Isingeniso Sikamlobi

Ngaphambi kokungena kwesono, u-Adamu wayekholisa ubudlelwano ayelabo loMdali wakhe, kodwa njengoba umuntu wazehlukanisa loNkulunkulu ngokona kwakhe, ilungelo leli elimnandi kangaka lasuswa eluntwini lonke. Lanxa kunjalo, ngenxa yecebo losindiso indlela seyavulwa eyokuba abantu basemhlabeni benelise ukuxhumana lezulu. Kusukela endulo, uNkulunkulu uhlala ukhulumisana labantu ngoMoya wakhe oNgcwele, njalo ukukhanya kwezulu ukunike umhlaba ngokwambulela izinceku zakhe ezikhethekileyo amaqiniso atshiyeneyo. “Amadoda angcwele kaNkulunkulu ayekhuluma ngoba efuqwa nguMoya oNgcwele.”(2 Petro 1:21).IEP .0

Eminyakeni ezinkulungwane ezimbili lamakhulu amahlanu yakuqala embalini yoluNtu, kwakungelasambulo esilotshwe phansi. Labo ababelolwazi ngoNkulunkulu, babesabelana labanye ulwazi lwabo, njalo ulwazi lolu lwaludluliswa lusukela kubaba lusiya endodaneni, kusiya ezizukulwaneni ngokulandelana kwazo. Ukulotshwa kwelizwi likaNkulunkulu kwaqala ngesikhathi sikaMosi. Izambulelo eziphefumulelweyo zafakwa ndawonye phakathi egwalweni oluNgcwele. Umsebenzi lowu waqhubeka okwesikhathi eside seminyaka eyinkulungwane lamakhulu ayisithupha — kusukela kuMosi, isazi sembali yendalo lomthetho, kusiya kuJohane, umlobi wamaqiniso amqoka kakhulu awendaba zevangeli.IEP .0

IBhayibhili liveza uNkulunkulu njengomlobi walo, kodwa lalotshwa ngesandla somuntu; futhi indlela ingwalo ezehlukeneyo phakathi kwalo ezilotshwe ngayo, liveza izimilo zabalobi laba abehlukeneyo. Amaqiniso wonke aveziweyo “anikwe ngokuphefumulelwa nguNkulunkulu.” (2 Thimothi 3:16); kodwa achazwe kusetshenziswa amazwi abantu. Unkulunkulu ngoMoya wakhe oNgcwele wehlisele ukukhanya kwakhe engqondweni lasenhliziyweni zenceku zakhe. Unike amaphupho lemibono, imifanekiso lezifananiso, njalo labo abavezelwa leliqiniso bakuveze kithi ngolimi lwabantu.IEP .0

Imithetho elitshumi yakhulunywa nguNkulunkulu uqobo lwakhe, yabuya yabhalwa nguye ngesandla sakhe. Imithetho leyi ingcwele njalo ayizanga ngokomcabango womuntu. Kodwa iBhayibhili, lamaqiniso alo avela kuNkulunkulu avezwe ngolimi lwabantu, liveza ukumanyana kobunkulunkulu lobuntu. Ukumanyana lokhu kwakukhona esimeni sikaKrestu, owayeyiNdodana kaNkulunkulu njalo ngesikhathi esifanayo eyiNdodana yomuntu. Kunjalo-ke ngeBhayibhili, njengoba kwakunjalo ngoKrestu ukuthi “uLizwi waba yinyama, wahlala phakathi kwethu...” (Johane 1:14).IEP .0

Loba nje iBhayibhili lalotshwa ngezikhathi ezihlukeneyo futhi ngabantu abehlukeneyo ngokwezigaba zempilo langokwemisebenzi, ngokwengqondo langokweziphiwo zakoMoya, izingwalo zeBhayibhili zitshengisa ukuhleleka ngendlela ezingafananiyo, okwenza lithinte ngokupheleleyo zonke izigaba zempilo ngokwehlukana kwazo. Abalobi ngokwehlukana kwabo basebenzisa indlela ezehlukeneyo ukuchaza amaqiniso, iqiniso elifananayo kwezinye izikhathi livezwa ngokucacileyo ngomunye umlobi ukwedlula omunye. Lapho abalobi abatshiyeneyo beletha udaba oluthile ngokubona okwehlukeneyo izehlakalo ezehlukuneyo, kusangabonakala sengathi akulakuhambelana loba ukulakuvumelana kwemigca abayilobileyo kulowo ongabali ngokujulileyo, obala elenhloso ethile, ngesikhathi esifananayo umfundi othobekileyo locabangisisayo, olombono ocacileyo, lokuqedisisa, yena ebone ukuvumelana okukhulu emugceni ofananayo.IEP .0

Iqiniso elivezwa ngabantu abehlukeneyo ngesikhathi sinye lilamandla okuletha inhlangothi zonke okwenza lizwisiseke ngcono. Omunye lomunye umlobi uthathekiswa kakhulu ngesinye isigaba loba olunye uhlangothi lodaba oluthile, abesebambisisa kakhulu imicijo ehambelana lenkambo yakhe. Omunye uthatha isigaba esehlukeneyo sodaba olufanayo, kodwa bonke, munye ngamunye ngokuholwa nguMoya oNgcwele, bethula lokho okugcizelelweyo engqondweni zabo belethe izigaba ezehlukeneyo zaqiniso linye ezitshengisa ukuphelela kwaleloqiniso. Amaqiniso avezwe ngale indlela ayahlangana abumbe isiqu esipheleleyo, esidalelwe ukufinyelela indingeko zabantu kuzehlakalo lenkambo zabo zempilo.IEP .0

UNkulunkulu ukuthandile ukuletha amaqiniso akhe emhlabeni esebenzisa abantu, njalo yena ngokwakhe, ngesiqu sikaMoya oNgcwele, wabaqeqesha, wabenelisa ukwenza umsebenzi wakhe. Wahola ingqondo ekukhetheni lokho okwakufanele ikutsho kanye lalokho okwakumele ikubhale. Ingcebo yaphakulelwa ezitsheni zebumba yalethwa kithi, khepha lanxa kunjalo ingcebo ivela ezulwini. Ubufakazi bulethwe ngokuchaza kolimi lwabantu olungaphelelanga, khepha kuyibufakazi bukaNkulunkulu. UmntakaNkulunkulu olalelayo uyayibona inkazimulo yamandla kaNkulunkulu lomusa leqiniso kulobubufakazi obulethwe kusetshenziswa abantu.IEP .0

UNkulunkulu ubanikile abantu elizwini lakhe ulwazi olubaneleyo ukuba basindiswe. Imibhalo engcwele kumele yamukelwe njengelizwi likaNkulunkulu elingaguqukiyo njalo eliveza intando yakhe. Ilizwi leli lingumahluleli wesimilo, lambula imfundiso zeqiniso njalo lomhloli wenkambo. “Yonke imibhalo iphefumulelwe nguNkulunkulu, njalo ilungele ukufundisa, ukukhalimela, ukuqondisa, lokulaya ekulungeni, ukuze umuntu kaNkulunkulu aphelele, apheleliswe emisebenzini emihle.” (2 Timothi 3:16 -17).IEP .0

Loba kuqinisekile ukuthi uNkulunkulu uvezile intando yakhe eluNtwini ngelizwi lakhe, akutsho ukuthi ubukhona lokuthungamela kukaMoya oNgcwele akusadingeki. UMoya oyiNgcwele wathenjiswa nguMsindisi wethu, ukuba aveze ilizwi ezincekwini zakhe, alikhanyise njalo abenze baphile njengokufundisa kwalo. Njengoba kunguMoya kaNkulunkulu owaphefumulela ukulotshwa kweBhayibhili, akwenzeki ukuthi imfundiso kaMoya iphikisane lalokho okulotshwe eBhayibhilini. IEP .0

UMoya kawuphiwanga, njalo ngeke uphiwe ukuthi uthathe indawo yeBhayibhili, ngokuba imibhalo ichaza ngokusobala ukuthi ilizwi likaNkulunkulu liyilo isilinganiso okufanele zonke imfundiso lenkambo zihlolisiswe ngalo. Uthi Umpostoli uJohane; “lingakholwa oMoya bonke, kodwa hlolani imimoya ukuthi ingekaNkulunkulu yini; ngoba banengi abaprofethi bamanga abaphumele emhlabeni.” (1 Johane 4:1) Njalo u-Isaya uthi; “emthethweni lasebufakazini, aluba bengakhulumi ngokwezwi leli, kungenxa yokuthi akukho ukukhanya kibo” (U-Isaya 8:20).IEP .0

Abantu laba abathi bathunganyelwa nguMoya kaNkulunkulu kodwa besithi abadingi ukuthunganyelwa liLizwi likaNkulunkulu benza amaphutha enza ukuthi umsebenzi kaMoya oyiNgcwele ungazwisiseki njalo usoleke kakhulu. Babuswa yimizwa abacabanga ukuthi lilizwi likaNkulunkulu. Kodwa umoya obaholayo ayisiwo uMoya kaNkulunkulu. Lokhu ukulandelwa kwemizwa, okubangela ukulahlwa kwemibhalo, kuthungamela ekudidekeni, ekukhohlisweni, kanye lasekulahlweni. Kusebenza kuphela ukuqhubekisa amacebo omubi. Njengoba umsebenzi kaMoya oyiNgcwele uqakatheke kangaka ebandleni likaKrestu, kungelinye lamaqhinga kaSathane, elokusebenzisa amaphutha alabo abathathela izinto phezulu njalo lokudlulela kwezenkolo, ukwenzela ukuletha insolo phezu komsebenzi kaMoya, njalo lokubangela ukuthi abantu bakaNkulunkulu balahle umthombo wamandla iNkosi yethu ngokwayo esiphe wona. IEP .0

UMoya kaNkulunkulu kumele uqhubekisele phambili umsebenzi wevangeli ngokuvumelana leLizwi likaNkulunkulu elilotshiweyo. Phakathi kweminyaka lapho imibhalo yeBhayibhili egoqela iTestament elidala lelitsha isambulelwa abalobi, uMoya oyiNgcwele kazange ame ukuveza ukukhanya engqondweni zabantu, lokubabonisa amaqiniso ayengaphandle kwalokho okwakufanele ukulotshwa eMbhalweni eNgcwele. IBhayibhili ngokwalo liyaveza ukuthi ngokusebenza kukaMoya oNgcwele, amadoda lawa ayethola izixwayiso, ukukhuzwa, izeluleko kanye lokulaywa ezindabeni ezazingekho mayelana lalokho okwakumele kulotshwe eBhayibhilini. Siyatshelwa njalo ngabanye abaprofethi abaphila ngezikhathi ezadlulayo ezitshiyeneyo okungabhalwanga lutho ngalokhu abakhkhulumayo eBhayibhilini. Ngokufanayo njalo, ngemva kokugqiba umsebenzi wokubhalwa kweBhayibhili, uMoya oNgcwele wayezaqhubeka ngomsebenzi wakhe, wokukhanyisela, lokuxwayisa njalo lokududuza abantwana bakaNkulunkulu.IEP .0

UJesu wathembisa abafundi bakhe ukuthi, “umduduzi onguMoya oNgcwele, ozakuthunyelwa nguBaba ebizweni lami, uzakulifundisa zonke izinto, alikhumbuze konke engakutshoyo.” (Johane 14:26). “Nxa uMoya weqiniso esefikile, yena uzakuliholela eqinisweni lonke, ngoba kayikuzikhulumela ngokwakhe, kodwa lokho azakuzwa uzakukhuluma, alitshengise izinto ezizayo.” (Johane 16:13). UMbhalo uchaza ngokucacileyo ukuthi izithembiso lezi aziphelanga ngebandla labapostoli bakhe, kodwa ziyakuqhubeka ebandleni likaKrestu kuzo zonke izikhathi. UMsindisi wapha abalandeli bakhe isiqiniseko esithi, “Ngilani izikhathi zonke, kuzekube sekupheleni komhlaba.” (Mathewu 28:20). UPhawuli uyachaza njalo ukuthi izipho lokubonakaliswa kukaMoya oNgcwele zafakwa ebandleni “ukuze abangcwele bapheleliselwe, ngokomsebenzi wevangeli, ekwakhiweni komzimba kaKrestu, size sifinyelele sonke ebunyeni bokukholwa, lasekwazini iNdodana kaNkulunkulu, lasebuntwini obupheleleyo obulinganiswe ngesimo esigcweleyo sikaKrestu.” (Kwabasefesu 4:12,13).IEP .0

Umpostoli uPhawuli nxa wayethandazela amakholwa ase eFesu wathi; “Ukuze uNkulunkulu weNkosi yethu uJesu Kristu, uYise wobukhosi, alinike umoya wokuhlakanipha lokwambulwa ekumazini yena, amehlo okuzwisisa kwenu eseyambulelwe, ukuze lazi ithemba lobizo lwakhe, njalo... lobukhosi obumangalisayo bamandla akhe kithi esikholwayo...” (Kwabase-Efesu 1:17-19), umsebenzi kaMoya oNgcwele, wokukhanyisela lokuvulela ingqondo ukuthi izwisise izinto ezijulileyo zezwi likaNkulunkulu elingcwele, kwakuyiso isibusiso uPhawuli owayesincengela ibandla lase Efesu.IEP .0

Ngemva kokuthelwa okukhulu kukaMoya oNgcwele ngosuku lwePentekhosti, uPetro wanxusa abantu ukuba baphenduke njalo bebhabhathizwe egameni lika Kristu, ukuze izono zabo zisuswe; wathi: “...lizakwamukela isiphiwo sikaMoya oNgcwele. Ngoba isithembiso ngesenu lesabantwana benu, labo bonke abakhatshana, ngitsho labo bonke ngobunengi babo iNkosi uNkulunkulu wethu ezakubabiza.” (Imisebenzi 2:38,39).IEP .0

Ukubambanisa lezinto ezizayenzakala ngosuku lweNkosi olukhulu, iNkosi ithembisile ngomprofethi uJoweli ukuvezwa okukhethekileyo kukaMoya wakhe (Joweli 2:28). Isiprofethi lesi sagcwaliseka kancane ngosuku lwePentekhosti, kodwa sizagcwaliseka ngokupheleleyo ekuvezweni komusa ongcwele ozafuqa umsebenzi wokugoqwa komsebenzi wevangeli.IEP .0

Impikiswano enkulu phakathi kokuhle lokubi izakhula ngamandla kuze kuyefika ekupheleni kwesikhathi. Kusukela ekuqaleni ulaka lukaSathane belubonakala phezu kwebandla likaKristu, kodwa uNkulunkulu wehlisele umusa wakhe loMoya oNgcwele ebantwini bakhe, ukubaqinisa ukwenzela ukuthi bamelane lamandla omubi. Nxa abapostoli bakaKristu babemele bahambise ivangeli emhlabeni wonke njalo balibhale phansi besenzela izizukulwane ezazizalandela, babekhanyiselwa ngokuqakathekileyo nguMoya oNgcwele. Kodwa nxa ibandla seliseduze lokukhululwa kwalo, uSathane laye uzasebenza ngamandla amakhulu. Uzaphansi “...elolaka olukhulu ngoba uyazi ukuthi isikhathi sakhe sifitshane.” (Sambulo 12:12). Uzasebenza “ngawo wonke amandla lezibonakaliso lezimangaliso zamanga.” (2 Thesalonika 2:9). Okweminyaka ezinkulungwane eziyisithupha ingcitshi leyi eyayingumthungameli wengilosi zonke zikaNkulunkulu isibonise ukuzimisela ngokusebenzela ukuletha inkohliso lokubhidlizwa ebantwini. Wonke amacebo amabi ngokujula kwawo, lakho konke ukukhohlisa okuphakemeyo, lolunya lonke olwakhulayo phakathi kwezikhathi zonke zokuhlukumeza abantu endulo, uzakuletha phezu kwabantwana bakaNkulunkulu empikiswaneni yokucina. Esikhathini lesi sokuhlupheka esizayo, abalandeli bakaKrestu kuzamele batshumayeze umhlaba wonke ngodaba lokuza kweNkosi kwesibili; njalo abantu kumele balungiselwe ukuthi bame phambi kwakhe nxa esiza “bengelasici, njalo bemsulwa.” (2 Petro 3:14). Ngalesi isikhathi ibandla likaJesu lizabe lidinga amndandla avela kuNkulunkulu ngendlela efananayo ibandla labapostoli elawadinga ngayo.IEP .0

Ngokukhanyiselwa nguMoya oNgcwele, izehlakalo zempikiswano leyi phakathi kokuhle lokubi, esilesikhathi eside iqhubeka, yambulelwa umlobi walolugwalo. Ngezikhathi ezehlukeneyo ngivunyelwe ukubona indlela lempikiswano eziveza ngayo lokusebenza kwayo phakathi kukaKristu, iNkosi yokuphila, umlobi wosindiso lwethu, loSathane, inkosi yobubi, umqali wesono, onguye owaqala ukwephula umthetho kaNkulunkulu ongcwele. Ukuzonda umthetho kaNkulunkulu, lenkohliso yokwenza amanga abonakale njengeqiniso, lokubeka imithetho yabantu esikhundleni komthetho kaNkulunkulu, lokuthungamela abantu ukuthi bakhonze isidalwa esikhundleni soMdali yimisebenzi kaSathane ebonakala sobala embhalini yomhlaba. Imizamo kaSathane yokungavezi ngokuqonda isimilo sikaNkulunkulu, leyokwenza ukuthi abantu babelombono ongaqondanga ngoMdali, bambone ngokwesaba langenzondo kulokuthi bamazi ngothando, lemizamo yakhe yokulahlela eceleni umthetho ongcwele, lokwenza ukuthi abantu bacabange ukuthi bakhululekile ukuba bangagcini umthetho kaNkulunkulu, lokuhlukumeza kwakhe labo abamelana lenkohliso yakhe, konke lokhu ukwenzile ezizukulwaneni zonke ezidlulileyo. Kuyatholakala embhalini yabadala, labaprofethi labapostoli, lakulabo abafela iqiniso labamela imvuselelo.IEP .0

Empini enkulu yokucina, uSathane uzasebenzisa amacebo afananayo, atshengise umoya ofananayo, njalo asebenzele ukuthola impumela efana laleyi ayithola endulo. “Konke okwenzakala endulo kuzayenzakala futhi” (UMtshumayeli 3:15), umehluko kuphela yikuthi impi ezayo izabe itshisa okwedlula zonke ezikezabakhona emhlabeni. Inkohliso zikaSathane zizabe zifihlakele ngaphansi kobuqili obukhulu, njalo lokuhlasela kwakhe kuzabe kulenjongo eqinileyo. Nxa bekungenzeka, ubezadukisa labakhethekileyo (Marko 13:22).IEP .0

Ngesikhathi uMoya kaNkulunkulu engambulela amaqiniso amangalisayo emibhalweni yakhe, lezehlakalo ezenzakalayo endulo, lalezo ezesikhathi esizayo, ngiqonqoselwe ukuthi ngazise abanye lokho engikuvezelweyo- ukulonda imbali yalempikiswano, ikakhulu ukuba ngiveze ngendlela ecacileyo lokhu indlela impikiswano le ezasebenza ngayo ngezinsuku ezizayo. Ukubangigcwalise linjongo, ngikhethe ukuhlanganisa izehlakalo zembali yebandla, ngendlela ezaveza ngayo amaqiniso amqoka anikwa umhlaba ngezikhathi ezitshiyeneyo, ayiwo abasele inzondo kaSathane kanye lenzondo yebandla elithanda umhlaba, njalo lokuveza indlela iqiniso elavikelwa ngayo yilabo “abadela ukuphila kwabo, kwaze kwaba sekufeni.” (Isambulo 12:11).IEP .0

Emazwini lawa siyenelisa ukubona isithunzi salengxabano ephambi kwethu. Ngokuzwisisa ilizwi likaNkulunkulu, langokukhanyiselwa nguMoya wakhe, sizabona sobala amacebo womubi, lengozi okumele bazibalekele labo abazatholakala bengelasici phambi kweNkosi ekubuyeni kwayo.IEP .0

Izehlakalo ezinkulu ezabangela ukuqhubeka kwemvuselelo emnyakeni eyadlulayo zilotshiwe embalini, ziyazakala emhlabeni wonke jikelele njalo zivunywa ngamabandla emvuselelo, njalo akekho ongaziphikisa. Imbali leyi ngizayilandisa ngamafitshane, ikakhulu lokhu okuhambelana lendikimba yalolugwalo, ngiyifinyeze kodwa ivume ukuveza konke okuqakathekileyo, lamaqiniso afinyezwe emakhasini alolugwalo ambalwa ngendlela ehambisana lokuthi kubekhona ukuwazwisisa okuqondileyo. Kwezinye indawo lapho abalobi bembali abaloba ngesifinqo behlanganisa izehlakalo ezinengi ezayenzakala endulo, beveza ubufakazi obubanzi bendaba, loba lapho abafinqa khona ubufakazi obucacileyo ngendlela evumayo, amazwi abo acatshuniwe afakwa kulolugwalo, kodwa kwezinye indawo akwenelisekanga ukutsho umnikazi wesicaphuno njengoba injongo kungasiyo yokunika umlobi amaphuzu legunya, kodwa ngenxa yokuthi ubufakazi babo benza indaba izwakale ngokucaca. Ekulandiseni imbali lemibono yalabo abahambisa inguquko kwezokholo esikhathini sethu, indlela efananayo isetshenzisiwe emisebenzini yabo elotshiweyo.IEP .0

Akusiyo injongo yalolugwalo ukuveza amaqiniso amatsha ngobunzima bezikhathi ezadlulayo, kodwa ukuveza amaqiniso athwele ubufakazi balezi zehlakalo ezizayo. Nxa konke okwayenzakala endulo kukhangelwa njengengxenye yempikiswano ephakathi kwamandla okukhanya lawobunyama, izehlakalo ezitholakala embalini zibonakala zilomutsho omutsha, njalo ngazo ukukhanya kwenza izikhathi ezizayo ukuba zibe sobala, kukhanyisa indlela yalabo njengabavuseleli basendulo, abazabizwa loba kusitsho ukuthi balahlekelwe yinotho lobuhle bonke basemhlabeni, ukuthi bezofakazela “...ilizwi likaNkulunkulu lobufakazi bukaJesu Kristu...” (Sambulo 1:2).IEP .0

Ukuchaza izehlakalo zempikiswano enkulu phakathi kweqiniso lamanga, lokuveza imijibila kaSathane, lendlela anganqotshwa ngayo, lokuletha isixazululo esisuthisayo ngohlupho olukhulu lwesono, lokuveza ukukhanya okunje mayelana lokudabuka kanye lesiphetho sesono, njalo lokubonisa ukulunga bokwahlulela lomusa kaNkulunkulu ekusebenzelaneni kwakhe lezidalwa zakhe, njalo lokubonisa ubungcwele lokungaguquki komthetho wakhe, yiyo injongo yalolugwalo. Ukuze ngenxa yendonsela yalo imphefumulo ikhululwe emandleni wobunyama, itholakale “iphatheka njengendlalifa zabakhethekileyo ekukhanyeni,” kulethwe udumo kulowo owasithandayo, wazinikela ngenxa yethu, lowu kungumthandazo wokuzidela womlobi walolugwalo.IEP .0

Ellen. G. White