Isahluko 40—Ukukhululwa Kwabantu BakaNkulunkulu

Ngesikhathi lapho ukuvikela okuvela emthethweni yelizwe sekususiwe kulabo abalandela imilayo kaNkulunkulu, kuzakuba khona endaweni ezehlukeneyo, ukusebenzisana phakathi kwabantu abazabe besenza imizamo yokuthi babulawe. Nxa isikhathi esibekelwe ukubulawa kwabo silokhe sisondela, abantu bazabuya lamacebo wokuthi babulale iqula labantu laba abazabe belenkolo engajwayelekanga emehlweni abo. Kuzahlelwa ukuthi bahlaselwe ngobusuku obubodwa, ukwenzela ukuthi kuthuliswe amazwi abantu laba abangavumelani lozulu wonke njalo abahlala belamazwi okukhuza isono. {GC 635.1}IEP 635.1

Abantu bakaNkulunkulu, abanye abazabe besentolongweni, abanye becatshile ezihotsheni njalo lasezintabeni, bazabe belokhe bencenga ukuthi bavikelwe lizulu, ngesikhathi esifananayo endaweni zonke kuzabe kulamaqembu amadoda ahlomileyo, azabe efuqwa ngamadimoni, belungiselela umsebenzi wokubulala. Kungaphansi kwesikhathi lesi esinzima kangaka, lapho iNkosi yakoIsrayeli ezangenela khona ekukhululweni kwabakhethekileyo bayo. INkosi ithi: “Lizakuba lengoma, njengeyobusuku bokwehlukaniswa komkhosi, lokuthokoza kwenhliziyo njengohamba...esiya entabeni yeNkosi, eDwaleni lakoIsrayeli. INkosi izazwakalisa-ke ilizwi layo elilodumo, ibonakalise ukwehla kwengalo yayo, ngentukuthelo yolaka, lelangabi lomlilo oqothulayo, isivunguvungu, lezulu lesiphepho, langesiqhotho. Isaya 30:29,30. {GC 635.2}IEP 635.2

Ngokumemeza kokunqoba, langamazwi enhlamba njalo lawentukuthelo, amaxuku amadoda azabe eselungiselela ukubahlasela, lapho okuzaqubuka khona emhlabeni wonke umnyama, ojule okwedlula ubunyama obujwayele ukubonakala ebusuku kuphela. Ngemva kwalokho kuzabonakala umchilo wamakhosikazi, ozabe ukhazimula ngenkazimulo ephuma esihlalweni sikaNkulunkulu, uzagcwala indawo yonke kubonakale sengathi usibekela bonke abakhulekela ukukhululwa. Amaxuku abantu laba abalentukuthelo azakuma khonapho khonapho. Amazwi abo awokuhleka ulunya azahle aphele. Bazakhohlwa ngalabo abekade befuna ukubabulala. Ngamehlo agcwele ukwesaba bazakhangela isibonelo sesivumelwano sikaNkulunkulu njalo bazafisa ukuba bafihlwe phambi kwenkazimulo yaso ezabe ingakhangeleki. {GC 635.3}IEP 635.3

Abantwana bakaNkulunkulu bazakuzwa ilizwi, elingathi yingoma lisithi, “Khangelani phezulu,” njalo bazathi bekhangelisa amehlo abo ezulwini, babone umkhumbi wesithembiso. Amayezi abekade evale isibhakabhaka azasuswa, njalo njengoStefani bazakhangela phezulu babone inkazimulo kaNkulunkulu njalo leNdodana yomuntu ihleli esihlalweni sayo. Esimeni sakhe sobuNkulunkulu bazabona amanxeba okuhlazwa kwakhe, njalo endebeni zakhe bazakuzwa isicelo azasenza phambi kukaYise njalo laphambi kwezingilosi esokuthi: “Ngiyafisa ukuba labo, onginike bona, bebelami lapho engikhona.” Johane 17:24. Ngokwesibili ilizwi elingathi yingoma njalo elilokunqoba lizezwakala lisithi: “Bayeza! Bayeza! Bangcwele, balungile, njalo abalasici. Baligcinile ilizwi lokubekezela kwami; bazakuhamba phakathi kwezingilosi;” njalo indebe ezomileyo, njalo leziqhaqhazelayo ezalabo ababambelele ekukholweni kwabo zizamemeza amazwi okunqoba. {GC 636.1}IEP 636.1

Kuphakathi kobusuku lapho uNkulunkulu azabonakalisa khona amandla akhe okukhulula abantu bakhe. Ilanga liyaphuma, likhanyisa ngamandla alo wonke. Izibonakaliso zilandelana ngesiphangiphangi. Ababi bakhangela isehlakalo lesi ngokwesaba njalo langokumangala, kuthi ngakolunye uhlangothi abangcwele bakhangela ngentokozo ecolekileyo izibonakaliso zokukhululwa kwabo. Zonke izinto zemvelo zizabonakala sengathi sezisuke emgwaqweni wazo. Imifula iyama ukugeleza. Amayezi amnyama kakhulu aqala ukutshayana. Phakathi kwesibhakabhaka esibonakala sizondile kukhona isikhexe esilenkazimulo engachasisekiyo, lapho okuphuma khona ilizwi likaNkulunkulu elizwakala sengathi ngamanzi amanengi lisithi: “Sekuphelile.” Sambulo 16:17. {GC 636.2} IEP 636.2

Ilizwi lelo lizamazamisa izulu lomhlaba. Kubakhona ukuzamazama okukhulu, “kwasekusiba lokuzamazama komhlaba okulamandla kangaka, okukhula kangaka.” Sambulo 16:17,18. Isibhakabhaka sibonakala sengathi siyavuleka njalo sibuye sivaleke. Inkazimulo evelela esihlalweni sikaNkulunkulu ibonakala nxa isibhakabhaka silokhe sivuleka. Izintaba ziqhaqhazela njengomhlanga uvunguzwa ngumoya, njalo lamadwala awela endaweni zonke ngolaka. Kuzwakala umdumo ongathi ngowezulu elikhulu elizayo. Ulwandle luphenduka lube lolaka olwesabekayo. Kuzwakala ukukhala kwesivunguvungu sengathi ngamazwi amadimoni asemsebenzini wokubulala. Umhlaba wonke uyazula njalo uzamazame njengamagagasi olwandle. Umhlaba uqala ukudabuka. Kubonakale sengathi isisekelo sawo sesisiwa. Intaba ziqala ukutshona phansi. Izihlenge zonke ezihlala abantu ziyatshabalala. Indawo lapho okuma khona izikepe eseziphenduke zafana leSodoma ngenxa yobubi obukuzo ziginywa ngamagagasi olwandle. IBhabhiloni elikhulu selikhunjuliwe phambi kaNkulunkulu, “ukuba linikwe inkezo yewayini yolaka lwakhe olwesabekayo.” Amatshe esiqhotho esikhulu alesilinganiso sethalenta (34 kg) lawo azabe esenza umsebenzi wawo wokubhidliza. Sambulo 16:17,21. Amadolobho abekade elokuziqhenya emhlabeni atshabalaliswa alingane lenhlabathi. Izindlu ezifana lezamakhosi lapho abantu abachithe khona imali yabo ukwenzela ukuba basuthise inkanuko zabo, ziyaqephuka zibe ngamanxuwa phambi kwamehlo abo. Imiduli yentolongweni idabuka phakathi, njalo abantu bakaNkulunkulu, asebekade begcinwe lapha njengezibotshwa ngenxa yokholo lwabo, bayakukhululwa. {GC 636.3}IEP 636.3

Amangcwaba ayakuvuleka, njalo “abanengi babo abalele othulini lomhlaba...bazakuvuka, abanye besiya ekuphileni okunaphakade, njalo abanye bavukele ihlazo lokuhlekwa okunaphakade. Danyeli 12:2. Bonke abafe bekholwa udaba lwengilosi yesithathu baphuma emathuneni bekhazimulisiwe, ukuze bazwe isivumelwano sikaNkulunkulu sokuthula azasenza lalabo abagcine imilayo yakhe. “Ngitsho lalabo abamgwazayo” (Sambulo 1:7), labo abahleka ulunya njalo beyisa ubuhlungu uKrestu adlula kibo, labo bonke abaphikisa iqiniso ngodlakela, bayavuswa labo ukuze bambone uKrestu ebukhosini bakhe lokuthi babone inhlonipho ezanikwa labo abathembekileyo labalandela imilayo kaNkulunkulu. {GC 637:1}IEP 637.1

Amayezi amnyama alokhe evale isibhakabhaka, kodwa loba kunjalo ilanga lilokhe lithutsha phakathi kwamayezi, libonakala njengelihlo likaJehova elokuphindisela. Imbane eyesabekayo ilokhe itshaya emhlabeni wonke ize yembese umhlaba wonke ngengubo yomlilo. Phezu komdumo wezulu, amazwi angajwayelekanga njalo amabi azezwakala esitsho lokho okumele kwehlele abenzi bokubi. Amazwi lawa akhulunywayo awazwisiswa ngumuntu wonke, kodwa ezwakala ngokucaca endlebeni zabafundisi bamanga. Labo esikhathini esifitshane esiqeda kwedlula abebekade beziqhenya njalo belokuzithemba, ngenxa yodlakela abalwenze ebantwini bakaNkulunkulu abagcina imiyalo yakhe, ngalesi isikhathi sebegcwele ukumangala njalo lokwesaba okukhulu. Ukukhala kwabo kuzwakala phezu komsindo ozabe uvela emidumeni ezabe isenzakala. Amadimoni lawo azakwamukela ubuNkulunkulu bukaKrestu njalo aqhaqhazele phambi kwamandla akhe, ngesikhathi esifananayo abantu bazabe bebubula becela uzwelo ngaphansi kokwesaba okukhulu. {GC 637.2}IEP 637.2

Abaprofethi basendulo nxa babekhangele embonweni usuku lukaNkulunkulu bathi: “Qhinqani isililo, ngoba usuku lweNkosi lusondele; njengokuchitheka okuvela kuSomandla luzafika.” Isaya 13:6. “Ngena edwaleni, ucatshe othulini, ngenxa yokwesaba kweNkosi, langenxa yodumo lokuphakama kwayo. Amehlo aziqhenyayo omuntu azakwehliselwa phansi, lokuzikhukhumeza kwabantu kuzakhothanyiswa, leNkosi kuphela izaphakanyiswa ngalolosuku. Ngoba usuku lweNkosi yamabandla luzakuba phezu kwakhe wonke ozigqajayo lozikhukhumezayo, lumelane laye wonke ozophakamisayo, njalo athotshiswe.” “Ngalolosuku umuntu uzalahlela emagundwaneni lakubolulwane izithombe zakhe zesiliva lezithombe zakhe zegolide abazenzela yena ukuzikhonza, ukungena emifantwini yamadwala lezingoxweni zamawa, ngenxa yokwesabeka kweNkosi langenxa yodumo lokuphakama kwayo, lapho izavuka ukuqhaqhazelisa umhlaba. Isaya 2:10 -12,20,21. {GC 638.1}IEP 638.1

Phakathi laphakathi kwamayezi kubonakala insaba zenkanyezi ezabe ikhanyisa phose okuphindwe kane nxa kuqathaniswa lobumnyama obuzabe bukhona. Ukukhanya lokhe kuzakuza njengamazwi aletha ithemba njalo lentokozo ebantwaneni bakaNkulunkulu abathembekileyo, kodwa kuzaba ngamazwi alukhuni njalo lawolaka kulabo abephule imilayo kaNkulunkulu. Labo abadele konke ngenxa kaKrestu ngalesi isikhathi bazabe sebephephile, sengathi bacatshe endlini yeNkosi esithekileyo. Sebedlule phakathi kokuhlolwa, njalo phambi komhlaba laphambi kwabo bonke abaphike iqiniso bazabe bebonisile ukwethembeka kulowo owabafelayo. Sekulenguquko emangalisayo kulabo abazabe bekhethe ukubambelela ekwenzeni okuhle ngitsho laphambi kokufa. Ngesikhathi bengakhangelelanga bazabe sebekhululiwe ebunyameni njalo lasebubini babantu abekade sebephenduke baba ngamadimoni. Ubuso babo obukade bubunile njalo butshaziwe, khathesi buzabe sebucwebezela ngentokozo, lokumangala, lokukholwa njalo langothando. Amazwi abo aphakama ngengoma yokunqoba: “UNkulunkulu uyisiphephelo sethu lamandla ethu, ufumaniswa elusizo kakhulu ekuhluphekeni. Ngenxa yalokhu kasiyikwesaba ekuguqukeni komhlaba, lanxa izintaba zithwalelwa phakathi kolwandle, amanzi alo ehlokoma, ekhaphazela, izintaba zizamazama ngokukhukhumala kwalo.” Amahubo 46:1-3. {GC 638.2}IEP 638.2

Nxa amazwi lawa abonisa ukwethemba uNkulunkulu okungcwele esenyukela ezulwini, amayezi abuyela emuva, kubonakale isibhakabhaka esilezinkanyezi, ezikhazimula ngendlela emangalisayo nxa kuqathaniswa lesibhakabhaka esibonisa ubunyama lentukuthelo ngakolunye uhlangothi. Inkazimulo yomuzi ongcwele ibonakala iphuma emasangweni avuliweyo. Ngemva kwalokho kubonakala esibhakabhakeni isandla esithwele amatshe amabili azabe ephethwe elinye laba phezu kwelinye. Umprofethi uthi: “Lamazulu azatshumayela ukulunga kwakhe, ngoba uNkulunkulu ngokwakhe ungumahluleli.” Amahubo 50:6. Umthetho lowana ongcwele, oyikulunga kukaNkulunkulu, awakhulunywa phakathi kokuphazima njalo lemidumo entabeni yaseSinai njengomqondisi wempilo, khathesi uzaboniswa phambi kwabantu njengomthetho wokwahlulela. Isandla lesi sizavula amatshe lawa amabili, njalo kuzabonakala kiwo imilayo elitshumi, ezabe ingathi ibhalwe ngomlilo. Amazwi akhona acacile okokuthi wonke umuntu uyenelisa ukuwabala. Imikhumbulo izavuselelwa, bonke ubunyama bokukholwa amasiko njalo lemfundiso zamanga kuzasuswa engqondweni yomuntu wonke, njalo amazwi kaNkulunkulu alitshumi, angekho manengi, agoqela konke njalo alamandla, azabonakaliswa ukuze abonwe yibo bonke abakhileyo emhlabeni. {GC 639.1}IEP 639.1

Kunzima ukuchaza ukwesaba njalo lokudangala kwalabo abakade bephila impilo yokwephula imilayo kaNkulunkulu. UNkulunkulu wabanika umlayo wakhe, babelalo ithuba lokuqathanisa izimilo zabo lawo njalo babezafunda amaphutha wabo ithuba lisesekhona elokuthi bavume izono zabo njalo baguquke, kodwa ukwenzela ukuthi bathole uthando lomhlaba, babeka eceleni imfundiso yawo njalo bafundisa abanye ukuba bawephule. Benzile imizamo yokuthi babambe ngamandla abantwana bakaNkulunkulu ukuba bephule usuku lweSabatha. Khathesi babona amacala abo ngenxa yomthetho yena lo abawuphikileyo. Ngokucaca okukhulu bayazibonela ukuthi ngeke benze izaba. Bakhethile lowo abakade befuna ukumhlonipha njalo lokumkhonza. “Beselibuya libona umehluko phakathi kolungileyo lomubi, phakathi kokhonza uNkulunkulu lalowo ongamkhonziyo.” Malaki 3:18. {GC 639.2}IEP 639.2

Izitha zomlayo kaNkulunkulu, kusukela kubafundisi kusiya emalungeni ebandla, ngalesi isikhathi bazwisisa ngendlela entsha lokho okuliqiniso ndawonye lomsebenzi okwakumele bawenze. Babona sekungasela sikhathi sokulungisa amaphutha abo ukuthi iSabatha lomthetho wesine liluphawu lukaNkulunkulu ophilayo. Babona isikhathi sesiphelile iqiniso mayelana losuku lwabo abekade belenza isabatha njalo lokuthi bebesakhela phezu kwetshebetshebe. Bazananzelela ukuthi bebelwisana loNkulunkulu. Abaholi bamabandla bakhokhelele abantu ekulwahlweni ngesikhathi bona bebesithi babaholela eParadayisi. Kuphela ngosuku lokwahlulelwa kuzakwazakala ubukhulu bomlandu ophezu kwamahlombe alabo abanikwe izikhundla emabandleni njalo lobukhulu bomphumela wokungathembeki kwabo. Kuphela nxa sesisezulwini yikho esizananzelela khona intengo yokulahlekelwa ngumphefumulo owodwa. Kuzakwesabeka ukuhlulukelwa kwalowo uNkulunkulu azakuthi kuye: Suka phambi kwami wena sisebenzi esibi. {GC 640.1}IEP 640.1

Ilizwi likaNkulunkulu lizezwakala liphuma ezulwini, liveza usuku njalo lehola lokuza kukaJesu, njalo lizaphawula isivumelwano esiphakade phambi kwabantu bakhe. Njengomsindo womdumo wezulu omkhulu amazwi akhe azezwakala emhlabeni wonke. UIsrayeli kaNkulunkulu uzabe elalele, ebhekise amehlo akhe ezulwini. Ubuso babo buzakhazimuliswa yinkazimulo yakhe, njalo buzacwebezela njengobuso bukaMose nxa wayesehla entabeni yaseSinai. Abantu ababi abasoke benelise ukubakhangela ebusweni. Njalo ngesikhathi lapho isibusiso silethwa kulabo abahloniphe uNkulunkulu ngokugcina iSabatha lakhe ngcwele, kuzezwakala amazwi amakhulu okunqoba. {GC 640.2}IEP 640.2

Ngemva kwesikhatshana kubonakala iyezi elimnyama elincinyane, elizabe lingathi lilingana lengxenye yesandla somuntu. Leli kuliyezi eligombolozele uMsindisi nxa lisesekhatshana elizabonakala sengathi lembeswe yibunyama. Abantu bakaNkulunkulu bayabakwazi ukuthi lesi yisibonakaliso sokuza kweNdodana yomuntu. Ngokuthula okucolekileyo bayalikhangela nxa lilokhe lisondela emhlabeni, lilokhe likhula njalo likhazimula kakhulu nxa lisondela, lizelibonakale njengeyezi elikhulu elimhlophe, ngaphansi kwalo kulenkazimulo enjengomlilo ovuthayo, njalo phezu kwalo kulomchilo wamakhosikazi owesivumelwano. UJesu uphakathi kwalo iyezi leli njengomnqobi. Khathesi, kaseyiyo “iNdoda yensizi,” ukuba aphuze inkezo emunyu yokubuhlungu njalo lokuyangeka, uza njengomnqobi ezulwini njalo lasemhlabeni, ukuzokwahlulela abaphilayo labafileyo. “Uthembekile njalo ulungile,” “ngokulunga uyehlulela njalo ulwa impi.” Njalo “lamabutho ayesezulwini” (Sambulo 19:11,14) amlandela. Ngezingoma ezilobunandi basezulwini ingilosi, ngobunengi bazo obungelakubalwa, zihamba laye. Isibhakabhaka sibonakala sengathi sigcwele izidalwa ezicwebezelayo- “izinkulungwane ezilitshumi, lezinkulunkungwane zezinkulungwane.” Akukho usiba lomuntu olungenelisa ukuchaza isehlakalo lesi, ayikho lengqondo yenyama engaqedisisa ubuhle baso. “Inkazimulo yakhe yasibekela amazulu, umhlaba wagcwala indumiso yakhe. Ukucwazimula kwakhe kwakunjengokukhanya, imisebe yavela esandleni sakhe.” Habhakhukhi 3:3,4. Nxa amayezi lawa aphilayo elokhe esondela, wonke amehlo ayayibona iNkosi yokuphila. Awusekho umqhele wameva ukulimaza ikhanda lakhe elingcwele, kodwa kukhona umqhele wobukhosi ekhanda lakhe. Ubuso bakhe bukhanya okwedlula ukukhanya kwelanga emini enkulu. “Njalo esembhathweni lethangazini lakhe ulebizo elibhalwe ukuthi: INKOSI YAMAKHOSI LOMBUSI WABABUSI.” Sambulo 19:16. {GC 640.3}IEP 640.3

Phambi kwakhe “ubuso bonke buzaguquka bubune;” kulabo abaphika umusa wakhe kwehla ukwesaba okungapheliyo. “Inhliziyo izakuncibilika, njalo lamadolo atshayane ngokwesaba...njalo lobuso babo bonke buzaphenduka bube mnyama. Jeremiya 30:6, Nahume 2:10. Abalungileyo bazakhala ngokuqhaqhazela besithi: “Ngubani ozakwenelisa ukuma na?” Ingoma ebikade ihlatshelwa zingilosi izakuma, kubekhona isikhathi lapho kuthule kuthe cwaka. Ngemva kwalokho kube sekuzwakala ilizwi likaJesu lisithi: “Umusa wami ulifanele lina.” Ubuso babo bonke abangcwele buzakhazimula, njalo intokozo igcwale enhliziyweni zabo bonke. Ingilosi zizakhweza ingoma yazo zihlabele kakhulu nxa zilokhe zisondela emhlabeni. {GC 641.1}IEP 641.1

INkosi yamakhosi izakuza ngeyezi, igonjolezelwe ngumlilo ovuthayo. Isibhakabhaka sizagoqwa njengomqulu, lomhlaba uzaqhaqhazela phambi kwakhe, njalo lazo zoke intaba lezihlenge zizasuswa endaweni yazo. “UNkulunkulu wethu uzakuza, kayikuthula; umlilo phambi kwakhe uzaqothula, enhlangothini zonke zakhe kuzakuba lesiphepho esikhulu. Uzabiza amazulu ephezulu, lomhlaba, ukwahlulela abantu bakhe.” Amahubo 50:3,4. {GC 641.2}IEP 641.2

“Lamakhosi omhlaba lezikhulu, labanothileyo, lenduna ezinkulu, labalamandla, lazo zonke izigqili, labo bonke abakhululekileyo, bacatsha ezimbalwini lemadwaleni ezintaba, besithi ezintabeni lemadwaleni: Welani phezu kwethu, lisifihle ebusweni bakhe ohlezi esihlalweni sobukhosi, lelakeni lweWundlu; ngoba usuku olukhulu lolaka lwakhe selufikile; njalo ngubani olamandla okuma?” Sambulo 6:15-17. {GC 642.1}IEP 642.1

Konke ukuhleka ulunya lokuchothoza kuzabe sekumile. Zonke indebe ebezithanda ukukhuluma amanga zizathula cwaka. Konke ukulwa ngezikhali, lomsindo wempi, “olomsindo wokudideka, njalo lezembatho ezigcwele igazi” (Isaya 9:5), uzathula. Akukho okunye okuzezwakala ngalesi isikhathi ngaphandle kwamazwi omthandazo lamazwi okukhala lokububula. Ukukhala lokhu kuzaphuma emilonyeni ebikade ihleka ulunya: “Usuku lolaka lwakhe olukhulu selufikile, ngubani ozakwenelisa ukuma na?” Bonke ababi bazakhulekela ukuthi bagqitshelwe ngaphansi kwamadwala ezintaba kulokuthi bahlangane lobuso balowo abamphikileyo njalo bala ukumamukela. {GC 642.2}IEP 642.2

Ilizwi leliyana elifinyelela ngitsho lendlebe zabafileyo bazabe belazi. Bekukangaki ilizwi leli libancenga ukuthi baphenduke. Balizwe kangaki libathinta livela ekuncengeni komngane, lokomfowabo, lokoMsindisi. Kulabo abaphika umusa wakhe akukho elinye eliletha icala, eliletha njalo ukuqondiswa, njengalelo lizwi ebelikade labancenga lisithi: “Tshiyani ke, tshiyani indlela zenu ezimbi, ngoba lizafelani, lina ndlu kaIsrayeli.” Hezekeli 33:11. Maye kibo, sengathi ilizwi leli bekulilizwi lomuntu abangamaziyo! UJesu wathi: “Ngoba ngibizile, kodwa layala, ngelulile isandla sami, kodwa kakho onanzayo, ladelela zonke izeluleko zami, kalivumanga ukukhuza kwami.” Zaga 1:24,25. Ilizwi leli lizavusa imikhumbulo abafisa ukuthi ngabe bayayicitsha engqondweni, bazakhumbula izixwayiso abazeyisileyo, unxuso abaluphikileyo, lamathuba abawatshaye indiva. {GC 642.3}IEP 642.3

Kuzabe kulalabo njalo abachothoza uKrestu ngesikhathi nxa wayedlula phakathi kokuyangiswa kwakhe. Ngamandla amakhulu kuzafika emikhumbulweni yabo amazwi akhe nxa wayedlula ekuhluphekeni, nxa wayebuzwa ngumpristi omkhulu, waphendula wathi: “Kusukela khathesi lizabona iNdodana yomuntu ihlezi ngakwesokunene samandla isiza phezu kwamayezi ezulu.” Mathewu 26:64. Khathesi bazabe sebembona enkazimulweni yakhe, njalo bazabe besazakumbona ehleli ngakwesokunene samandla. {GC 643.1}IEP 643.1

Bonke abachothoza amazwi akhe okuthi yena wayeyiNdodana kaNkulunkulu bazakutsha amathe khathesi. Uzabe ekhona uHerodi owahleka ulunya isikhundla sakhe sobukhosi njalo watshela abebutho ababemchothoza ukuthi bamfake umqhele njengenkosi. Azabe ekhona amadoda asebenzisa izandla zawo ukuba amgqokise isembatho esiyibubende, njalo ekhanda lakhe afaka umqhele wameva, njalo ezandleni zakhe ezingazange zibalwise ababeka intonga yobukhosi eyayingeyokumchothoza, labo abamkhothamelayo ngendlela eyayingeyokuchothoza izulu ngokwalo. Amadoda amatshayayo njalo bakhafulela iNkosi yokuphila, ngalesi isikhathi bazafulathela ilihlo lakhe elizabe lingathi liyahlaba, njalo bazazama ukumbalekela. Labo ababethela izipikili ezandleni njalo lasenyaweni zakhe, lebutho elamgwaza ehlangothini, bazabona amanxeba lawa ngokwesaba njalo lokuzisola. {GC 643.2}IEP 643.2

Ngokucaca okukhulu abapristi njalo lababusi bazakhumbula izehlakalo zaseKhalivari. Ngokwethuka lokwesaba okukhulu bazakhumbula indlela abanikina amakhanda abo ngentokozo eyayiholelwa nguSathane besithi: “Wasindisa abanye yena angezisindise. Uba eyiNkosi yakoIsrayeli kehle khathesi esiphambanweni futhi sizakumkholwa. Wathemba kuNkulunkulu; kamkhulule khathesi uba emthanda. Ngoba wathi: NgiyiNdodana kaNkulunkulu.” Mathewu 27:42,43. {GC 643.3}IEP 643.3

Bazakhumbula ngokucaca okukhulu amazwi oMsindisi awakhuluma mayelana lendatshana yamadoda ayengabagcini besivini abayala ukunika umnikazi izithelo zesivini sakhe, baphinda njalo baphatha ngochuku izithunywa ayezithumile njalo ekucineni babulala indodana yakhe. Bazakhumbula njalo lesigwebo abasiphawulayo bona ngokwabo nxa babesithi: Inkosi yesivini “izabulala wonke amadoda lawa amabi kangaka.” Esonweni njalo lasekujezisweni kwamadoda lawa ayengathembekanga abapristi ndawonye labaholi bazabona indlela yabo njalo lesiphetho sabo esifaneleyo. Njalo ngalesi isikhathi kuzezwakala ukukhala kobuhlungu okungelamkhawulo. Ukukhala lokhu kuzabe kukukhulu okwedlula amazwi abawatsho nxa babesithi, “Akabethelwe, akabethelwe,” azwakala emigwaqeni yaseJerusalema, ngalesi isikhathi kuzezwakala ukukhala kwamazwi athi, “UyiNdodana kaNkulunkulu! UnguMesiya weqiniso!” Bazazama ukubaleka phambi kweNkosi yaMakhosi. Phakathi kwembalu ezizabe zisemhlabeni ngenxa yokuzamazama okuzabe kusanda kwenzakala, bazazama ukuzifihla ngeze. {GC 643.4}IEP 643.4

Empilweni zabantu bonke abakhetha ukuphika iqiniso kubakhona izikhathi lapho umzwangedwa ovuka khona, lapho imikhumbulo yabo ebadlulisa phakathi kokuzisola ngenxa yokuphila impilo ephambene leqiniso. Kodwa konke lokhu kuyini nxa kuqathaniswa lokuzisola okuzakwenzeka ngosuku lolu olukhulu lapho “ukwesaba ukuzakhona njengokutshabalala,” lapho ukubhidliza okuzakuza khona njengesavunguzane!” Zaga 1:27. Labo abekade belungiselela ukubulala uKrestu njalo labantu bakhe abathembekileyo khathesi bazabona inkazimulo ezabe isiphezu kwabo. Phakathi kokwesaba kwabo bazakuzwa amazwi abasindisiweyo eqala ingoma emnandi esithi: “Khepha lowu nguNkulunkulu wethu; kade simlindele, njalo uzasikhulula.” Isaya 25:9. {GC 644.1}IEP 644.1

Phakathi kokuzamazama komhlaba, lokuphazima kombani, njalo lomdumo wezulu, ilizwi leNdodana kaNkulunkulu lizabiza bonke abangcwele abaleleyo othulini lomhlaba. Uzakhangela wonke amangcwaba abangcwele, njalo aphakamisele ezulwini izandla zakhe amemeze athi: “Vukani, vukani, vukani, lina elilele othulini, njalo phakamani!” Kuzozonke indawo emhlabeni bonke abafileyo bazakulizwa ilizwi lakhe, njalo labo abazakulizwa bazakuphila. Njalo wonke umhlaba uzaduma ngenxa yezisindo zebutho leli elikhulu kangaka elizabe libunjwe ngabantu abavela kuwo wonke amazwe, lemihlobo njalo lezindimi zonke. Bazaphuma entolongweni yokufa, begqoke inkazimulo ephakade, bememeza besithi: “Kufa lungaphi udonsi lwakho? Ngcwaba kungaphi ukunqoba kwakho na?” 1 Korinte 15:55. Njalo abangcwele abaphilayo labangcwele abazabe sebevusiwe bazalumbanisa amazwi abo bememeza amazwi okunqoba. {GC 644.2}IEP 644.2

Bonke baphuma emangcwabeni belesimo sokubunjwa esifana laleso abangena emathuneni belaso. UAdamu laye umile ndawonye lexuku leli elivusiweyo, usesimeni sakhe esihlukileyo ngoba umude njalo ulesimo sobukhosi kodwa umfitshane kancane kuleNdodana kaNkulunkulu. Ubonisa umehluko omkhulu phakathi kwakhe lezizukulwane ezaphila ngemva kwakhe, esibonelweni lesi esisodwa kuzabonakala ukuwa kwesimo okwenzeka ebantwini ngenxa yesono. Kodwa bonke bavuka belobutsha njalo lamandla okuba mutsha okunaphakade. Ekuqaleni umuntu wayedalwe ngomfanekiso kaNkulunkulu, hatshi ngokwesimo kuphela, kodwa langokubunjwa njalo langesimo. Isono saphambanisa umfanekiso lowu saze saphosa sasusa umfanekiso kaNkulunkulu, kodwa uKrestu wabuya ukuba avuselele lokho okwasekulahlekile. Uzaguqula imizimba yethu yobubi njalo ayenze ukuba ifane lomzimba wakhe ongcwelisiweyo. Isimo esibolayo, lesilesono, esingelakho ukuzotha, esaphanjaniswa yisono, sizaguqulwa sibemsulwa, sibesihle, njalo sibe lokuphila okuphakade. Konke ukugogeka lokukhubezeka kuzasala ethuneni. Nxa sebefinyelele esihlahleni sokuphila ensimini yaseEdeni eyalahlekela umuntu kudala, bonke abahlengiweyo “bazakhula” (Malaki 4:2) babelesimo esigcweleyo umuntu ayelaso ngesikhathi esaphila ebukhosini bakhe. Bonke ubufakazi bokucina besiqalekiso sesono buzasuswa, njalo abathembekileyo bakaKrestu bazabonakala “ebuhleni beNkosi yethu uNkulunkulu,” engqondweni njalo lasemoyeni njalo lasemzimbeni beveza isimo esipheleleyo seNkosi yabo. Yeka ubuhle bokuhlengwa! Osekukade kwakhulunywa ngakho, osekukade kwamelelwa, kwakhulunywa ngakho ngokulangazelela okukhulu, kodwa okungazange kwazwisiswa ngokuphelela. {GC 644.3}IEP 644.3

Bonke abangcwele abaphilayo bazakuguqulwa “ngesikhatshane lasekucwayizeni kwelihlo.” Ngenxa yelizwi elaphuma kuNkulunkulu bazabe sebengcwelisiwe njalo khathesi bazamukela imizimba engelakubola njalo ndawonye labangcwele abazabe sebevusiwe bazakwenyukela ezulwini ukuba bahlangane leNkosi emkhathini. Ingilosi “zizabuthela ndawonye bonke abakhethiweyo bakhe emagumbini amane omhlaba, kusukela ekucineni ngasentshonalanga komhlaba kusiya empumalanga.” Abantwana abancane bazathwalwa zingilosi zibasa ezandleni zabo nina. Abangane asebekade bahlukana ngenxa yokufa bazahlangana njalo, bengasayikwehlukana njalo, njalo ngengoma zokujabula bazakwenyuka ndawonye besiya eDolobheni likaNkulunkulu. {GC 645.1}IEP 645.1

Ngakuzo zonke inhlangothi zenqola yamayezi kulamaphiko, njalo ngaphansi kwayo kulamavili, njalo nxa inqola leyi isenyuka, amavili lawa akhala esithi, “Ngcwele,” njalo lamaphiko nxa ephapha akhala lawo athi, “Ngcwele’” lexuku lezingilosi lizakhala lithi, “Ngcwele, ngcwele, ngcwele, Nkosi Nkulunkulu Simakade.” Abasindisiweyo bamemeza bethi, “Aleluya!” nxa inqola leyi isenyuka isiya eJerusalema elitsha. {GC 645.2}IEP 645.2

Bengakangeni eDolobheni likaNkulunkulu, uMsindisi uzabeka emakhanda abalandeli bakhe izicoco zokunqoba njalo uzabanika izembatho ezibonisa ubukhosi babo. Ibutho leli elicwebezelayo lizakuma kunxa zonke iNkosi yabo ibe phakathi kwabo, yena ulesimo esiphezu kwabo bonke ngitsho lezingilosi njalo ubuso bakhe bukhanyisa ubuso babo bonke bugcwele uthando. Amehlo wonke exuku leli elisindisiweyo ajolozela ubuso bakhe, bonke babona inkazimulo yakhe yena “ubuso bakhe obalinyazwa okwedlula wonke umuntu, njalo lesimo sakhe okwedlula wonke amadodana oluntu.” Emakhanda abanqobi, uJesu ngokwakhe usebenzisa isandla sakhe sokunene ukubeka imiqhele yobukhosi. Wonke umuntu uzakwamukela umqhele wakhe, ozabe ubhalwe “ibizo lakhe elitsha.” (Sambulo 2:17), njalo kuzabe kubhalwe amazwi athi, “Ubungcwele eNkosini.” Ezandleni zabo kuzabekwa ilala njalo lechacho elikhazimulayo. Kuzathi nxa ingilosi eziholayo ziqala ingoma, izandla zonke ziqala ukutshaya amachacho, kuzwakale ingoma emnandi kakhulu. Ingoma leyi izathokozisa inhliziyo zabo bonke, amazwi abo onke aphakanyiswe ngengoma yokubonga: “Kuye owasithandayo, wasigezisa ezonweni zethu egazini lakhe; owasenza saba ngamakhosi labapristi kuNkulunkulu uYise, kakube kuye ubukhosi lamandla kuze kube nini lanini.” Sambulo 1:5,6. {GC 645.3}IEP 645.3

Phambi kwexuku labasindisiweyo kubonakala uMuzi oNgcwele. UJesu uzavula amasango ezulu, njalo z izizwe ezigcine iqiniso zizakungena. Lapho bazakubona iParadayisi kaNkulunkulu, indawo eyayingumuzi kaAdamu engakoni. Ngemva kwalokho ilizwi leliyana elimnandi okwedlula ingoma eseke yawela endlebeni zoluntu, lizezwakala lisithi: “Impi yenu isiphelile.” “Wozani lina elibusisiweyo bakaBaba, yibani zindlalifa zombuso elawulungiselwayo kusukela ekudabukeni komhlaba.” {GC 646.1}IEP 646.1

Khathesi kuzagcwaliseka umthandazo kaKrestu awenzela abafundi bakhe: “Ngiyafisa njalo, ukuba labo onginike bona, labo babelami lapho engikhona.” “Bengelasici phambi kwenkazimulo yakhe belenjabulo engelakubalwa” (Juda 24), uKrestu uzaletha phambi kukaBaba isipho asithenga ngegazi lakhe, esithi: “Ngilapha ndawonye labantwana owangipha bona.” “Labo onginike bona ngibagcinile.” Yeka izimangaliso zothando olusindisayo! Ukuhlokoma kwehola lelo lapho uBaba, ozathi ekhangela ixuku labasindisiweyo, azabona khona umfanekiso wakhe, ukungcolisa kwesono sekususiwe, lobubi baso sebungasekho, njalo izidalwa zakhe ezizabe sezibuyele esimeni sokufana laye! {GC 646.2}IEP 646.2

Ngothando olungabalisekiyo, uJesu uzakwamukela abathembekileyo bakhe entokozweni yeNkosi. Intokozo yoMsindisi izaba ngeyokubona, embusweni wenkazimulo, imphefumulo ezabe ihlengiwe ngenxa yobuhlungu njalo lokuyangiswa kwakhe. Njalo laba abasindisiweyo bazaba lengxenye entokozweni yakhe, nxa bekhangela, phakathi kwababusisiweyo, bazabona labo abanqotshelwe kuKrestu ngenxa yemithandazo yabo, lokusebenza kwabo, njalo lokuzidela abakwenza ngenxa yothando. Nxa bebuthana phambi kwesihlalo esimhlophe esikhulu, injabulo engalakubalwa izagcwala enhliziyweni zabo, nxa bebona labo ababanqobele embusweni kaKrestu, njalo nxa bebona ukuthi labo bazuza abanye, lalabo bazuza njalo abanye, bonke bazabe belethwe ekuphumuleni kwasezulwini, lapho abazabeka khona imiqhele yabo ezinyaweni zikaKrestu njalo bamdumise empilweni yonke ephakade abazaphila kuyo. {GC 647.1}IEP 647.1

Nxa abasindisiweyo besamukelwa emzini kaNkulunkulu, kuzezwakala ukukhala kwentokozo endaweni yonke. OAdamu ababili bazabe sebelungiselela ukuhlangana. INdodana kaNkulunkulu izabe imile ngezandla ezivuliweyo ukwamukela uyise wezizukulwane zonke, isidalwa asidalayo, sahlamukela uMdali waso, njalo ngenxa yezono zakhe uMsindisi uzabe elamanxeba okubethelwa esiphambanweni. Nxa uAdamu enanzelela amanxeba ezandleni lasenyaweni zikaJesu, kasoze awele esifubeni seNkosi yakhe, kodwa ngokuzehlisa uzawela enyaweni zakhe, ekhala esithi: “Lifanele, lifanele iWundlu elahlatshwayo!” Ngothando uMsindisi uzakumphakamisa amtshele ukuba akhangele njalo insimu yase Edeni eyayingumuzi wakhe osekukade wahlukana lawo. {GC 647.2}IEP 647.2

Ngemva kokuxotshwa kwakhe ensimini yase Edeni, impilo kaAdamu yayingeyosizi. Wonke amahlamvu ayesifa, zonke izinyamazana ezazibulawa, konke ukubuna okwakubonakala phezu kwendalo, bonke ububi obabubonakala ebantwini, kwakusiba yisikhumbuzo esitsha sokona kwakhe. Babunzima ubuhlungu njalo lokuzisola okwakufika enhliziyweni yakhe nxa wayebona ububi bulokhe busanda, njalo lempendulo ayeyithola emsebenzini wakhe wokukhuza isono. Impendulo ayeyithola yayingeyokuthi nguye owayeyimbangela yesono. Ngokuzehlisa njalo lokubekezela wathwala phose okweminyaka eyinkulungwane, isijeziso sokona kwakhe. Ngokwethembeka wavuma isono sakhe njalo wathembela emandleni oMsindisi owayethenjisiwe, njalo wafa elethemba lokuthi wayezaba lengxenye ekuvukeni. INdodana kaNkulunkulu yahlenga ukwehluleka njalo lokuwa komuntu, njalo khathesi ngenxa yomsebenzi wokubuyisana, uAdamu uzabiselwa esikhundleni sakhe sakuqala. {GC 647.3}IEP 647.3

Phakathi kwentokozo uzabona izihlahla ezazimthokozisa endulo, zona kanye izihlahla ayesikha kuzo izithelo ngezinsuku zokulunga kwakhe njalo lezenjabulo. Uzabona izivini azinakekela ngezandla zakhe, njalo lamaluba ayethanda ukuwanakekela. Ingqondo yakhe izananzelela ukuqiniseka kwalokho okuzabe kuphambi kwakhe, uzananzelela ukuthi ngeqiniso leyi kuyinsimu yase Edeni esivuseleliwe yanikwa yena, njalo izabe isilobuhle obedlula ngesikhathi exotshwa kuyo. UMsindisi uzamholela esihlahleni sokuphila njalo uzakukha isithelo saso amnike ukuba asidle. Uzakhangela emuva kwakhe njalo abone ixuku lemuli yakhe esindisiweyo, bemile eParadayisi kaNkulunkulu. Uzabeka umqhele wakhe ocwebezelayo enyaweni zikaJesu njalo nxa ewela esifubeni sakhe, uzakwanga uMsindisi. Uzabamba ichacho legolide, njalo izulu lonke lizaqhunsa ingoma yokunqoba: “Lifanele, lifanele, lifanele iWundlu elahlatshwayo, njalo eliphilayo futhi!” Usendo luka Adamu lalo luzathatha amachacho alo babeke imiqhele yabo ezinyaweni zoMsindisi nxa bekhothama phambi kwakhe. {GC 648.1}IEP 648.1

Ukuhlangana lokhu kuzabe kuphambi kwezingilosi ezakhala kakhulu ngosuku uAdamu awa ngalo njalo zabuya zathokoza lapho uJesu ngemva kokuvuka kwakhe, enyukela khona ezulwini, esevulile ingcwaba ukuba bonke abazamkholwa ngolunye usuku benelise ukuphuma kulo. Khathesi bazabe sebebona umsebenzi wokusindisa abantu usuphelile, njalo bazahlanganela ekuhlatshelweni kwengoma yokudumisa. {GC 648.2}IEP 648.2

Elwandle lwezibuko phambi kwesihlalo sobukhosi, lona okululwandle lwesibuko okungathi luxutshaniswe lomlilo, olugcwele inkazimulo kaNkulunkulu, kuzabuthana iqula “elanqoba isilo, njalo lomfanekiso waso, njalo lophawu lwaso, njalo lenombolo yebizo lakhe.” Ndawonye leWundlu entabeni yaseZiyoni, “belamachacho kaNkulunkulu,” bazakuma, inani labo lizinkulungwane ezilikhulu lamatshumi amane lane, okungabantu abahlengwa phakathi kwabantu njalo kuzawakala ilizwi elingathi ngamanzi amanengi, njalo okungathi ngumdumo omkhulu, “ilizwi labahlabeleli abatshaya amachacho abo.” Njalo bazahlabela: “ingoma entsha” phambi kwesihlalo, ingoma engeke yafundwa ngabanye abantu ngaphandle kwequla leli. Leyi yingoma kaMose njalo leyeWundlu, eyingoma yokuhlengwa. Akukho abanye ngaphandle kwequla leli elabantu abazinkulungwane ezilikhulu, lamatshumi amane lane, abangayifunda ingoma leyi ngoba iyingoma yenkambo abadlula kuyo, okuluhambo okungekho omunye umuntu ake aluhamba. “Laba yibo abalandela iWundlu kuzo zonke indawo ayakuzo.” Laba abathathwa emhlabeni phakathi kwabaphilayo, bazabalwa “njengezithelo zakuqala kuNkulunkulu laseWundlwini.” Sambulo 15:2,3: 14:1-5. “Laba yibo abadlula phakathi kokuhlupheka okukhulu;” bazabe sebedlule phakathi kwesikhathi senhlupheko esikhulu esingazange sibonakale selokhu kwadalwa izizwe, njalo bazabe benelise ukumelana lobuhlungu besikhathi sokuhlupheka kukaJakhobe, bazabe benelisile ukuma ngesikhathi kungekho oncengelayo ethempelini ngesikhathi lapho okwathelwa khona inkezo yolaka lukaNkulunkulu emhlabeni. Kodwa bazabe sebehlengiwe, ngoba “bazabe begezile izembatho zabo bazenza zabamhlophe egazini leWundlu.” “Emlonyeni wabo akutholakalanga isici, ngoba abalacala phambi kaNkulunkulu.” “Ngakho baphambi kwesihlalo sikaNkulunkulu, njalo bazakumkhonza emini lebusuku ethempelini lakhe: njalo lowo ahlala esihlalweni uzahlala phakathi kwabo.” Bazabe bebonile umhlaba uguga ngenxa yendlala njalo lemikhuhlane, lelanga liphiwa amandla okutshisa abantu, njalo bona ngokwabo bazabe bedlule phakathi kwendlala njalo lokomela amanzi. Kodwa khathesi “abasayikulamba futhi, kumbe bome futhi, lelanga alisayi kubatshisa kumbe loba yikuphi ukutshisa. Ngoba iWundlu eliphakathi laphakathi kwesihlalo lizabanika ukudla, njalo uzabahola emithonjeni ephilayo yamanzi; njalo uNkulunkulu uzakwesula inyembezi zonke emehlweni wabo.” Sambulo 7;14-17. {GC 648.3}IEP 648.3

Kuzo zonke izizukulwane abakhethiweyo boMsindisi bafundisiwe njalo baqeqetshwa ngaphansi kwesikolo senhlupheko. Bahamba endleleni ezincane emhlabeni, bahlanjululwa phakathi komlilo wokuhlupheka. Ngenxa yegama likaJesu bamelana lokuphikiswa, lenzondo njalo lokuqanjelwa amanga. Bamlandela phakathi kokulwiswa okukhulu, bamelana lokuzidela njalo badlula phakathi kokudangala okukhulu. Ngenxa yenkambo zabo ezibuhlungu bafunda ukuthi isono sibi kangakanani, lamandla aso, lokuba lecala ngenxa yaso, lomphumela waso omubi njalo bazasikhangela njengento okumele yenyanywe. Ukuzinikela okwenziwa nguJesu ukwenzela ukuthi aqede isono kuzabenza babe lokuzehlisa njalo kuzagcwalisa inhliziyo zabo ngesibongo esikhulu njalo lokudumisa okungeke kuzwisiswe njalo kuqathaniswe lalabo abangazange bawele esonweni. Bazathanda kakhulu ngoba bethethelelwe kakhulu. Ngenxa yokuthi bazabe beke baphatheka ekuhluphekeni kukaKrestu, bazabe befanele ukuba baphatheke enkazimulweni yakhe. {GC 649.1}IEP 649.1

Indlalifa zikaNkulunkulu zizabe ziphuma emilindini, lasemigodini, lasekulengisweni, lasezintabeni, lasenkangala, lasembalwini zomhlaba njalo lasembalwini zasolwandle. Emhlabeni “babengumhambuma, behlukumezekile njalo behlutshwa.” Izigidi zangena engcwabeni zisazakala njengezikliwi ngoba babezimisele ukwala ukwamukela amanga kaSathane. Emthethwandabeni yasemhlabeni bagwetshwa njengezephulamthetho ezesabekayo. Kodwa “khathesi uNkulunkulu uzabe esengumahluleli ngokwakhe.” Amahubo 50.6. Khathesi izinqumo ezenziwa emhlabeni zizaguqulwa. “Uzasusa ihlazo labantu bakhe.” Isaya 25:8. “Bazabizwa ngokuthi ngabantu abangcwele, abahlengiweyo beNkosi.” “Nginike labo abalilayo eZiyoni imiqhele endaweni yomlotha, lamafutha enjabulo endaweni yokulila, indumiso endaweni yomoya odanileyo.” Isaya 62:12, 61:3. Khathesi kuzabe sekudlulile ukuba buthakathaka, lokuhlukunyezwa, lokuhlakazwa njalo lokuncindezelwa. Kusukela khathesi bazahlala beleNkosi yabo kokuphela. Bazakuma phambi kwesihlalo sobukhosi begqoke izembatho ezibonisa inotho eyedlula zonke esezike zagqokwa ngamakhosi alumhlaba. Bazabe begqoke imiqhele ekhazimula okwedlula yonke eseke yagqokiswa amakhosi alumhlaba. Izinsuku zobuhlungu njalo lokububula sezidlule kokuphela. INkosi yenkazimulo seyesulile inyembezi ebusweni babo, zonke imbangela zokulila sezisusiwe. Phakathi kokuzunguzwa kwengatsha zamalala, bazahlabela ingoma yokudumisa, emnandi njalo elolongiweyo, wonke umuntu uzangena ngelakhe ilizwi ize izwakale kulo lonke izulu: “Usindiso kuNkulunkulu wethu ohlezi phezu kwesihlalo, njalo lakulo iWundlu.” Njalo bonke abahlali bezulu bazaphendula labo ngamazwi athi: “Ameni, isibusiso, lenkazimulo, njalo lenhlakanipho, njalo lokubonga njalo lodumo, njalo lamandla, makube kuNkulunkulu wethu kuze kube nini lanini.” Sambulo 7:10,12. {GC 650.1}IEP 650.1

Empilweni yalapha emhlabeni siyenelisa nje kuphela, ukuqala ukuzwisisa udaba lolu oluhle kangaka oluphathelene losindiso. Ngokuzwisisa kwethu okufipheleyo singakhangelisisa ihlazo njalo lenkazimulo, impilo njalo lokufa, ukufanela njalo lesihawu, okuhlangana esiphambanweni, kodwa loba kunjalo, loba singazama ukusebenzisa bonke ubungcitshi bengqondo zethu asenelisi ukuzwisisa ngokujulileyo ukuqakatheka kwesiphambano. Ubude lobubanzi, lokudepha kothando lokuhlenga kuzwisiseka nje kancane engqondweni zethu. Icebo losindiso alisoke lizwisiseke ngokuphelela kwalo, ngitsho lanxa abasindisiweyo bebona ngendlela ababonwa ngayo njalo besibakwazi ngendlela abazakala ngayo, kodwa eminyakeni eminengi ezakuza ezulwini amaqiniso amatsha azaqhubeka evezwa engqondweni ezizahlala zilokumangala njalo lentokozo. Loba nje inhlupho lobuhlungu njalo lezilingo zasemhlabeni zizabe zingasekho njalo lembangela yazo izabe isisusiwe, abantu bakaNkulunkulu bazahlala belolwazi olucacileyo mayelana lentengo yokusindiswa kwabo. {GC 651.1}IEP 651.1

Isiphambano sikaKrestu sizahlala siyisifundo njalo lengoma yamasindisiweyo empilweni yonke ephakade. Ebukhosini bukaKrestu bazabona uKrestu ekubethelweni kwakhe. Akusoke kukhohlakale ukuthi yena ngamandla akhe owadala njalo wasekela imihlaba yonke, yena othandekayo kaNkulunkulu, iNkosi yasezulwini, yena izingilosi ezikhazimulayo ezazithanda ukumbuka, wakhetha ukuzehlisa ukwenzela ukuba aphakamise umuntu owayesewile, njalo lokuthi wathwala amacala njalo lehlazo lesono, njalo lokufihlwa kobuso bukaYise, kwazekwafika esikhathini lapho inhlupho zasemhlabeni ezephula khona inhliziyo yakhe njalo zacobodisa impilo yakhe yaze yaphuma esiphambanweni saseKhalivari. Ukuthi uMdali wezulu lomhlaba, uMlawuli wezinto zonke, wakhetha ukutshiya ubukhosi bakhe njalo wazifaka ihlazo ngenxa yokuthanda umuntu kuzahlala kuletha ukumangala njalo lokuthandwa ezidalweni zonke. Nxa izizwe zonke zabahlengiweyo zikhangela uMsindisi wazo njalo nxa zikhangela inkazimulo kaBaba ezabe ikhazimula ebusweni bakhe, nxa bekhangela isihlalo sakhe, esizabe sisuka ekungaphelini sisiya ekungaphelini, njalo nxa besibakwazi ukuthi umbuso wakhe awusayi kuba lesiphetho, bazaqala ingoma ethi: “Lifanele, lifanele iWundlu elahlatshwayo, njalo elisihlengele kuNkulunkulu ngenxa yegazi lakhe eliligugu!” {GC 651.2}IEP 651.2

Imfihlo yesiphambano yiyo elamandla okuchasisa zonke imfihlo. Ekukhanyeni okuphuma eKhalivari zonke izinto ezimayelana loNkulunkulu ezazijwayele ukusesabisa zizaqala ukubonakala ebuhleni lasekuthathekiseni kwazo. Isihawu, lesineke njalo lothando lomzali konke kuzabonakala kubambana lobungcwele, lokulunga njalo lamandla. Nxa sikhangela ubukhosi besihlalo sakhe, esizabe siphakeme, sizabona isimilo sakhe emuseni ozabe ubonisiwe, njalo sizazwisisa okwedlula zonke izikhathi, ukuqakatheka kwebizo elithi, “Baba wethu.” {GC 652.1}IEP 652.1

Kuzabonakala ukuthi lowo olenhlakanipho engapheliyo wayengeke asungule elinye icebo lokusisindisa ngaphandle kokunikela iNdodana yakhe. Isithelo sokuzinikela lokhu sizaba yinjabulo yokugcwalisa umhlaba ngabantu abahlengiweyo, abazabe belobungcwele, bethabile njalo bengasayi kwamukela ukufa. Impumela yokulwisana lamandla obunyama okwenziwa nguMsindisi izaba yinjabulo yabahlengiweyo, abazahlala enkazimulweni kaNkulunkulu okweminyaka engelakubalwa. Njalo lesi yiso isisindo somphefumulo okuzakwenza ukuthi uBaba asuthiseke ngentengo ayibhadalayo, njalo loKrestu uqobo lwakhe, nxa ekhangela izithelo sokuzidela kwakhe, uzaba lokusuthiseka. {GC 652.2}IEP 652.2