilizwe lile zibonakale njengamanga. Amazwi wokuthi lizakhuluma njengomgobho njalo lisebenzise wonke amandla wesilo sakuqala aveza sobala inguquko ezabakhona lapho okuzavuka khona umoya wokungamukelani njalo lokuhlukunyezwa kwabantu okwakusemazweni lawa amelwe ngumgobho njalo lesilo lesi esifana lengwe. Njalo lamazwi athi isilo lesi esilempondo ezimbili “senza ukuthi umhlaba labo bonke abahlala kuwo ukuthi bakhonze isilo sakuqala” aveza ukuthi amandla welizwe leli azasetshenziswa ukuletha indlela yokukhonza ezabe iphakamisa upapa. {GC 442.1}IEP 442.1

Isenzo esinjalo sizabe siphikisana lemithetho yelizwe leli, njalo lenhlanganiso zalo ezikhululekileyo, njalo lamazwi acolekileyo asencwadini yokukhululeka kwelizwe leli. Labo abasungula ilizwe leli benza ngokuhlakanipha imizamo yokwenqabela ibandla ukuthi lisebenzise amandla welizwe, ngoba babesazi ukuthi umphumela wokuvumela lokhu uba yikuhlukumeza labo abangavumelani lebandla. Isisekelo selizwe sithi” iphalamende ayisoke ihlahle umthetho osekela ukwakhiwa kwenkolo, kumbe evimbela ukukhululeka kwabantu ekukhonzeni kwabo,” njalo lokuthi “akusoke kube lemihloliso esetshenziswayo ephathelene lenkolo ezadinga ukuthi abantu badlule kiyo ukuba bathole izikhundla kwezombusazwe phakathi kwelizwe laseAmerica.” Kuphela ngokwephula yonke leyi imithetho, kuzakwenzeka ukuthi abantu babanjwe ngamandla ukuthi balandele inkolo ethile. Kodwa inguquko leyi ilingana lomfanekiso osetshenzisiweyo. Isilo lesi silempondo ezifana lezewundlu, ngokubunjwa kwalo ilizwe leli lilesimo esimsulwa, lithobekile njalo alilangozi, kodwa lizakhuluma njengomgobho. {GC 442.2}IEP 442.2

“Lisithi kulabo abakhileyo emhlabeni, ukuthi kumele bayenze umfanekiso wesilo.” Lapha kuvezwe sobala indlela yokubusa elizweni lapho amandla wokubeka imithetho asezandleni zabantu khona, okuyindlela esobala echaza ukuthi ilizwe elivezwe lapha ngelaseAmerica. {GC 442.3}IEP 442.3

Kodwa uyini “umfanekiso wesilo”? njalo uzakwenziwa njani? Umfanekiso lowu uzakwenziwa yisilo lesi esilempondo ezimbili, njalo ungumfanekiso owenzelwe isilo sakuqala. Ubizwa njalo ngokuthi ngumfanekiso wesilo. Kutsho ukuthi nxa sifuna ukwazi ukuthi umfanekiso lowu uyini njalo lokuthi uzabunjwa njani kumele sihlolisise isimo sesilo sakuqala okungumbuso wabo papa. {GC 443.1}IEP 443.1

Nxa ibandla lakuqala laseliphambuke eqinisweni leBhayibhili, ngokwamukela amasiko alabo abakhonza izithombe, uMoya kaNkulunkulu wasuswa phakathi kwalo, njalo ukwenzela ukuthi lilawule imizwangedwa yabantu, laqala ukudinga amandla kubabusi. Umphumela wakhona waba yikubunjwa kwesihlalo sikapapa, lapho kwasekulebandla elalilawula amandla welizwe njalo elalisebenzisa amandla lawa ukujezisa labo ababengavumelani lalo. Ukwenzela ukuthi ilizwe laseAmerica libumbe umfanekiso wesilo, amandla webandla kumele alawule amandla wezombusazwe, ukwenzela ukuthi amandla welizwe asetshenziswe libandla ukwenza lokho elikufisayo. {GC 443.2}IEP 443.2

Kuzo zonke izikhathi lapho ibandla elithole khona amandla welizwe, liwasebenzise ukujezisa labo abangavumelani lemfundiso yalo. Amabandla asungulwa ngabaVuseleli aqhubeke emanyathelweni ebandla leRoma awokudinga ubungane lababusi bomhlaba njalo lawo asebonisile izifiso ezifananayo ezizanyathezela amalungelo wabantu wokukhonza uNkulunkulu ngendlela abafuna ngayo. Isibonelo salokhu sitholakala kulokhu okwenziwa libandla laseNgilandi kulabo ababengavumelani lemfundiso yebandla leli. Okweminyaka eminengi kusiyafika emnyakeni ka1700 abantu abanengi babanjwa ngamandla ukuthi babaleke emabandleni wabo, njalo abanengi okugoqela abafundisi lamalunga ebandla, badlula phakathi kobunzima abanye baphoselwa emajele njalo abanye babulawa ngenxa yokuthi babekhethe ukulandela umzwangedwa wabo. {GC 443.3}IEP 443.3

Kwakungenxa yokuyekethisa okwabangela ukuthi ibandla lakuqala lifune ukuxhaswa ngababusi, njalo lokhu kwavula indlela yokuthi kwakhiwe isihlalo sikapapa, okuyiso isilo. UPhawuli wathi: “Kuzaba lokwehlukana kuqala...njalo kwambulwe omubi indodana yokulahlwa.” (2 Thesalonika 2:3). Ngakhoke ukuyekethisa kwebandla kuzaphendla indlela yokuthi kwenziwe umfanekiso wesilo. {GC 443.4}IEP 443.4

IBhayibhili liyaveza ukuthi uKrestu engakezi kuzabakhona umumo kwezenkolo ofana lalowo owawukhona endulo ngaphansi kombuso webandla leRoma. “Yazi lokhu ukuthi ensukwini zokucina kuzafika izikhathi ezinzima. Ngoba abantu bazakuba ngabazithandayo, labathanda imali, labazigqajayo, labaziqakisayo, labathukayo, labangalaleli abazali babo, labangabongiyo, lababi, labangelathando, labanhliziyo zilukhuni, labahlebayo, labangazikhuziyo, labalolaka, labazonda okuhle. Labanikela abanye, labalamawala, labagcwele ukuzikhukhumeza, labathanda ukuzithokozisa kulokuthanda uNkulunkulu, labalesimo sokukholwa kodwa amandla akho bewaphika. Baxwaye abanjalo.” (2 Timothi 3:1-5). “UMoya utsho ngokusobala ukuba ngezikhathi zokucina abanye bazakumonyuka ekukholweni, balalele omoya abaduhisayo lezifundiso zabomoya ababi.” (1 Timothi 4:1). USathane uzasebenza “ngawo wonke amandla, lezibonakaliso lezimangaliso zamanga, langayo yonke inkohliso yokungalungi kulabo abamiselwe ukubhubha ngenxa yokuba bengavumanga ukuthanda iqiniso ukuze basiliswe. Ngakhoke uNkulunkulu ubathumele okudukisayo, ukuze bakholwe amanga.” (2 Thesalonika 2:9-11). Nxa isimo lesi sobubi sesifinyelelwe, umphumela ofanayo uzalandela njengasendulo. {GC 444.1}IEP 444.1

Ukwehlukana kwenkolo yamabandla alamuhla kubonakala emehlweni wabantu abanengi njengobufakazi bokuthi ngeke kwenzakale ukuthi amabandla lawa abambane. Kodwa okweminyaka eminengi emabandleni lawa sekube lesifiso esilokhe sikhula esokuwabambanisa phezu kwemfundiso abavumelana kizo. Ukwenzela ukuthi bathole ukubambana lokhu, inkulumo ezimayelana lemigca leyi abangavumelani kuyo, kumele ibekwe eceleni kungakhathelekile ukuthi iphuma eBhayibhilini. {GC 444.2}IEP 444.2

UCharles Beecher, nxa wayetshumayela ngomnyaka ka1846, watsho ukuthi umsebenzi “wamabandla asungulwa ngabaVuseleli, awubunjwangwa kuphela ngaphansi kokwesaba kwabantu, kodwa amabandla lawa aphila njalo ahamba ngaphansi kwesimo esingalunganga, njalo bahlezi belandela imizwa yabo emibi ukwenzela ukuthi bafihle iqiniso, njalo bakhothamele amandla wokuyekethisa iqiniso. Kwakungasiyo yini indlela izinto ezayenzakala ngayo ebandleni leRoma? Asiphili impilo efananayo yini lamuhla? Njalo sibonani okuzayo phambi kwethu? Omunye umhlangano wokubambana! Lapho umhlaba wonke ozabuthana khona! Ukubambana kwamabandla, njalo lemfundiso eyodwa!” (Sermon on The Bible a Sufficient Creed,” delivered at Fort Wayne, Indiana, Feb. 22, 1846.) Nxa lokhu sekwenzakele, ukwenzela ukuthi kube lokukholwa okufananayo emabandleni, kuzabe sekuseduze lokuthi basebenzise udlame. {GC 444.3}IEP 444.3

Nxa amabandla amakhulu aselizweni laseAmerica, esebambene ngaphansi kwemfundiso lezi abalazo ezihambelanayo, bezadonsela ababusi ukuthi bafake imithetho yabo njalo lokuthi baqinise amabandla wabo, kulapho ke ilizwe laseAmerica elakhiwe phezu kwenkolo yabaVuseleli elizabe selibumbe umfanekiso wabathungameli beRoma, njalo ukuhlukunyezwa kwalabo abayala ukukulandela lokhu kuzaba ngumphumela wakhona ozalandela. {GC 445.1} IEP 445.1

Isilo esilempondo ezimbili “senza futhi ukuthi bonke, abancinyane labakhulu, abanothileyo labayanga, abakhululekileyo lezigqili, bathole uphawu esandleni sokunene loba ebunzini, ukuba kungabi khona othengayo loba othengisayo, uba engelalo uphawu olulibizo lesilo, loba isibalo sebizo laso.” (Isambulo 13:16,17). Isixwayiso sengilosi yesithathu sithi: “Uba kukhona okhonza isilo lomfanekiso waso, obekwe uphawu ebunzini lakhe kumbe esandleni sakhe, laye uzakunatha iwayini lolaka lukaNkulunkulu elilungisiweyo enkezweni yolaka lwakhe.” “Isilo” esichazwe edabeni lolu, esiyenzwa ukuthi sikhonzwe ngumuntu wonke ngenxa yamandla wesilo esilempondo ezimbili, yisilo sakuqala kumbe isilo esingathi yingwe esichazwa kuSambulo 13, okuveza isihlalo sabopapa. “Umfanekiso wesilo” umele isimo senkolo yebandla esizakwakhiwa ngamabandla lawa asungulwa ngabaVuseleli lapho amabandla lawa azadinga ubungane bombuso welizwe ukwenzela ukuthi benelise ukufaka imithetho elizweni esekela imfundiso yabo. “Uphawu lwesilo” khona sizaluchaza ukuthi luyini. {GC 445.2}IEP 445.2

Ngemva kwesixwayiso sokuthi abantu bangakhonzi isilo njalo lomfanekiso waso isiprofethi siyaqhubeka sisithi: “Nanti ithuba lokubekezela kwabangcwele, labo abagcina imilayo kaNkulunkulu lokukholwa kukaJesu.” (Sambulo 14:12). Njengoba labo abagcina imilayo kaNkulunkulu beqathaniswe lalabo abakhonza isilo lomfanekiso waso njalo abathola uphawu lwaso, kuyalandelake ukuthi ukugcina umthetho kaNkulunkulu ngakolunye uhlangothi, njalo lokuwephula ngakolunye uhlangothi, kuzabangumehluko phakathi kwalabo abakhonza uNkulunkulu njalo lalabo abakhonza isilo. {GC 445.3}IEP 445.3

Isimo esimqoka esibumba isilo, njalo lomfanekiso waso, yikwephula imilayo kaNkulunkulu. UDanyeli, nxa ekhuluma ngophondo oluncane olumele isihlalo sikapapa weRoma: “Uzacabanga ukuguqula izikhathi lomthetho.” (Danyeli 7:25). Njalo uPhawuli wachaza amandla afananayo ngokuthi “yindoda yesono,” owayezaziphakamisa phezu kaNkulunkulu. Amazwi esiprofethi endaweni ezitshiyeneyo alotshelwe ukuxhasa amanye. Kuphela ngokuguqula umthetho kaNkulunkulu umbuso wabopapa yikho lapho owawungenelisa ukuziphakamisa phezu kaNkulunkulu; njalo bonke ngemva kokwazi iqiniso abazimisela ukugcina umthetho lowu osuguquliwe bazabe benika udumo emandleni lawa awuguqulayo. Isenzo esinjalo esokulandela imithetho kapapa sizabe siluphawu lokuhlonipha upapa endaweni kaNkulunkulu. {GC 446.1}IEP 446.1

Opapa sebeke bazama ukuguqula umthetho kaNkulunkulu. Umlayo wesibili owenqabela abantu ukuthi bakhonze izithombe, sebawukhipha emilayweni esetshenziswa libandla leRoma, njalo lomthetho wesine sewaguqulwa ukwenzela ukuthi benelise ukugcina usuku lwakuqala lweviki endaweni yosoku lwesine njengosuku lweSabatha. Kodwa abathungameli bebandla leRoma bayatsho ukuthi isizatho sokukhipha umthetho wesibili yikuthi awulamsebenzi, ngoba uphakathi kowokuqala, njalo lokuthi bona bafaka umthetho ngendlela uNkulunkulu ayefuna ukuthi uzwisiseke ngayo. Lokhu ngeke kube lutshintsho oluvezwe emazwini esiprofethi. Kumele kube lutshintsho abaluhlosileyo, njalo olwenziwa ngamabomo: “Uzacabanga ukutshintsha izikhathi njalo lomthetho.” Utshintsho abalwenza emthethweni wesine lugcwalisa isiprofethi lesi. Ngoba isizatho abasinikayo kulokhu yikuthi ibandla lilamandla wokukwenza lokhu. Lapha babonisa ukuthi bacabanga ukuthi amandla kapapa aphezu kwakaNkulunkulu. {GC 446.2}IEP 446.2

Nxa labo abakhonza uNkulunkulu bezabonakala ngenxa yokugcina umthetho wesine, njengoba lokhu kuluphawu lwamandla wakhe wokudala njalo lobufakazi bokuthi kumele akhonzwe ngabantu bonke, ngakolunye uhlangothi labo abakhonza isilo bazabonakala ngemizamo yabo yokunyathezela isikhumbuzo soMdali, ukwenzela ukuthi baphakamise usuku olwafakwa libandla leRoma. Kwakungenxa yokufuna ukuphakamisa usuku lweSonto okwenza ukuthi upapa aqale ukuletha imfundiso yakhe yokuziphakamisa, njalo isenzo sakuqala ngemva kokuthola amandla welizwe kwakuyikubamba ngamandla umuntu wonke ukuthi agcine usuku lweSonto “njengosuku lweNkosi.” Kodwa IBhayibhili likhomba usuku lwesikhombisa, hatshi olwakuqala njengosuku lweNkosi. UKrestu wathi: “iNdodana yomuntu iyiNkosi futhi yeSabatha.” Umthetho wesine uthi: “Usuku lwesikhombisa luliSabatha leNkosi.” Njalo iNkosi nxa ikhuluma ngomprofethi uIsaya ithi: “Usuku lwami olungcwele.” (Marko 2:28; Isaya 58:13). {GC 446.3}IEP 446.3

Isizatho esivame ukusetshenziswa esokuthi uKrestu watshintsha usuku lweSabatha siphikiswa ngamazwi wakhe. Nxa wayetshumayela entabeni uKrestu wathi: “Lingathi ngize ukuchitha umlayo ingabe abaprofethi, angizanga ukuchitha, kodwa ngize ukugcwalisa. Ngoba ngiqinisile ngithi kini, Kuze kudlule izulu lomhlaba kakusoze kudlule ibadlana libe linye ingabe lecwatshana libe linye lomlayo, kuze kwenzakale konke. Ngakho lowo owephula owodwa kulimilayo emincinyane, afundise abantu njalo, uzakuthiwa ngomncinyane embusweni wezulu, kodwa oyenzayo ayifundise, lowo uzakuthiwa mkhulu embusweni wezulu.” (Mathewu 5:17-19). {GC 447.1}IEP 447.1

Kuliqiniso elivame ukuvunywa ngabantu abanengi abasemabandleni akhonza ngosuku lweSonto ukuthi iBhayibhili aliniki imvumo yokuguqulwa kweSabatha. Lokhu kubhalwe kwacaca encwadini ezibhalwa yinhlanganiso yeAmerican Tract Society njalo leye American Sunday School Union. Eyinye yencwadi lezi iveza ukuthi “iThestamente eLitsha alilangitsho ibala elilodwa elitshela abantu ukuthi bagcine usuku lweSonto, kumbe imithetho emayelana lokuthi ligcinwe njani.”- (George Elliott, The Abiding Sabbath, page 184). {GC 447.2}IEP 447.2

Eyinye incwadi ithi: “Kuze kuyefika isikhathi lapho uKrestu afa khona, akulanguquko eyayiyenziwe esukwini lolu, njalo nxa silandela imbhalo, abafundi bakhe abazange balutshintshe...njalo abanikanga ilizwi lokuthi kumele balahle usuku lwesikhombisa bagcine usuku lwakuqala njengosuku lweSabatha.” — (A.E. Waffle, The Lord’s Day, pages 186-188). {GC 447.3}IEP 447.3

Abathungameli bebandla leRoma bayavuma ukuthi inguquko eyenziwa ngosuku lweSabatha yenziwa libandla labo, njalo bayatsho ukuthi amabandla lawa asungulwa ngabaVuseleli ngokugcina usuku lweSonto, baphakamisa amandla webandla labo. Encwadini yebandla leRoma ebizwa ngokuthi yiCatholic Catechism of Christian Religion, nxa babephendula umbuzo mayelana losuku okumele luhlonitshwe oluchazwa ngumthetho wesine, kubhalwe amazwi alandelayo: “Ngaphansi komthetho wakudala, usuku lwangeSabatha yilo olwalubusisiwe, kodwa ibandla, ngemva kokutshelwa nguJesu, njalo ngenxa yokuthunganyelwa nguMoya oyiNgcwele, selafaka usuku lweSonto endaweni yosuku lwangeSabatha, ngaleso sizatho khathesi sigcina usuku lwakuqala lweviki hatshi olwesikhombisa. Usuku lweSonto lutsho ukuthi njalo manje lusuku lweNkosi.” {GC 447.4}IEP 447.4

Njengesibonelo samandla webandla leRoma, abalobi baleli bandla basebenzisa “isenzo lesi sokuguqula usuku lweSabatha lusiyakuba ngeSonto, okuvunyelwa ngamabandla wonke; ... ngoba ngokukhonza ngeSonto, bayakhothamela amandla webandla wokugcoba inkonzo njalo lokubathungamela ngaphansi kwesono.” (Henry Tuberville, An Abridgment of the Christian Doctrine, page 58). Kuyine ke ukuguqulwa kosuku lweSabatha, kuluphawu olubonisa amandla webandla leRoma- “okuyilo uphawu lwesilo”? {GC 448.1}IEP 448.1

Ibandla leRoma alikami ukukholwa ukuthi yilo elilamandla emhlabeni; njalo nxa umhlaba wonke wamabandla asungulwa ngabaVuseleli usamukela usuku lwesabatha abazibumbela lona, bona bephika iSabatha elivezwe eBhayibhilini, ngamanye amazwi bayavuma lokhu okukholwa libandla leRoma. Sebengathi basebenzisa amandla wamasiko njalo labokhokho bebandla awokwenza utshintsho lolu, kodwa ngokwenza njalo bayakhohlwa isizatho esisodwa esibahlukanisa leRoma, okuyikuthi “iBhayibhili njalo iBhayibhili kuphela, yilo inkolo yabaVuseleli.” Abathungameli bebandla leRoma bayananzelela ukuthi bayazikhohlisa, bayazinikela ukuthi bavale amehlo wabo bengaboni ubufakazi bokuthi lokhu abakukholwayo akukho eBhayibhilini. Nxa usuku lweSonto lulokhe lusamukelwa njengosuku lweSabatha abathungameli bebandla bayathokoza ngoba balesiqiniseko sokuthi ekuzineni amabandla wonke azakuba ngaphansi kwebandla leRoma. {GC 448.2}IEP 448.2

Abathungameli bebandla leRoma bayatsho ukuthi “ukukhonza ngosuku lweSonto okwenziwa ngamabandla lawa yindlela abahlonipha ngayo, loba bengathandi amandla webandla leRoma.” (Mgr. Segur, Plain Talk About the Protestantism of Today, page 213). Ukubekwa komthetho wokuthi abantu bakhonze ngeSonto okuzakwenziwa ngamabandla lawa, kuyikubeka umthetho wokuthi abantu bakhonze isihlalo sikapapa, okutsho ukukhonza isilo. Labo abathi ngokuzwisisa iqiniso lomthetho wesine, abakhetha ukugcina iSabatha lamanga kulokugcina eleqiniso ngale indlela bakhonza amandla ayiwo aletha inguquko leyi. Kodwa esenzweni lesi sokubeka umthetho wokukhonza besebenzisa ababusi, amabandla ngokwawo azabumba umfanekiso wesilo, ngakhoke ukubekwa komthetho wokukhonza ngeSonto elizweni laseAmerica kuzabe kuyikubeka umthetho wokukhonza isilo lomfanekiso waso. {GC 448.3}IEP 448.3

Kodwa amaKrestu asendulo ayegcina usuku lwangeSonto ngoba babecabanga ukuthi ngokwenza njalo babegcina usuku lweSabatha oluvezwe eBhayibhilini, njalo kukhona amaKrestu aqotho manje emabandleni wonke, okugoqela ibandla leRoma, abakholwa ngokwethembeka ukuthi usuku lweSonto luliSabatha elitholakala eBhayibhilini. UNkulunkulu uyamukela ukungazi kwabo njalo lokuzimisela kwabo phambi kwakhe. Kodwa nxa usuku lweSonto selufakwe ngokomthetho ukuthi sekulusuku lokukhonza njalo umhlaba sewazisiwe ngeSabatha leqiniso, ngaleso isikhathi wonke umuntu ozakwephula umlayo kaNkulunkulu, ukwenzela ukuthi alandele usuku olungabekwanga ngamanye amandla kodwa amandla webandla leRoma, ngokwenza njalo uzakhonza upapa endaweni kaNkulunkulu. Lowo muntu uzabe ekhonza iRoma, njalo lamandla abeka njalo agcoba usuku lolu olubekwe libandla leRoma. Lowo muntu uzabe ekhonza isilo njalo lomfanekiso waso. Nxa abantu ngalesi isikhathi bephika usuku uNkulunkulu alubiza ngokuthi luphawu lwamandla wakhe, njalo behlonipha endaweni yalo lokho okukhethwe libandla leRoma njengophawu lwamandla walo, ngale indlela bazakwamukela uphawu lokukhothamela iRoma, “okuyilo uphawu lwesilo.” Njalo akusoke kwenzakale kuzekuyefika isikhathi lapho abantu bonke abazachazelwa khona, njalo abazafika esikhathini lapho okuzamele bakhethe khona phakathi kwemithetho kaNkulunkulu lemithetho yabantu, yikho lapho bonke abantu abazaqhubeka besephula umthetho kaNkulunkulu abazakwamukela khona “uphawu lwesilo.” {GC 449.1}IEP 449.1

Isixwayiso esesabeka okwedlula zonke esesike saphiwa uluntu sitholakala edabeni lwengilosi yesithathu. Kumele kube yisono esikhulu okwedlula zonke esiletha ulaka lukaNkulunkulu olungaxutshaniswanga lomusa. Abantu akumelanga batshiywe ebunyameni mayelana lendaba leyi eqakatheke kangaka, isixwayiso esiveza isono lesi kumele sinikwe umhlaba wonke kungakafiki ukwahlulela kukaNkulunkulu, ukwenzela ukuthi bonke abantu bazi ukuthi yindaba kufanele bazihluphe, njalo bathole ithuba lokubalekela lokhu. Amazwi esiprofethi ayachaza ukuthi ingilosi yakuqala izakwenza isimemezelo sayo “kwabakhileyo emhlabeni, kuzo zonke izizwe, lemihlobo, lezindimi labantu bonke.” Isixwayiso sengilosi yesithathu, esigoqela udaba lwengilosi lezi ezintathu, laso kumele sifinyelele umhlaba wonke. Sivezwe emazwini esiprofethi ngokuthi sikhulunywa ngelizwi elikhulu, yingilosi endiza emkhathini, njalo sizakwenza ukuthi umhlaba wonke ulalele. {GC 449.2}IEP 449.2

Ekucineni wonke amaKrestu azaba semaqenjini amabili, labo abagcina imilayo kaNkulunkulu njalo lokholo lukaJesu, njalo lalabo abakhonza isilo lomfanekiso waso njalo abazakwamukela uphawu lwakhe. Loba nje ibandla kanye lombuso kuzasebenzisana ndawonye ukubamba ngamandla “abakhulu labancane, izinothi labaswelayo, izigqili labakhululekileyo” (Sambulo 13:16), ukuthi bamukele “uphawu lwesilo,” loba kunjalo abantu bakaNkulunkulu abasoke balwamukele. Umprofethi wasePatmosi “ubona labo abasebesinqobile isilo lomfanekiso waso lesibalo sebizo laso bemi eceleni kolwandle lwengilazi, bephethe amachacho kaNkulunkulu” njalo behlabela ingoma kaMose leyeWundlu. (Sambulo 15:2,3). {GC 450.1}IEP 450.1