Egesieri gia kane - Richibu

Omonto bwemechando n’obororo. Mbarenge koremereria kogamberu nobogim bwaye bw’okwerina. Bagataka kwegokia na ay’ense. Nonye nigo abange mbamobwatetie Omwana o Nyasae na gotegerera amachiko aye, bagochengera amang’ana arwete ase ebikoba biaye. Amang’ana aye naichire chimaana, korende arenge amaororo nonye nabatari nguru barenge koyamanya.OB 30.1

Ogopinga gotari na ng’encho ende —Saitani na amalaika aye bagatuba amaiso na bakaritoia okoigwa kw’abayahudi, na bakamoburukania omogambi bw’abanto na abatenereri bonsi gosiria obogima bw’Omoboria. Abagambi bagatoma abande komoreta Yeso asare, korende ekero baigete ang’e na asare bakagokigwa mono. Bakamorora gaichire na amabera ekero aroche emechando yabo. Bakamotegerera buna arenge kobakwanera abatarenge nguru na abachandegete ase obwanchani nobwororo. Boigo bakaigwa buna arenge gotogonyera chinguru chia Saitani ase eriogi ri’ogochika, na kobasibora basibire na Saitani. Bagategerera amang’ana ye echisemi, akabakuna. Mbarenge komobwata. Bakairana ase abakuani abanene na abafarisai batabwati Yeso. Ekero baboretigwe, “Naki motamorenta?” Bakabatebia bionsi baroche ase ebikone biaye, na amang’ana amachenu y’obong’aini bwaye, obwanchani, nechisemi baigwete. Bakoorera goteba, “Tana gokwana monto onde bwensi buna oyo agokwana!” Yohana 7:45, 46.OB 30.2

Abakuani abanene bakabatebia buna nabarabwo batantanigwe, na abaobisa bagasoka buna mbabosibeti. Abakuani bakaboria gose onde narenge omwegenire. Abange bw’abanachi ebina na abanene mbamwegenete Yeso, korende Saitani akabatanga mbaitaba. Bakaoboa gosekererwa n’abanto kobua buna bamooboete Yeso.OB 30.3

Goikera aiga emeroberio n’endamwamu ya Saitani konyora terasari moroberio bw’okoboria. Engaki konyora yabereire ang’eYeso akore ekerengo eki acherete ase enseye. Saitani namalaika aye bagasemania bakore egesaku kia Yeso omonyene keganie amanyinga aye na kemwange mono, bagasemeria buna Yeso takonyara koremereria ebinto binga buna ebi, naende tokogenderera na bokanyeku bwaye.OB 31.1

Ekero Saitani agendererete nemeroberio yaye, Yeso nagendererete kobaorokeria aboorokigwa baye emechando yabetereretie aetere — buna nabambwe naende aboke rituko ria gatato. Korende okoigwa kwabo gokaba ogoke, naende mbamanyeti ninki arenge kobatebia.OB 31.2

Ogoonchoka Ekieni kwa Yeso — Okwegena kw’aboorokigwa gokabeku chinguru ekero ki’ogoonchoka ekieni kwa Yeso, ekero baetwe ribaga korora obonene bwa Kristo na koigwa eriogi rinene korwa igoro rikoenekia obonyasae bwaye. (Rora Matayo 17:1-8.)OB 31.3

Nyasae agachora kobaa aboorokigwa ba Yeso okoenekia okonene buna nere orange Masii oria orarie, erinde engaki yobororo na ogokwa omoyo ase omosalaba, mbasiria kwegena kwabo gwensi. Ekero ki’ogoonchoka ekieni kw’Omonene Nyasae agatoma Musa na Elija bakwane na Yeso igoro yemechando nogokwa kwaye. Ribaga ri’ogochora amalaika akwane n’omwana oye, Nyasae agachora baria konyora baeteire amatemwa ase enseye.OB 31.4

Elija natarete na Nyasae. Egasi yaye nigo yabwate emechando na amatemu amange, ase eng’encho goetera asare, Omonene naragete ebibe bia Israeli. Elija n’omobani o Nyasae orenge, nonye nigo nigo arenge gotama korwa aase aamo gochia asande gotoria obogima bwaye. Egesaku kiaye omonyene ekia mobwatetie buna eng’iti y’orosana erinde kemokore. Korende Nyasae akamoonchora Elija.OB 31.5

Abamalaika bakamoarigania ase obonene nobobui igoro, ataeteretie makweri. Musa nere orange omonene kobua bonsi abamotakanerete. Nyasae namosigete mono. Nanyorete ribaga riogokwana na Nyasae obsio ase obosio buna omonto agokwana nomosani oye. Akaegwa ribaga korora oborabu na obonene obonge bwaetananete Tata. Goetera ase Musa Omonene agatoria abanto korwa ase obosomba bwa Misiri. Musa nigo arenge gotenena gati y’abanto nendamwamu ya Nyasae. Ekero endamwamu ya Nyasae igoro y’ebeibe bia Israeli n’okwemurungania kwabo yatindiete, obwanchani bwa Musa ase bare mbwatemetwe. Nyasae agataka abasirie na arosie egesaku ekenene korwa ase Musa. Musa akaorokia obwanchani bwaye ase Israeli goetera ogosorora ribaga riabo. Ase obokong’u bwaye agasaba Nyasae gotiga obororo bwaye obonene na koabera Israeli, gose atinyie erieta riaye korwa ase egetabu kiaye.OB 32.1

Musa agaetera amakweri, korende Mikaeli agaika nyuma omobere oye otaragunda. Saitani agatema konywangerera buna noyoye, korende Mikaeli akabokia Musa na komoira igoro. Saitani akaomana mono buna Nyasae tari omanyaboronge eseng’encho airete omonto oye. Korende Kristo tamotogonyereti, nonye yarenge ekeene buna namatemwa a Saitani agerete omosomba o Nyasae akagwa. Akamotigera Ise, gagoteba,“Omonene nagotogonyere!” Yuda 9.OB 32.2

Yeso konye obatebirie aboorokigwa baye buna mbare bateneine neere batare gocha korora makweri mpaka barore oboruoti bwa Nyasae nechinguru chiaye. Ekero ki’ogwonchoka ekieni kwa Yeso, aya agaikerana. Obosio bwa Yeso bokaba buna risase rikomekemeka. Chianga chiaye chikaraba se.OB 32.3

Musa nao arenge gotenerera baria barabokigwe korwa ase ebeibe ekero Yeso arairane eria kabere. Na Elija, oyoonchoretwe atarochi makweri natenenerete baria baraegwe emebere etari gokwa ekero Kristo arairane na bairwe igoro batarochi makweri.OB 33.1

Kibare nomoichano nobwoba, aboorokigwa bakarora obonene bwa Nyasae neriire riria riabatubete, na bakaigwa eriogi ria Nyasa ease obonene rigoteba, “Oyo n’Omwana one omwanchwa, ngokirie nere; moigwere ere!OB 33.2