Isingeniso Sabashiceleli
Ugwalo lolu, mfundi, alulotshelwanga ukusazisa ukuba kulesono, lobubi njalo losizi kulo umhlaba. Sikwazi kahle konke lokhu. Ugwalo lolu alulotashelwanga ukusazisa ukuba kulempikiswano engaxazululekiyo phakathi kokukhanya lobunyama, laphakathi kwesono lokulunga, lokuqonda lokungaqondi, laphakathi kokufa lokuphila. Ekujuleni kwenhliziyo zethu siyakwazi lokhu, futhi siyazi ukuba siphakathi njalo singabalingisi phakathi kwale ingxabano.IEP .0
Kodwa kithi sonke kukhona isifiso sokwazi kabanzi mayelana lalempikiswano enkulu. Kambe ngabe yaqala njani? Kumbe yayivele ikhona kusukela ekuqaleni na? Imumetheni lendaba eyimpicano kangaka? Kungithinta njani mina konke lokhu? Uyini umlandu wami kule indaba? Phela ngizithola ngisemhlabeni hatshi ngokukhetha kwami. Kambe lokhu kimi kutsho ububi kumbe ubuhle na?IEP .0
Yiziphi imfundiso ezimqoka eziphakathi kwempikiswano leyi? Impikiswano leyi izaqhubeka okwesikhathi esinganani? Isiphetho sayo sizakuba yini? Kambe umhlaba lo uzatshona ekujuleni kobumnyama obungelamkhawulo, njengokutsho kwezinye izikhwicamfundo ze-science? Kambe ngabe kukhona ikusasa elingcono na?IEP .0
Umbuzo uya usondela kithi: Impikiswano esenhliziyweni yami lokulwisana phakathi kobumina lothando kwabanye abantu kunganqotshwa njani ngokupheleleyo na? IBhayibhili lona lithini? UNkulunkulu ufisa ukusifundisani mayelana lombuzo lowu obaluleke kangaka?IEP .0
Kuyinjongo yalolugwalo mfundi, ukusiza umoya okhathazekileyo ukuba ufumane isixazululo salezingxaki. Lulotshwe ngomunye oke wanambitha ukulunga kukaNkulunkulu, njalo wafunda ngemva kokuchitha isikhathi ekhulumisana loNkulunkulu ngomthandazo langokufunda ilizwi lakhe ukuba imfihlakalo kaNkulunkulu ikulabo abemesabayo, futhi uyabavezela isivumelwano sakhe.IEP .0
Umlobi ukuveze konke phambi kwethu, esebenzisa izifundo ezilomutsho ngalokhu okwenzeke eminyakeni engamakhulu angamatshumi amabili edlulileyo ukwenzela ukuthi sizwisise kangcono imfundiso mayelana ngalempikiswano ebaluleke kangaka, egoqela impilo yakho konke okudaliweyo emhlabeni.IEP .0
Ugwalo lolu luqala ngokuveza izehlakalo ezizwisa usizi ezimayelana lokuphethwa kwembali yedolobho laseJerusalema, umuzi wabakhethiweyo bakaNkulunkulu, ngemva kokuphika kwabo iNdoda yaseKhalivari, eyayize ukuzabahlenga. Kusukela lapho, lasembalini yamazwe alumhlaba, luyasivezela ukuhlukunyezwa kwabantwana bakaNkulunkulu emnyakeni yakuqala ngemva kokufa kukaJesu, lokuhlehlela emuva kwezenkolo okwalandelayo ebandleni lakhe, lemvuselelo eyalethwa ngabavuseleli abehlukeneyo, lapho okubonakala khona ngokucaca ezinye iziqu zempikiswano leyi. Kuvezwe isifundo esesabekayo sokuphika imfundiso eziqondileyo okwenzakala elizweni laseFrance, ukuvuselelwa njalo lokuphakanyiswa kweBhayibhili, indonsela yalo eletha ukuphila ebantwini, ukuvuseleleka kwezenkolo okuzakwenzakala ensukwini zokucina, lokuvulwa komthombo ophilayo welizwi likaNkulunkulu ndawonye lokukhanya lolwazi oluphume kulo ukuze kunyathezela ukuhluma kwenkohliso yonke yobunyama.IEP .0
Ingxabano yensuku zalamuhla equbukayo, lakho konke okuyibumbayo, lokuthi akukho muntu ongathintekiyo njalo ongalahlangothi akilo, konke kuvezwe sobala kulolu ugwalo.IEP .0
Ekucineni kwakho konke, siyatshelwa ngokunqoba kubuhle phezu kobubi, ukulunga phezu kokungalungi, ukukhanya phezu kobunyama, injabulo phezu kosizi, ithemba phezu kokudangala, udumo phezu kwehlazo, ukuphila phezu kokufa, njalo lothando olungelamkhawulo phezu kwenzondo ephuphumayo.IEP .0
Kusukela ekulwotshweni kwalo ngomyaka ka1888, kusiyafika ekulolongweni kwalo okwenziwa ngumlobi walo ngomnyaka ka1911, ugwalo lolu selwafinyelela umhlaba wonke ngaphansi kwezindimi ezehlukeneyo. Obalayo uzafumana ukuthi umlobi walo katshayi inja efihla umphini ekulobeni kwakhe, uyaveza zonke imfundiso zamanga njalo usebenzisa iLizwi likaNkulunkulu ukuveza lokho okuliqiniso. Lobanje amatshumi eminyaka adlulileyo ebonise inguquko kwezenkolo lasekuphileni kwabantu, umzimba njalo lesiprofethi esimayelana lezehlakalo ezazilokhe zikhatshana ezilotshwe encwadini leyi zibonisa ukuqiniseka lokuqakatheka kwalolugwalo okuthathekisa wonke umuntu olubalayo.IEP .0
Ugwalo lolu selwenelise ukuletha imphefumulo eminengi kuMelusi weQiniso nxa belishicelelwa ngendimi ezehlukeneyo emnyakeni edlulileyo, kungumthandazo wabaShiceleli balo ukuba lolu olulotshwe ngolimi lwesiNdebele, lungaba lezithelo ezinhle eziphindiweyo.IEP .0
Yithi Abashiceleli.